Македонија
(Видео) Мицкоски: Доблесно е, по сите скандали, Спасовски да си даде оставка

Претседателот на ВМРО-ДПМНЕ, Христијан Мицкоски, во изјава за медиумите рече дека нечуено е што претседателот на Собранието, Талат Џафери, им го одзема правото на пратениците од пратеничката група ВМРО-ДПМНЕ да дебатираат за интерпелацијата на министерот Спасовски.
Мицкоски истакна дека, по сите скандали, доблесно е Спасовски да си даде оставка на функцијата што ја извршува и колку-толку да спаси што е останато од неговата чест.
„Нечуено е тоа што го примени вчера спикерот Талат Џафери да се одземе правото на опозицијата да дебатира на интерпелација на министер. Ме зачуди зошто нема 62 пратеници поддршка, очигледно двајца недостигаа. Дали изгубил во меѓувреме, треба да си одговори тој на тоа прашање?! Мој совет е дека, по сите овие скандали што се појавија и кои ќе се појават како што кажав веднаш по празниците, доблесно од негова страна ќе биде да ја напушти позицијата и колку-толку да може да спаси од својата чест“, изјави Мицкоски.
Тој потенцира дека Спасовски како човек што поддржува аболиран политичар, кој национално ја опустоши државата, каков што е Зоран Заев, нема ниту грам достоинство.
Но, човек што поддржува слепо аболиран политичар, кој влезе во политиката преку првостепена судска пресуда за потоа на апелација, во втор степен, да му биде укината, денот како го потпиша оној капитулантски договор, односно откако одлучи национално да ја опустоши државата, тој човек нема достоинство, заврши Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
122 години од смртта на македонскиот револуционер и борец за слобода Гоце Делчев

Во земјава денеска се одбележуваат 122 години од смртта на македонскиот револуционер и борец за слобода Гоце Делчев. По тој повод, делегации и граѓани ќе положат цвеќе пред гробот на Делчев во црквата „Свети Спас“, а во Собранието на Северна Македонија ќе биде доделена државната награда „Гоце Делчев“ за значајни остварувања во областа на науката.
Според најавите, во црквата „Св. Спас“ цвеќе ќе положат собраниска делегација предводена од потпретседателот на Собранието Антонијо Милошоски во чиј состав се пратениците Велика Стојкова-Серафимовска, Сања Лукаревска и Павле Арсовски, владина делегација предводена од премиерот Христијан Мицкоски во чиј состав се министрите за внатрешни работи и за образование и наука, Панче Тошковски и Весна Јаневска, како и партиски делегации, здруженија, граѓани….
Во Собранието напладне ќе биде доделена државната награда „Гоце Делчев“ за 2025 година за особено значајни остварувања од интерес за Република Северна Македонија во областа на науката. На доделувањето на наградата ќе се обрати министерката за образование и наука, Весна Јаневска.
Делчев, кој пред повеќе од еден век го разбра светот како поле за културен натпревар на народите, беше убиен од османлиската војска на 4 мај 1903 година во селото Баница, на пат кон Сер. Роден на 4 февруари 1872 година во Кукуш, во семејството на Султана и Никола.
Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата. Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија.
По убиството на 4 мај 1903-та, неговите посмртни останки се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11 октомври 1946 година биле пренесени во црквата „Свети Спас“ во Скопје.
Македонија
И денес топло со температури до 30 степени, од вторник дожд

Времето денеска ќе биде сончево и топло со мала до умерена облачност. Попладне облачноста ќе се зголемува. Ќе дува слаб до умерен ветер претежно од западен правец. Минималната температура ќе биде во интервал од 4 до 10, а максималната ќе достигне од 24 до 30 степени.
Како што информира УХМР, во Скопје ќе биде сончево и топло, попладне со умерена облачност. Ќе дува слаб ветер од југозападен правец. Минималната температура ќе се спушти до 10, а максималната ќе достигне 30 степени.
Во понеделник попладне ќе има услови за изолирана нестабилност, а од вторник следува период на променливо облачно и нестабилно време со локален пороен дожд, грмежи и засилен ветер. Наместа ќе има услови за појава на невреме. Дневната температура ќе биде во постепено благо опаѓање.
Македонија
На граничните премини од македонска страна нема подолги задржувања за влез и излез од државата

На граничните премини од македонска страна нема подолги задржувања за влез и излез од државата. Како што информира АМСМ, сообраќајот на државните патишта се одвива непречено, по суви коловози, а интензитетот на патните правци надвор од градските средини е умерен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.