Македонија
(Видео) Мицевски: Парламентарното мнозинство е нестабилно и нефункционално
![](https://makfax.com.mk/wp-content/uploads/2021/01/nikola-micevski.png)
На денешната седница на Собранието на Република Македонија процедурално се обрати пратеникот и координатор на пратеничката група на ВМРО-ДПМНЕ, Никола Мицевски, кој се осврна на работата на парламентот.
Мицевски во своето излагање потенцира дека во парламентот веќе одреден период се чувствуваат празнините и аномалиите на парламентарното мнозинство, односно на неколку седници што се одржаа изминатиот период, како што рече, пратениците од власта не може да го соберат потребниот кворум.
„СДСМ и коалициските партнери да имаа мнозинство какво што очекуваа, ќе ја продолжеа и 34. седница, во која има над 70 точки, но бидејќи немаат мнозинство во парламентот, избегнуваат да ги отвораат темите. Тоа доволно кажува за неревносното работење на парламентарното мнозинство и за несигурностите што ги имаат во редовите одреден период. Ваквиот начин на работа покажува дека ситуацијата не е добра и набргу ќе треба да се размислува за посериозно парламентарно мнозинство“, истакна Мицевски.
ВМРО-ДПМНЕ, рече тој, очекува власта да има слух за тутунарите и да се отворат прашањата што ги засегаат овие луѓе, но, според него, власта очигледно нема слух за проблемите на оваа категорија граѓани.
„Во однос на ова прашање, ВМРО-ДПМНЕ побара да се одржи посебна седница, на која ќе се расправа за проблемите на тутунарите и за законот за тутун. Бидејќи парламентарното мнозинство не присуствува на седниците и нема намера да работи за доброто на граѓаните, ВМРО-ДПМНЕ ќе прави кворум на таа седница и ќе учествува активно во разгледувањето на законот за тутун бидејќи на тие луѓе мора да им се помогне“, заврши Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Јанчев: Струјата може да биде поефтина само доколку е под ,,капата” на државата
![](https://makfax.com.mk/wp-content/uploads/2024/06/sasko-jancev-1.jpg)
Решението за поевтина струја е левичарско и струјата може да биде поефтина само доколку е под ,,капата” на државата – ова е ставот што го истакна пратеникот од Левица, Сашко Јанчев, во својот говор на собраниската седница за измените во Законот за енергетика.
– Во јавните услуги, како што е снабдувањето со електрична струја, не смее да има приватен интерес, како што тоа го има сега ЕВН, затоа што јавните добра и услуги се оние минимум добра и услуги што мора да ги има секој граѓанин за да има минимум пристоен живот, а за да ги има, тие мора да бидат подостапни. За да бидат подостапни, треба да бидат поевтини. За да бидат поевтини, мора да бидат под ,,капа” на државата, затоа што приватниот пазарен интерес на газдите налага на крајот од равенката тие да имаат профит – поентираше пратеникот од Левица, Сашко Јанчев.
Според сегашната регулатива, универзалниот снабдувач со електрична енергија, а тоа е ЕВН Хоум, до 1 јули треба да основа нова фирма, ново друштво, да извади нова лиценца.
– Ако не го направи тоа, домаќинствата ќе се префрлат од регулиран пазар, каде што цената на струја е 60 евра по мегават, на слободен пазар, каде што цената е повисока – 95 евра по мегават. Значи, ќе има повисока цена и за да не се случи тоа, сега ги правиме овие интервенции во Законот – истакна Јанчев.
Пратеникот Јанчев дискутираше и за прашањето зошто универзалниот снабдувач не стигнал да си ги исполни законските обврски согласно со законските рокови и одлуки.
– Тоа е затоа што се чекаше согласност од Мицкоски. Се чекаше Мицкоски да се согласи дека ЕВН Хоум ќе биде универзален снабдувач со електрична енергија, наместо тоа да го прави домашен ентитет. Затоа, впрочем, тој во предизборието беше и на гости во Виена – појасни Јанчев.
Македонија
Николоски: Нема да дозволам неодговорно трошење на народни пари
![](https://makfax.com.mk/wp-content/uploads/2024/06/aleksandar-nikoloski.jpg)
Би сакал денеска да го отворам најголемото и најсуштинското прашање, а тоа е изградбата на третата фаза од железничкиот Коридорот 8. Според билатералниот договор помеѓу ЕУ и Република Македонија проценетата вредност на истата е 340 милиони евра, а самиот државен ревизор утврдува дека до денот на ревизијата вредноста е зголемена и проценета на 560 милиони евра што преставува зголемување во износ од 220 милиони евра, истакна министерот за транспорт, Александар Николоски на денешната прес конференција на тема: Ревизорски извештај за реализација на капитални инвестиции.
Тој потенцираше дека разликата помеѓу проценетата вредност утврдена со договорот на ЕУ и Република Македонија и тоа што во моментов е утврдено како проценета вредност е 220 милиони евра. Министерoт истакна дека се работи за изградба на 23,4 километри железница што според пресметките, 1 километар железница чини 24 милиони евра.
„Најважното за што јавноста до денес не е запозната, се работи за железничка пруга која што треба да оди од пред Крива Паланка до граница со Бугарија. Железничка пруга којашто поминува среде град, буквално поминува среде Крива Паланка, треба десетици а можеби и стотици куќи да се рушат, да се иселува население и најважното, завршува во тунел кој што нема крај. Ќе прашате зошто? Затоа што според проектот а и секако според законите, Вие можете да градите само на сопствена територија. Предвидено е поврзувањето со Бугарија да оди преку тунел, но тој тунел може да се изгради само до границата со Бугарија и истиот треба да го преземе и да го гради Бугарија од другата страна во услови кога Бугарија нема направено ни проект за железничко поврзување со Македонија“, потенцираше министерот Николоски.
Тој додаде дека времето на неодговорното трошење народни пари е завршено и дека нема да толерира појави на криминал и копруција.
Македонија
Муцунски упати честитка до идниот генерален секретар на НАТО, Марк Руте
![](https://makfax.com.mk/wp-content/uploads/2023/11/Untitled1.jpg)
Министерот за надворешни работи и надворешна трговија, Тимчо Муцунски, преку социјалната мрежа „X” упати честитки за постигнатиот консензус за назначувањето на Марк Руте за иден Генерален секретар на НАТО.
Во честитката, министерот Муцунски нагласи дека лидерството на идниот Генерален секретар ќе биде особено значајно, во контекст на безбедносните предизвици со кои се соочуваме. Воедно, изрази подготвеност за соработка во насока на зајакнување на НАТО Алијансата.