Македонија
(Видео) Митревски пак обвинува за тешка измама во ССМ: Трендафилов не може да биде избран за претседател, ЕУ со писма бара мое итно враќање

Поранешниот претседател на Сојузот на синдикатите на Македонија, Живко Митревски, побара итно да се прогласи за ништовен изборот на Слободан Трендафилов за нов претседател на ССМ, избран по смртта на Дарко Димовски, оти е прекршен статутот. Покрај ништењето на изборот, Митревски извести дека неколкумина европарламентарци веќе испратиле писма до Владата и до Министерството за труд во кое бараат тој итно да биде вратен на функцијата претседател на ССМ оти е ништовно решението од Фросина Ременски, со кое тој беше тргнат од функцијата оти не е потпишано и од дополнителниот министер во тогашната влада.
Речиси половина час експретседателот на ССМ денес објаснуваше дека изборот на Трендафилов за претседател е скандал.
„Вршител на должност претседател на Сојузот на синдикатите може да стане само претседател на грански синдикат. Слободан Трендафилов, од моја страна, беше примен како правник во рамките на Сојузот на синдикатите на Македонија и беше член на Синдикатот на УПОЗ. По принцип, не знам како воведен, на монархија, по неговото заминување од Синдикатот на градежништвото, станува секретар во Синдикатот на градежништвото. Чудото да е уште повеќе на седницата на претседателство на ССМ, која е свикана спротивно на статутот на ССМ бидејќи може да се свика исклучиво од претседател, доколку не може претседателот, се свикува со овластување некој од претседателството или со две третини од членството. Без разлика на тоа, секретарот на ССМ, инаку пензионер, Златко Цветковски, ја свикува на ‘Вибер’ оваа седница на 8 јуни. Во ист ден се свикува и седницата на Советот, каде што ни помалку ни повеќе за в.д. претседател на ССМ се именува господинот Слободан Трендафилов, кој во никој случај не може да биде. Некои од членовите на претседателството бараат веднаш да ја напушти канцеларијата, а изненадувањето и измамата да бидат уште поголеми, тој се претставува дека е претседател на гранскиот Синдикат на трговијата. Значи, во еден ден очигледно човекот станал и трговец, односно станал трговски работник“, рече Митревски.
Митревски потсети дека според статутот на Синдикатот на трговијата, претседателот може да биде избиран само на изборно собрание, а Слободан Трендафилов покажал дека еден ден пред одржувањето на седницата на претседателството бил наводно именуван за претседател на Синдикатот на трговијата и со тоа ги довел во заблуда членовите што го избрале за претседател на ССМ.
„Повеќето од членовите се воведени во тешка измама и тешка заблуда. Очигледно дека и Синдикатот на трговијата со претходната претседателка, која наводно дала оставка поради пензија, а нема поднесено барање за пензија, направиле тешка измама доведувајќи ги во заблуда повеќето од членовите на синдикатите“, рече Митревски.
Тој апелира Министерството за труд и Владата веднаш да постапат по барањата поднесени од него и од уште неколкумина челнови на Советот и да биде поништен изборот на Трендафилов за в.д. претседател на ССМ. Исто така, Митревски побара Владата и Министерството за труд да постапат по барањата на неколкумина европарламентарци, кои испратиле писмо во кое укажуваат дека тој треба да биде вратен на функцијата.
„ЕУ и неколку претставници, пратеници од Европскиот парламент, ангажираа неколку консултантски куќи и адвокатски канцелари, кои се обратија со писмо до премиерот на Владата, Димитар Ковачевски, со кое бараат мое итно враќање за легитимен претседател на ССМ укажувајќи на неколку значајни активности, пред сè, повикувајќи се на владеењето на правото“, објасни Митревски и нагласи дека денес до Владата ќе биде испратено уште едно писмо од Брисел.
Митревски го смета Трендафилов за нелегитимен в.д. претседател и вели дека не може да потпишува какви било одлуки оти сè уште не е заведен во Централниот регистар. Министерката за труд, Јованка Тренчевска, не го потпишува решението оти исто така се сомнева во изборот.
Слободан Трендафилов беше избран за в.д. претседател на конгрес пред десет дена како единствен кандидат бидејќи дотогашниот претседател Дарко Димовски почина на 45-годишна возраст. Димовски, од изборот за претседател на ССМ од 2017 година, постојано водеше судски постапки со Митревски, кој го оспоруваше и неговиот избор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.