Македонија
(Видео) Митева: Додека владее сиромаштија владата потрошила 270.000 евра на службени трошоци
Нема функционер од владата кој не трошел огромни средства од буџетот како службени трошоци. Владините функционери, премиерот и министрите минатата година потрошиле 270.000 евра, во најголем дел за ручеци, вечери и друг вид на ресторантски и кафански седенки. Во време на економска криза, енормно висока инфлација владата лани потрошила 10% повеќе пари за службени трошоци во однос на 2020-тата година. Или во бројка потрошени се 25.000 евра повеќе во однос на годината претходно,изјави на денешната прес-конференција Марија Митева, портпарол на ВМРО-ДПМНЕ.
Таа истакна дека на врвот на листата се наоѓа сегашниот Вицепремиер за евроинтеграции, Бојан Маричиќ со потрошени скоро 15.000 евра на репрезентации. Имено тој потрошил 4.000 евра за авионски патувања, а на аеродромите плаќал и вип салони, а ручал и вечерал за скоро 5.700 евра во приватните угостителски објекти, државни мензи и угостителски објекти во странство.
Убедливо најмногу по ресторани, дури и пред Бојан Маричиќ трошел Бујар Османи. Тој за ручеци, вечери и други угостителски услуги потрошил околу 6.000 евра. Веднаш по него во тесна трка со Маричиќ е и Артан Груби со потрошени над 4.500 евра. Високо на листата е и Фатмир Битиќи со потрошени над 20.000 евра по разни основи, зад него, но не многу скромен во трошењето е сегашниот министер во МЗШВ Љупчо Николовски со потрошени над 12.000 евра, од кои половина се потрошени во државните мензи. Крешник Бектеши со потрошени над 10.000 евра, за кој како една од ставките каде се потрошени значаен дел од парите се услугите во вип салоните на аеродромите. А, над 1.000 евра за телефонски услуги во државните мензи потрошил и Димитар Ковачевски, како тогашен заменик министер за финансии, изјави Митева.
Митева наведе дека додека овие владини функционери потрошиле над 270.000 евра за службени трошења, за авио билети, кафеани, ресторани и вип салони народот се соочува со 50% покачување на основните продукти за исхрана, 30% повисоки сметки за струја и парно и зголемени цени на сите неопходни работи за нормално функционирање на домаќинствата.
Запрашан за оправданоста на високите сметки на владините функционери Ковачевски на сето ова одговара дека ваквите трошоци во голема мера се оправдани и дека уште повеќе ќе се трошат доколку е потребно за Македонија и нејзиниот евроинтеграциски процес. Преку вип салоните на аеродромите и ручеците во приватните угостителски објекти не се обезбедува евроинтеграција. Оваа влада, која повикува на штедење додека владее сиромаштија немилосрдно ги троши парите на граѓаните на работи кои не се неопходни, изјави Митева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Од денеска до 5 март пријавување за правото на субвенциониран студентски оброк
Министерството за образование и наука ги информира студентите дека рокот за пријавување за правото на субвенциониран студентски оброк за академската 2025/2026 година трае од денеска до 5 март 2026.
Правото на субвенциониран студентски оброк може да го користат сите редовни студенти на додипломски студии кои имаат месечен приход помал од минималната нето плата, како и студентите запишани на постдипломски студии и на интегрирани студии на државните и на приватните универзитети во државата.
-Студентите што ги исполнуваат условите, а не аплицирале досега, може да поднесат апликација електронски преку порталот: https://e-uslugi.mon.gov.mk, се наведува во објавата на МОН каде што се наведени и условите за остварување на правото на субвенциониран студентски оброк и контакти за поддршка при аплицирањето.
Студентите на кои им било прекинато правото на субвенциониран оброк, а сметаат дека ги исполнуваат условите, може повторно да аплицираат. Овој рок е, исто така, отворен за студентите кои не аплицирале во претходните активни рокови.
Македонија
Пролетен неделен ден во зима со температури до 16 степени
Претпладне по одделни котлини ќе има услови за појава на утринска магла. Во текот на денот ќе преовладува сончево време со мала до умерена облачност. Ќе дува слаб ветер претежно од јужен правец.
Минималната температура ќе биде во интервал од -4 до 5, а максималната ќе достигне од 12 до 16 Целзиусови степени, информираат од Управата за хидрометеоролошки работи.
Во Скопје, исто така се очекува сончево време со мала до умерена облачност и со слаб југоисточен ветер. Во делови од котлината ќе има услови за појава на утринска магла. Минималната температура се очекува да се спушти до 0, а максималната да достигне до 15 Целзиусови степени.
Според синоптичарите, до среда ќе се задржи стабилно и релативно топло време. Утрата ќе бидат постудени со појава на слаба магла по одделни котлини. Во четврток и петок ќе има услови за слаби локални врнежи од дожд.
Македонија
Родителите на децата загинати во Пулс порачаа дека правда мора да има
Родителите на загинатите во трагичниот пожар во „Пулс“ поладнево на „Марш за ангелите“ порачаа дека нема да дозволат одговорните за трагедијата на нивните деца да ја избегнат правдата, иако, велат на обвинителната купа седат само дел од лицата поврзани со трагедијата.
-Суштината е одговорноста. Факт е дека денес на обвинителна клупа седат дел од лицата поврзани со трагедијата. Но, исто така факт е – болен, непобитен факт – дека постојат луѓе со многу поголема моќ, обврски и надлежности, кои воопшто не се ни опфатени. Луѓе кои имале должност да спречат, а не спречиле, рече Александар Наунов, претседател на Здружението на граѓани „16 Март 2025 Кочани“.
Тој, во изјавата за медиумите, истакна дека се најавува свикување колегиум на обвинителите за повторно разгледување и евентуално ослободување на дел од обвинетите.
-Колегиумот (на обвинители) може да прегледува документи, но не може да брише факти, не може да брише пропусти, не може да брише нечии должности што биле игнорирани. Не може да избрише нечие непостапување кога тоа било прашање на живот и смрт, смета претседателот на ЗГ „16 март 2025 Кочани“.
Според Наунов, суштината не е во тоа кој трчал, кој се плашел, а кој спасувал, туку кој имал должност, а не ја извршил.
-Ние не сме овде за одмазда. Ние сме овде за правда. За ред. За систем што ќе ги штити децата – не систем што ќе ги остави да загинат. Родителите никогаш не се откажуваат. Можеби ќе нè уморите, но нема да нè скршите. Можеби ќе не одолговлекувате, но нема да не замолчите. Вистината ќе излезе на виделина, рече Наунов.
Протестниот марш денеска започна од „Паркот на Револуцијата“, а заврши пред Основниот суд и обвинителство во Кочани.

