Празните зборови се одлика на Шилегов, од сè што до сега кажа и вети видовме спротивни дејствија. Случајот со дивоградбата кај „Мавровка“ со месеци ја брануваше јавноста, особено по изјавите од надлежните институции дека не можат да го откријат инвеститорот на објектот, реагираше на денешната прес-конференција портпаролката на ВМРО-ДПМНЕ, Марија Митева.

„Објектот прво стана ‘државен проблем’ за потоа да стане ‘симбол за решеноста’ (на тогаш новата влада) која наводно ќе се бори против криминалот. Денес е доказ дека институциите се окупирани и во оваа држава правото не важи еднакво за сите. Денес можеме да заклучиме дека Шилегов го дефинираат ваквите дела кои јасно ја покажуваат неговата неискреност кон скопјани“, рече Митева.

Во едноминутно видео, посочи Митева, се гледа лага, манипулација и самоволие кои ги употребуваат СДСМ и ДУИ.

„Така е Петре, убаво кажано. Токму на ваквите (за тебе ситни) примери граѓаните можат да се уверат во вашата решеност, и на СДСМ и на ДУИ, дека правна држава со вас не може никогаш да има. За ситни популистички поени неколку дена по формирањето на Владата правевте драма пред локалот во ТЦ Мавровка, за сега да има нов објект, кој никна како феникс од пепелта и во кој се прави пречек на партиски функционери“, се обрати Митева.

Според неа, сите институции, општината, Шилегов и Заев тогаш, како што оцени, ја убедувале јавноста дека не знаат кој гради без дозвола кај ТЦ Мавровка.

„Па, во ‘потрагата’ тогаш се вклучи и Единицата за економски и компјутерски криминал при СВР Скопје. Јавноста многу добро ги памети овие игри на СДСМ чија цел е да ја скријат реалноста. На изборите во октомври ќе можеме да ставиме крај на ваквиот начин на владеење“, порача Митева.