Македонија
(Видео) Митева: Градежната„ офанзива” на Шилегов брои 9,5 километри

Најавената градежна офанзива на Шилегов брои вкупно 9,5км, рече портпаролката на ВМРО-ДПМНЕ, Марија Митева.
„Петре, Град Скопје не е кафана па да ја разработиш за два месеци во летниот период. Град Скопје бара посветеност, бара работа која никогаш не запира и Град Скопје заслужува развој, а не стагнација и предизборна еуфорија. Залудни се овие напори кои ги вложуваш во предизборието, скопјани имаат одлична меморија и не ги забораваат овие четири години на неработење, не ги забораваат ниту изливите на нервоза и ароганција како и уништувањето на зеленилото“, истакна во изјавата Митева.
Како што најавува Шилегов, додаде портпаролката на опозициската партија, оваа градежна офанзива ќе се одвива во сите 10 општини, што значи, како што рече, во секоја општина ќе се реконструира по само 1км од градските улици.
„Навистина, скопјани се фрапирани од ова твое “засилено” темпо. Она што го отсликува Шилегов е инфраструктурната стагнација, погрешните политики, како и лошите проекции за иднината и развојот на градот. Голем број на круцијални проекти останаа нереализирани, како што се тунелот под Кале, Универзалната сала, велосипедските патеки, спортските капацитети, спектакуларно најавуваниот зип лајн и така натаму, но тоа се само дел од предизборните лаги на Шилегов на кои многу скоро ќе им дојде крај“, посочи Митева.
Додаде, дека нејзината партија и граѓаните ги знаат проблемите со кои се соочува Град Скопје, и како што напомена, промените ќе започнат токму од Град Скопје, со заминувањето на Шилегов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осомничен за трговија со дрога ја искинал наредбата за претрес во неговиот дом

Oбвинителството поведе истрага против едно лице за неовластено производство и пуштање во промет наркотични дроги. Тој е осомничен и за одземање или уништување службен печат или спис.
Осомничениот, во својот дом во Гевгелија, неовластено заради продажба држел 26,42 грама наркотична дрога кокаин. Дрогата и повеќе други предмети со траги од кокаин биле пронајдени на 1 август, при претрес во неговата јакна закачена во ходникот од семејната куќа.
При претресот, полициските службеници на осомничениот му ја предале и прочитале издадената наредба за претрес од судијата на претходна постапка при Основниот суд Гевгелија. Наредбата примена во МВР и со службен печат на МВР, тој ја зел и ја искинал пред службените лица и на тој начин оштетил спис кој припаѓа на државен орган, односно наредба издадена од Основен суд Гевгелија и примена од МВР ОВР Гевгелија.
Бидејќи постојат законски основи, надлежниот јавен обвинител до судијата на претходна постапка достави предлог за определување мерка притвор за осомничениот.
Македонија
Цела ноќ борба со огнот во велешката фабрика – изгореа магацин со фрижидери и канцеларии со документи

Пожарот што синоќа избувна во фабриката за прехранбени производи „Мирана“ во Велес бил целосно локализиран рано утрово, околу 4 часот. Според информациите од надлежните, огнот зафатил магацински простор и канцеларии, а на неколку места сè уште се забележува слабо чадење.
Пожарот бил пријавен околу 22 часот. Горел магацин каде што имало пластична амбалажа, фрижидери и друг материјал, како и канцелариски простории со документација.
Во гаснењето учествувале три противпожарни возила од ТППЕ Велес со екипи од три смени, возило од ЈКП „Дервен“, како и две специјални возила на Дирекцијата за заштита и спасување. На терен биле и шестмина полициски службеници од Велес.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.
Причините за избувнувањето на пожарот сè уште се испитуваат.
Македонија
Голем пожар во фабрика во Велес

Синоќа избувна голем пожар во фабриката за храна „Мирана“, лоцирана во индустрискиот блок на Велес, потврдија надлежните.
На барање на Територијалната противпожарна единица Велес, привремено беше исклучена електричната енергија во фабриката.
„Во Велес, кај индустрискиот блок, опожарена е фабриката ‘Мирана’. По барање на ТППЕ Велес, исклучена е струјата во фабриката. Единиците за гаснење на пожарот се на терен“, информираше директорот на ЦУК, Мухамед Али.
Директорот на ДЗС, Стојанче Ангелов, информираше доцна синоќа дека нема информации за повредени лица при пожарот.
Причините за избувнувањето сè уште не се познати.