Македонија
(Видео) Митева: Проверка на потеклото на имот на политичарите е императив

Ковачевски неспособен да го реши проблемот со вработените во царинската управа и управата за јавни приходи, преку изјави во јавноста им се заканува на вработените. Ковачевски замислете вели ќе чекал резултати од проверката на имотна состојба на вработените, бидејќи сметал дека платите треба да се услогласат со имотот, изјави Марија Митева од ВМРО-ДПМНЕ.
„И сето ова немаше да звучи несоодветно доколу го кажуваше премиер кој вистински и прво за самиот себе го применуваше тоа што го бара од другите. Испитување на потеклото на имотот на вработените треба да се случи во сите органи на државната управа, во судството и обвинителството, но пред се, премиерот е тој кој што треба да покаже личен пример.
Дали ако го погледнеме анкетниот лист на Ковачевски, може да заклучиме дека неговата плата треба да се намали и за колку?
Додека јавноста чека одговори за безбројните скандали поврзани со власта на СДС и ДУИ, како Ковачевски и функционерите стекнаа толкав голем имот и ги проширија своите бизниси од позиција на власт, Ковачевски ги напаѓа вработените и бара проверка на нивниот имот.
Во недостиг на храброст да се поведе постапка за проверка на имот на политичарите, со цел да не се покаже пред јавноста како во Македонија функционерите од власта на ДУИ и СДС повеќекратно имаат зголем имот и банкарски сметки за време на нивното владеење, реперкусиите ги чувствуваат вработените. Додека инфлацијата го јаде животниот стандард, додека во Македонија се живее на работ на сиромаштијата, Ковачевски со ваквите изјави како да има цел да ги предомисли вработените од протести преку кои си ги бараат своите права кои воедно ги заслужуваат“ рече Митева.
Таа додаде дека иако секој релевантен извештај и секоја една ревизија на институциите се соочува со негативно мислење, каде детектирани се бројни злоупотреби и прекршувања на законите, власта одбегнува да поведе постапка пред се за одговорност, а потоа и за проверка на имотот.
Ваквиот начин на самоволие и деградирање, според Митева, е резултат на паниката и стравот во власта, дека како што вели, за многу брзо од денес ќе се соочат со реалноста, а тоа е пораз, а потоа и одговорност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Изведувачите на сопствен трошок одново ќе асфалтираат две улици во Битола

Како што најави градоначалникот на Општина Битола, Тони Коњановски, дека инсистира на спроведување на решенија на проблемите, од денес започнаа активностите за отстранување на оштетениот коловоз и подготовка за повторно асфалтирање на улицата „Бурса“.
Активностите на оваа улица ќе се изведуваат од денес до сабота, во периодот од 09 до 19 часот од делот кај влезот на поранешна „Шеќерана“ и „Квасара“, според фаза 2 од проектот за времен режим на сообраќај, делот пред влезот на „Синпекс“, според фаза 3 од проектот и делот кај „Агнеса“ до отпадот. Додека траат работните активности, согласно времениот режим улицата, ќе биде затворена за сообраќај поради санација на оштетениот коловоз и асфалтирањето, кое ќе се изведува во наведениот период.
Во меѓувреме, се чекаат резултатите од лабораториските испитувања на претходно вградениот асфалт на улицата.
На барање на општината, изведувачот и на улицата кај „Блис“, започна со подготовка за целосно преасфалтирање на оваа улица, поради оштетувањата кои беа констатирани изминатиот период.
Градоначалникот Коњановски, потенцира дека квалитетот на извршената работа, секогаш мора да биде на задоволително ниво и нема да се дозволи проектите кои се реализираат да имаат било какви недостатоци.
Македонија
Данела му одговори на Мицкоски: „Благодарам на можноста господине Мицкоски да делувам едукативно на вас“

Жалам што првиот човек на Владата се уште не ги знае законите и нема основни познавања на тоа како функционира локалната самоуправа, за да го повикува градот Скопје да постапува по дивоградби, вели градоначалничката на Град Скопје, Данела Арсовска откако премиерот Христијан Мицкоски ја повика да постапи за градилиштето во Чаир за кое тврди дека е без градежна дозвола.
„Мицкоски, надлежност за постапување против дивоградби има општинскиот градежен инспектор. Таков инспектор има општина Чаир и сите други скопски општини како посебни единици на локалната самоуправа во рамки на градот Скопје. Градот Скопје е единствена единица на локална самоуправа која нема градежен инспектор по закон. Освен општинскиот градежен инспекторат на Чаир надлежност има и Државниот градежен инспекторат кој е под директна надлежност на Министерството за транспорт и врски“, вели Арсовска.
Кога станува збор за гонење на криминалци кои се фатени во спроведување на кривично дело, додава таа, во случајов узурпација на државно земјиште, бесправна градба и нарушување на општа безбедност одговорноста е кај Министерството за внатрешни работи.
„Благодарам на можноста господине Мицкоски да делувам едукативно на вас во овој случај и апелирам, сега откако ги знаете одговорностите и надлежностите да постапите веднаш“, се вели во реакцијата.
Македонија
Уапсени полицајци – дозволиле студенти од Турција нелегално да престојуваат во земјава

По неколкумесечна предистражна постапка, денеска полициски службеници од Единицата за корупција при Одделот за сузбивање на организиран и сериозен криминал извршија претреси на 15 локации во Скопје, Штип и ГП Долно Блаце. Притоа се приведени 11 лица, а две лица се недостапни на органите на прогонот.
„Осомничените физички лица од месец јануари до месец април годинава во Штип, со искористување на своето претпоставено влијание врз осомничените полициски службеници од ГП Блаце и инспектори од Секторот за странци во Штип, со кои имале претходно воспоставени пријателски односи, во најмалку четири наврати овозможиле на најмалку пет странски државјани кои незаконски престојувале во РСМ непречено да го регулираат својот престој. Осомничените физички лица за определена награда посредувале и преземале дејствија со цел турските државјани чиј рок за одобрен престој заради студирање им бил истечен да се стекнат со дозвола за одобрен привремен престој во РСМ“, соопшти Обвинителството.
Осомничените полициски службеници прифаќајќи го влијанието од посредниците, со намера да прибават за себе имотна корист, ги пречекориле границите на своите службени овластувања и не ја извршиле својата службена должност. Имајќи предвид дека незаконскиот престој согласно одредбите од Законот за странци е прекршок за кој е предвидена прекршочна санкција – глоба во износ од 50 до 250 евра во денарска противвредност, осомничените го оштетиле и Буџетот на РСМ.
Јавниот обвинител имајќи ги предвид околностите, оцени дека се исполнети условите и до судијата на претходна постапка при Основниот кривичен суд Скопје ќе поднесе предлог за определување на мерката притвор за петмина осомничени, додека за осум лица предлог за определување мерки на претпазливост.