Македонија
(Видео) Митева: Десет причини зошто се потребни избори веднаш, сè друго со СДС и ДУИ на власт е губење време за Македонија
„Погрешната и девастирачка политика на СДС и ДУИ во овој момент води само до избори. А за избори, покрај реалноста, која потврди дека немаат мнозинство за уставните измени, има уште безброј причини, кои ги отсликуваат нивните политички неуспеси“, рече Марија Митева, портпарол и член на ИК на ВМРО-ДПМНЕ.
Според портпаролката на ВМРО-ДПМНЕ, секој ден, недела, месец повеќе власт на СДС и ДУИ ќе значи продолжување на: уништеното образование – трета година по ред немаме учебници, нема квалитетно образование, генерации ученици не добија квалитетна наука и настава; девастирана економија – инфлација што не се издржува, енормно задолжување на Македонија, највисок буџет досега, а најсиромашен народ; катастрофален здравствен систем – се губат животи, нема соодветни терапии, криминал и во здравството, а таму никој за никој не одговара; безбедноста, која треба да ни ја гарантираат МВР и Спасовски, подобро да ја нема – станавме држава во која криминалците се на слобода, а невините осудени, улиците станаа поле за пресметка на криминални банди; протестите станаа секојдневие – доказ дека незадоволство постои на сите нивоа, ги понижија пензионерите, ги оставија да преживуваат од ден за ден, наместо социјална држава, станавме држава на социјална неправда; континуирано ни се зголемува бројот на иселување, населението сè повеќе ни го нема, младите заминуваат во огромен број – а главната причина за тоа се економските состојби за кои директно се виновни СДС и ДУИ, но и фрустрациите што ги донесоа во општеството дека во Македонија нема перспектива; земјоделците се заборавени, нема ниту пласман за нивните производи ниту поддршка од власта; бизнис-секторот е на работ на пропаста, се затвораат компании, се губат работни места, а власта на СДС и ДУИ носи закони што директно им го отежнуваат работењето; нема ниту инфраструктурен развој веќе 7 години – 2 км автопат не може да направат, чекаме со години за еден автопат од Кичево до Охрид, кои им беше оставен почнат, а требаше само да знаат како треба да работат; владеење на правото во Македонија не постои – владеат криминалот и корупцијата, заштитата на криминалците доаѓа директно од врвот на власта, нема независно судство, нема никаква правда во државата.
„И може уште двапати по толку да се набројува, но политичката реалност е една – власта на Ковачевски нема никаков легитимитет, комплетно е поразена нивната политика, која ја однесе Македонија на дното.
Затоа, потребни се избори, кои се единствено разумно решение за излез од кризата, а сè друго е губење време за Македонија и македонскиот народ“, додаде Марија Митева, портпарол и член на ИК на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.