Македонија
(Видео) Мицкоски: Градоначалниците интензивно работат, почнуваме проект за канализација во Страчинци

Денеска овде во Страчинци започнуваме, односно градоначалникот започнува да го исполнува тоа што е ветено пред граѓаните, рече во изјавата за медиумите лидерот на ВМРО-ДПМНЕ, Христијан Мицкоски, кој заедно со градоначалникот на Гази Баба, Бобан Стефковски, присуствуваше на почетокот на изградба на примарна мрежа на фекална канализација.
„Започнува изработката на фекална канализација со цевки Ф-200. Според тоа што слушнав од луѓето коишто се овде, ќе има повеќе од 170 приклучоци. 170 семејства ќе добијат приклучок до оваа фекална канализациска мрежа, што досега не било случај. Тоа е првата фаза, ќе има и втора и трета фаза. Очекуваме дека овој проблем конечно да биде решен заедно со една пречистителна станица“, истакна Мицкоски.
Лидерот на ВМРО-ДПМНЕ најави дека градоначалниците од редовите на неговата партија интензивно ќе ги исполнуваат ветувањата затоа што, како што рече, на народот му е преку глава од политиканство.
„Народот сака нормално да живее, и Македонци, и Албанци, и Турци, и Срби, Власи, Роми, Бошњаци. Сите тие луѓе сакаат да остават нешто зад себе, да остават нешто за своите деца и не сакаат повеќе да го гледаат нашето политичко мочуриште и валкање во нашата кал. Сакаат да видат живот, а ние сакаме да бидеме дел од тоа што тие сакаат да го видат, а тоа е животот“, порача Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Неколку скопски општини денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.00 до 13.00 часот, корисниците од улицата Црноризец Храбар, општина Аеродром;
– во периодот од 08.30 до 13.00 часот, дел од корисниците од село Сарај – пат за Љубин (кај Џамијата) општина Сарај;
– во периодот од 09.00 до 11.30 часот, поголем дел од корисниците од објектите со парен број на улицата Иван Цанкар во населба Влае, општина Карпош;
– во периодот од 09.00 до 13.00 часот, корисниците од ул. Елисе Поповски Марко, Киро Гавриловски, Антон Панов, општина Центар;
– во периодот од 09.00 до 14.30 часот, едл од корисниците од ул. Франц Прешерн со бр. од 20 до 40, општина Карпош;
– во периодот од 11.00 до 15.30 часот, дел од корисниците на ул Поп Богомил и трнодол, општина Карпош.
Македонија
Променливо облачно со сончеви периоди и со услови за дожд

Времето денеска ќе биде променливо облачно со сончеви периоди. Во западните и јужните делови ќе има повремен локален дожд и услови за појава на ретки грмежи. Ќе дува слаб до умерен ветер од североисточен правец. Минималната температура ќе биде во интервал од 6 до 11, а максималната ќе достигне од 16 до 23 степени.
Во Скопје, променливо облачно со сончеви периоди и со услови за слаб дожд. Ќе дува слаб до умерен ветер од североисточен правец. Минималната температура ќе се спушти до 11, а максималната ќе достигне до 23 степени.
Времето во наредните денови
Времето во следните денови ќе биде сончево со мала до умерена облачност и со умерен, повремено засилен северен ветер. Во вторник и среда утринските температури ќе бидат пониски, а дневните во постепен пораст.
Македонија
Полицијата казнуваше и денес, откри 96 сообраќајни прекршоци

Одделението за безбедност на патниот сообраќај при СВР Скопје денеска во периодот од 08:30 до 16:00 часот спроведе зајакната акциска контрола во делот на сообраќајот на територијата на град Скопје.
При контролата санкционирани се вкупно 96 учесници во сообраќајот, од кои изречена е 41 мерка за возење со брзина поголема од дозволената, 15 санкции за возачи на мотоцикл кои управувале без заштитна кацига, четири мерки за возење без возачка дозвола, две санкции за возење мотоцикл без поседување на дозвола со соодветна категорија, две мерки за малолетни лица за управување мотоцикл кои при тоа немале положено возачки испит за познавање на сообраќајните знаци и правила на сообраќајот, а едно лице било приведено во полициска станица за утврдување на идентитет за сторен сообраќаен прекршок по член 211 поради непочитување на знаци и наредби од полициски службеници и 31 мерка по други сообраќајни прекршоци, соопшти МВР.
Сообраќајните контроли продолжуваат и во наредните денови. Полицијата апелира до сите учесници во сообраќајот да ги почитуваат сообраќајните правила и прописи и сите заеднички да придонесат за подобри, посигурни и побезбедни патишта.