Цените на основните продукти двојно се зголемени, плата од 20.000 денари денес, е како плата од 10.000 денари лани. Ова не е само политичка констатација, ова го кажуваат цените на рафтовите. И за ова не се виновни само некои трговци како што тоа сакаат да го прикажат Ковачевски и Битиќи, туку и самите тие, кои се 5 години на власт, вели Марија Митева, портпаролка на ВМРО-ДПМНЕ.

„Пред една година литар масло се купуваше за цена од 60 денари, сега истото тоа масло од ист произведувач чини над 160 денари. Килограм шеќер пред една година чинеше 35 денари, сега чини над 60 денари, ист е и случајот со брашното и млекото. Еден леб пред една година чинеше 20-ина денари, сега тој се продава и до 60 денари. Ова се цените на основните животни продукти и буквално сите бележат 100 % зголемување“, изјави Митева.

Ова, како што додаде, е реалната инфлација, која е речиси 100 %. Основните продукти што се неопходни за прехранување едно семејство, оценува Митева, се со двојно повисоки цени сега за разлика пред една година.

„И зошто е виновна власта? Затоа што Македонија во 2016 година имала доволно произведено пченица за задоволување на домашните потреби, а сега нема и увезува над 60.000 тони годишно. Тоа влијае на цената на брашното, лебот и на белите печива. Како што има пад во производството на пченица, така има и пад на произведената сточна храна, што влијае на поскап увоз и по неконкретно домашно сточарство, тоа се поскапи млеко, месо и јајца. Лошиот однос на СДСМ кон домашното производство придонесе народот да не може да се прехрани“, потенцира портпаролката на ВМРО-ДПМНЕ на денешната прес-конференција.

Одговорноста за ова, како што додаде, е директно на конто на СДСМ. „Ги осиромашија државата и народот. Премногу е, затоа протест за промени и предвремени парламентарни избори“, нагласи Митева.