Македонија
(Видео) Мицкоски: Поради неспособноста на власта, денес бевме сведоци нa чин кој место да нѐ обедини, нѐ разединува

Главната водилка на Гоце Делчев, а тоа е дека тој го разбира светот како поле на културен натпревар, претпоставува дека денеска ќе се преслика како натпревар во многу области, рече претседателот на ВМРО-ДПМНЕ, Христијан Мицкоски на денешната трибина насловена „Гоце е Македонија“.
„ И ние како Македонци, како луѓе кои што се носители на суверенитетот на нашата Македонија, заедно со нашите сограѓани Албанци, Турци, Власи, Срби, Роми, Бошњаци и останати треба да се натпреваруваме заедно со многу поголеми и многу помоќни држави од нашата Македонија и многу поголеми и многу помоќни народи, не само во нашето опкружување, во Европа, па и во светот. И тоа сме покажале дека сме способни да го правиме, да победуваме, кога победуваме да се радуваме, а кога губиме да тагуваме, но секогаш сме биле достоинствени и во победите, но и во поразите. Нашата Македонија родила многу свои чеда кои што го обелиле образот на истата таа Македонија, и сигурен сум дека Гоце бил горд на тие луѓе“, заклучи Мицкоски.
Претседателот на ВМРО-ДПМНЕ посочи дека политичкиот противник прави доста грешки. Политичкиот противник денеска ја води владата, но ја води на тој начин што е помал коалиционен партнер на Демократската унија за интеграција.
„Треба да сме свесни дека тоа што ќе го во иднина наследиме и кое што ќе треба да го корегираме е озбилен проблем. Кога велам озбилен проблем мислам на големината на проблемите кои што ќе ги наследиме. И тие проблеми ќе треба да ги решава ВМРО-ДПМНЕ. Тука не мислам само на националните проблеми кои што ќе ги наследиме, тука мислам и на образовните, тука мислам и на социјалните, тука мислам и на економските, на политичките проблеми. Во суштина има многу проблеми кои што ќе треба да ги решаваме. Не очекувајте дека некој друг ќе ги реши. Треба ние да ги решиме. Видовме од овие 68 месеци се веќе Влада дојдоа со ветувањето за живот, пекол донесоа, ја опљачкаа, ја разнебитија, ја понижија Македонија. И затоа денеска професоре, бевме сведоци наместо на еден убав свечен чин кој што треба да не обедини ние гледаме чин кој што не разединува, не дели и затоа хеликоптери кружеа над небото над главниот град. И тоа е суштината во која што ние денеска живееме“, рече претседателот на ВМРО-ДПМНЕ.
Тој нагласи дека денес се живее во поделби, граѓаните се соочуваат и државата со многу проблеми, и многу сограѓани гледајќи го тажното и мачно секојдневие си заминуваат од земјава. А, главен виновник за сето ова е неспособната Влада.
„А, тоа ќе продолжи ако нешто не се смени. Ние како ВМРО-ДПМНЕ треба да бидеме предводници на тоа нешто за да менуваме. Пред пет години малкумина беа убедени дека ВМРО-ДПМНЕ најпрвин ќе опстане на политичкава сцена, но откако опстана, дека ВМРО-ДПМНЕ ќе дојде во ситуација да денеска биде најголемата повторно политичка партија во Македонија и партија која што ќе се обиде на следните предвремени парламентарни избори да го обедини пред се македонскиот народ, но и сите оние наши сограѓани кои што веруваат дека ВМРО-ДПМНЕ може да донесе подобар живот, да донесе надеж“, рече Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски за тендерот за униформите: Се фокусиравме на квалитетот и цената, нема неправилности

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.
По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.
Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.
„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.
Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.
„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.
Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.
Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.
Македонија
Таравари контра Фетаи: Неговата група брои помалку од 40 луѓе кои чувствуваат вознемиреност и вина

Претседателот на Алијансата за Албанците, Арбен Таравари ја коментираше прес-конференцијата на неговите поранешни партиски соборци кои јавно денес излегоа со став дека остануваат во Влен, и не се согласуваат со неговите политики.
Таравари вели дека тоа е група од помалку од 40 луѓе на Арбен Фетаи (претходно го разреши од партиската функција), а чувствуваат мешавина од вознемиреност и вина.
„Анксиозноста е најлошото чувство кое човек го доживува…особено кога е измешано со чувство на вина! Продолжуваме помирно и посигурно од кога било кон Октомвриската победа која е блиску…многу блиску!“, пишува Арбен Таравари, претседател на Алијансата за Албанците.
Ставот на неговите поранешни сопартијци е дека Албанците сакаат да продолжи промената, а не враќање на старото, по најавите на Таравари за соработка и со ДУИ на претстојните локални избори.
Македонија
Албанците сакаат продолжување на промената, а не враќање на старото, велат неистомислениците на Таравари од Алијансата

Го слушнавме нашето членство. Се сретнавме со нашите активисти во секој град – од Липково до Струга. И пораката е јасна: Албанците сакаат продолжување на промената, а не враќање на старото. Ова беше истакнато на денешната прес-конференција на некогашните соработници на Арбен Тараври од Алијансата за Албанците, кои не се согласија со одлуката да ја напушти Владата.
На прес-конференцијата зборуваше ексминистерот од Алијансата, Азир Алиу, а присутен беше и Арбен Фетаи, којшто Таравари вчера го разреши од партиските структури.
Тие не се согласуваат со поличкиот правец кој го зазема Таравари, најавувајќи соработка и со ДУИ за претстојните локални избори.
„Во овој турбулентен политички период, кога стариот режим ги прави последните обиди да ја затемни надежта за промени, ние избравме да не реагираме брзо. Слеговме на терен, ги слушавме нашите активисти, разговаравме со партнерите и размислувавме – со смиреност и одговорност“, рече Алиу.
Оваа група од веќе поделената Алијанса, смета дека земјата има потреба од стабилност, развој, одговорно владеење и од Алијанса која нема да ja предаде довербата добиена од граѓаните. Тврди дека се залага за одговорност, а не поради лични интереси и целта е да не ја напуштат битката на половина пат.
Велат дека Алијансата не е создадена да биде ничија алатка. Таа е создадена да биде глас на граѓаните, промените, и еднаквоста.
На пресот беше истакнато дека денешната влада е постабилна од кога било, посветена на реформите и решена за интеграција. Алијансата за Албанците, како што додадоа, има клучна улога во овој процес, и тие нема да се откажат од таа мисија.
„Во однос на половичните состаноци на ограноците што се нарекуваат „партиски конгреси“ и кои шират поделби и етикетирања – тие не го претставуваат духот, ниту пак статутот на Алијансата. Изразуваме разочарување за навредите упатени кон албанската младина и жената во име на Алијансата, но нашата одговорност е да не го изгубиме правецот дури и кога другите се деградираат“, беше истаканато.
Додаваат дека ќе продолжат како рамноправен партнер во коалицијата ВЛЕН, со иста професионалност и посветеност – служејќи им на граѓаните со чест и решителност.
Крилото на Арбен Таравари во Алијансата за Албанците, претходно го разреши Арбен Фетаи од функцијата претседател на партиското собрание. Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.