Од Виница ве повикувам заедно да ја обезбедиме македонската иднина, иднината на нашата земја. Да се обединиме и заедно да ја донесеме одлуката на 30 септември. Да ја искористиме историската фер шанса за сите граѓани на Македонија и на референдум да ѝ го расчистиме патот на нашата земја за влез во НАТО и ЕУ со зачуван и зајакнат идентитет. Со постигнатиот македонско-грчки договор носиме подобар живот за сите граѓани и овде во Виница, во источна Македонија, но и во целата наша држава, изјави пратеничката на СДСМ, Славица Шуманска-Митева.

Според неа, со договорот го чуваме богатото културно и историско наследство, кое ја направи нашата македонска нација славна. ,,Договорот го гарантира нашето право да се определуваме како Македонци. Ставаме крај на вековните оспорувања и врз славното минато ја градиме иднината. Според член 1 од овој договор, официјалниот јазик на нашата држава е македонски јазик, со што нашиот македонски јазик е потврден еднаш засекогаш. Државните симболи – химната, грбот, знамето – не се менуваат. Со договорот ја тргаме и последната пречка, добиваме покана за членство во НАТО. Ни се гарантираат сигурност, безбедност и стабилност, и тоа на сите наши граѓани, на целата наша територија. Набргу започнуваме преговори за членство во ЕУ“, додаде таа.

Митева вели дека по 11 години стагнација, уназадување и изолација, сега Македонија е на вистинскиот пат кон полноправно членство во НАТО и ЕУ, со обезбеден македонски идентитет. Македонија вредносно, цивилизациски припаѓа во семејството на развиените и напредни држави.
,,Придобивките од овој договор се огромни. Поддршката за него, како и за референдумското изјаснување за иднината на Република Македонија, е највисок патриотски чин. Затоа, на 30 септември масовно и достоинствено да кажеме ‘да’ за членство во ЕУ и НАТО со прифаќање на договорот. Да кажеме ‘да’ за македонската иднина! Им го должиме тоа младите, на сегашните и идните генерации“, додаде таа.