Македонија
(Видео) Милошоски: Ковачевски и Османи го кријат предлогот

Денешната прес-конференција ја држам на тема двајца манипуланти – Димитар Ковачевски и Бујар Османи, истакна Антонијо Милошоски, пратеник и член на ИК на ВМРО-ДПМНЕ, на денешната прес-конференција.
„Овие двајца политичари, едниот премиер, другиот министер за надворешни работи, не запираат со манипулациите кон македонската јавност, особено за процесот на евроинтеграциите, спорот со Бугарија и понижувачките предлози што ги прифаќаат, тврдат дека имаа некакви забелешки и лажат дека тие се видоизменети. По онаа легендарна лага од 2018 година, во која учествуваше Бујар Османи, дека сме добиле датум за преговори, а гледаме дека го немаме, вчера се случи уште една голема лага, со која Димитар Ковачевски се обидува да го покрие дебаклот на македонската дипломатија“, вели Милошоски.
Премиерот Ковачевски се обиде да ги манипулира новинарите, јавноста и политичките партии дека неговото „не“ во Брисел предизвикало суштинско видоизменување на францускиот предлог за преговарачката рамка за многу бргу потоа да биде демантиран од министерската за надворешни работи на соседна Бугарија, а денеска е демантиран и од француската амбасадорка во Софија, која е акредитирана од Макрон да биде претставник и гласноговорник на француската политика како амбасадорка.
„Затоа бараме од Димитар Ковачевски да престане со овие манипулации, да го објави предлогот и да види целата јавност дека овој предлог суштински е истиот со она за кој македонската јавност веќе изгради широк консензус дека е неповолен за државата, понижувачки е, не ги решава споровите со Бугарија и не нè носи до целта што си ја замислуваме во минатите 20 години, а тоа е полноправно членство во ЕУ“, истакна тој.
За ваков предлог, оценува тој, не е доволно да се консултира Ковачевски само со коалициските партнери и со одбрани на невладини или провладини здруженија, за ваков неповолен предлог на преговарачката рамка, кој е голем дебакл за македонската дипломатија, додаде Милошоски, треба Владата да даде оставка, да распише предвремени парламентарни избори и народот да одлучи на кој начин смета дека треба да продолжи да се движи Република Македонија во правилна насока.
„ВМРО-ДПМНЕ го чувствува револтот на граѓаните, оправданото незадоволство што се акумулира поради манипулирањето на Ковачевски и на Бујар Османи и ВМРО-ДПМНЕ ги разгледува сите можни демократски опции за канализирање на тој револт во Собранието и надвор од Собранието. Но, ваквиот предлог не смее да помине бидејќи Македонија со ова губи, се понижува, а на надворешнополитички план нема да ја постигне целта ниту за членство во ЕУ ниту за подобри пријателски рамноправни односи со Бугарија“, потенцира пратеникот и член на ИК на ВМРО-ДПМНЕ, Антонијо Милошоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Протест за правда за Феликс и конечно решавање на проблемот со бездомни кучиња по улиците

За утре, среда – 26 февруари, во 09:30, часот пред Основен Суд, Скопје закажан е протест за под името „За Феликс. За животните. За правна држава. За правда“.
Протестот инициран од „Анима мунди“ ќе се случува истовремено со првото рочиште по кривичната пријава која ја поднесоа против Љубе Крстевски поради претепување до смрт на безомното куче Феликс со метална шипка кај Момин Поток.
Здружението бара најстроги казни за мачење и убиство на животните, без олеснителни околности и мерки.
„Тој ѕверски, со умисла, употреба на најголема сила и 10 удари со метална шипка по глава во заграден простор и без можност да се избави и спаси, удираше несреќно бездомно куче. До безсозание, со намера да оди до смрт за да потоа со помош на друго лице врзе и фрли како да е предмет и најобично ѓубре. Во друштво на четири полнолетни лица, мажи, мирно бездомно куче е удирано, најкрвнички и со сета сила, без било кој да интервенира додека кучето урлика од болка и не можејќи да избега или се спаси; но затоа асистенти кога требаше околу врат да се врзе со метална жица, влече и фрли како ѓубре. Соучесници. И ова немаше да го видиме, ова немаше да го дознаеме да не беше снимено. „Љубе со другарите“ се ликот на секој еден кој во оваа држава се изживува, коле, беси, труе животно. А Феликс е секое друго животно, секое друго несреќно битие оставено само на себе да страда и умира во пеколни маки, душа која не успеавме да го спасиме. Молкот ги охрабрува и помага сторителите, никогаш оној кој е жртва. Ако ова само немо го набљудуваме, учествуваме во колективната деградација и дегенерација на се што е нормално, хумано, човечно во нашата држава“, велат од „Анима мунди“.
Досега, во судската пракса, ниту еден сторител на ова кривично дело не добил затворска казна, туку условна или парична казна, не повисока од 300 евра. Според активистите, ваквата судска пракса не го спречува насилството врз послабите – напротив, го охрабрува.
„Зелен хуман град“ кои го поддржаа протестот бараат да се промени досегашната судска пракса и да наместо изрекување на парична казна во максимален износ од 300 евра или условна казна, да се изрече ефективна казна затвор за сторителите. Бараат и законска забрана за размножување на кучињата, освен во случај на регистрирана одгледувачница, регулирање и воведување данок за таа дејност, законска забрана за напуштање миленици, како и закон за задолжително регистрирање (со микрочип) на сите миленици уште од раѓање. Се бара и прецизна законска регулација на трговијата со домашни миленици во пет-шоповите и одгледувачниците (кучиња/мачки).
Се бара и веднаш да се донесе национален акт за унифицирање на програмата во сите прифатилишта во Македонија, според принципот „залови – стерилизирај – вакцинирај – врати“, но на плански, брз и масовен начин, во обем што одговара на реалните потреби на општините. Во првата година мора да се заловат најмалку 75% од бездомните кучиња, со што во наредните години стапката на заловување би била значително пониска, а решението – трајно и одржливо. Ова мора да се спроведе доследно, без импровизации и без прекини, пораачаа од „Зелен хуман град“.
Македонија
Маркетите ќе мораат да ги објавуваат на интернет цените на производите

Маркетите отсега ќе мораат да ги објавуваат на интернет цените на производите, со најновите измени на Законот за заштита на потрошувачите коишто беа усвоени денеска во Собранието.
Законот беше поднесен од пратениците од ВМРО-ДПМНЕ, со цел, како што беше потенцирано, подобра информираност на потрошувачот и олеснување на споредливоста на цените.
Со тоа, големите, средните и малите трговци, кои вршат дејност на трговија на мало, со шифра 47, во согласност со националната класификација на дејности, се должни на својата веб-страница да ја објават одделно за секој свој продажен објект тековната продажна, односно единечната цена во моментот на објавување на секоја стока што ја нудат за продажба.
Усогласување на цените ќе се врши на дневна основа, а при објавувањето на цените, ќе се применуваат одредбите од овој закон за означување на цените.
Со објавувањето на цените на интернет се очекува зголемување на транспарентноста, потрошувачите да имаат лесен пристап до информациите за цените, како и фер конкуренција. Трговците ќе бидат еднакво обврзани да ги почитуваат овие одредби, а потрошувачите да бидат заштитени од нефер практики, како што се скриените трошоци или нејасните цени.
Деновиве беше објавено дека законот е имплементиран во Израел, Италија, Франција и во Хрватска.
Македонија
Тошковски на средба со пакистанскиот амбасадор, Модсар Чаудари

Министерот за внатрешни работи, Панче Тошковски, денес оствари работна средба со пакистанскиот амбасадор со седиште во Софија, чија надлежност ја покрива и Македонија, Н.Е. Модсар Чаудари.
Оваа средба беше искористена за продолжување на разговорите за интензивирање на соработката во полето на безбедноста отпочнати за време на претходната средба со пакистанскиот министер за внатрешни работи, Сајед Мохсин Раза Накви.
„Амбасадорот Чаудари уште еднаш ја потврди волјата на Министерството за внатрешни работи на Пакистан за потпишување на договор за реадмисија со македонското Министерство за внатрешни работи, што би било особено корисно за нас во борбата против нелегалната миграција како земја низ која транзитираат нелегални мигранти со пакистанско потекло. Воедно, се осврнавме и на постапката за потпишување на договор за полициска соработка, кој, меѓу другото, би опфаќал и соработка која би се реализирала преку Центарот за обука при Министерството за внатрешни работи“, потенцираше министерот Тошковски.
Двете земји и покрај географската оддалеченост имаат заедничка цел – обезбедување на безбедна средина за живот на своите граѓани со почитување на нивните права и во таа насока двете страни изразија подготвеност и подготвеност и желба за интензивирање на соработката.