Македонија
(Видео) Мицкоски: Потребни се предвремени избори, Владата на ДУИ поддржана од СДСМ дејствува спротивно на ЕУ-вредностите
Владата на ДУИ поддржана од СДСМ има чуден менталитет, практично, без никакви консултации, постигнува некакви национални предавства во четири очи и потоа тоа го претставува како победа, вели претседателот на ВМРО-ДПМНЕ, Христијан Мицкоски.
Истакна дека до некаде ги разбира ДУИ и нејзиниот претседател Али Ахмети, но не може да ги разбере членовите на Владата од редовите на СДСМ, кои учествуваат во националните предавства и му ги наложуваат на македонскиот народ, но и на ВМРО-ДПМНЕ, кои воопшто не биле консултирани, да ги прифатат и сето ова однесување е спротивно на вредностите на Европската Унија, кои се поставени уште од нејзиното основање.
„Само оваа Влада на ДУИ поддржана од СДСМ. Ги разбирам некако и Али Ахмети и ДУИ, можам до некаде да ги разберам. Не можам да ги разберам овие од СДСМ кога ќе постигнат договор со национално предавство, пред се, тоа предавство тука се однесува за македонскиот национален идентитет, и потоа тоа го изедначуваат со триумф и бараат од ВМРО-ДПМНЕ, која воопшто не ни била консултирана, бараат од народот тоа да го прифати. Ако не го прифатите тоа, вие сте спротивно на ЕУ. Не! Самото тоа однесување е спротивно на вредностите на ЕУ дефинирани уште многу многу одамна од Дегаспери, Шуман и Аденауер, што сосема се разликуваат од ова однесување на Владата на ДУИ поддржана од СДСМ“, рече Мицкоски.
И сега, вели Мицкоски, вие кога ќе имате вакво однесување, се поставува прашањето како тогаш овие луѓе функционираат објаснувајќи дека така функционираат што го кочат развојот и градењето на Македонија, како што е гласањето против буџетите на општините Аеродром, Охрид, Велес и така натаму наспроти што поддржуваат сомнителни зделки, како доделување 10 милиони евра за ЈСП во доцните синоќешни часови изгласани во Советот на Град Скопје од страна на советниците на СДСМ, ДУИ и Левицата.
„Вчера, во доцните ноќни часови во градското собрание, коалицијата СДСМ – ДУИ и, замислете, против оние што тие ги навредуваа, Левицата, изгласаа одлука поголема од 10 милиони евра за Јавното сообраќајно претпријатие за цела година, некаде околу 650 милиони денари. А од друга страна, овие од Владата на ДУИ поддржана од СДСМ ја напаѓаа Левицата дека била антиевропска. Заедно изгласаа вчера. Потоа во Аеродром се гласаа буџет, проекти, градинки, училишта и така натаму, повторно коалицијата СДСМ – Левицата гласаа против буџетот. Во Охрид се гласаат градинки, булевари, нов пазар, катна гаража, повторно коалицијата СДСМ – Левицата гласа против. Велес се гласа за нов пазар, подземни гаражи и така натаму, повторно коалицијата СДСМ – Левица гласа против“, истакна Мицкоски.
Запраша што имаат против тие луѓе да се гради Македонија, што имаат против овие објекти, додавајќи дека нема да ги земат со нив овие објекти и дека сè што ќе се изгради преку општинските буџети, како градинки, училишта, улици, тротоари, ќе остане за македонските граѓани.
„Ете, тие се тие европски вредности што ги промовира Владата на ДУИ поддржана од СДСМ или неевропски вредности. И затоа е потребно ресетирање, затоа се потребни предвремени парламентарни избори за навистина да дојдат политичари што ќе промовираат вистински европски вредности. Вредности со дијалог, вредности што ќе обединуваат, транспарентност, отчетност. Тоа се вистинските европски вредности, борба против криминалот и корупцијата“, објасни Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Битиќи: ВМРО-ДПМНЕ ги потврди добрите политики на СДСМ кои доведоа до намалување на маржата на цената на струјата
„Новата Влада на ВМРО-ДПМЕ уште еднаш ги потврди добрите политики на владата предводена од СДСМ, а тоа е во насока на заштита на интересите на граѓаните“, рече пратеникот од СДСМ Фатмир Битиќи, образложувајќи го ставот на пратеничката група на СДСМ за поддршка на Предлог на закон за дополнување на Законот за енергетика, кој по скратена постапка беше денес усвоен во Собранието.
Битиќи нагласи дека измените кои денеска се предлагаат се последица на успешната тендерска постапка за избор на Универзален снабдувач, која заврши пред неполн месец дена, а на која што беше избрана ЕВН Хоме.
„Тоа што е ново е дека постигнавме да ја намалиме маржата која универзалниот снабдувач ја аплицира кон крајните корисници од 11,5% на 9,9%. Ова е една од најниските маржи досега аплицирани кон крајните корисници и сметаме дека ова е нешто на кое сите треба да се гордееме“, рече Битиќи.
Образложувајќи го ставот на пратеничката група на СДСМ, Битиќи појасни дека со овие законски измени се овозможува аплицирањето на намалената маржа кон крајните корисници да стапи на сила веднаш, пред Регулаторната комисија за енергетика (РКЕ) да ја донесе одлуката за цената на струјата од 1 јули до крајот на годината.
Зборувајќи за законските измени, Битиќи образложи дека една од причините за поддршка од пратеничката група на СДСМ е тоа што со истите се предвидува производителот на електрична енергија со најголем инсталиран капацитет на Универзалниот снабдувач да му понуди на продажна во 2024 година 40% од вкупните годишни потреби на снабдувачот.
„Тоа значи дека ЕСМ, која што се пријавила пред само 10 дена, а слушавме помпезно како тоа само 85% ќе понуди, нуди двојно повеќе од тоа што укажува Законот дека треба да го понуди. Нуди по цена која е 60% субвенционирана, пониска цена од производната цена“, рече Битиќи.
Пратеникот Битиќи во своето обраќање потенцираше дека ова е начинот на кој една разумна и конструктивна опозиција треба да се однесува во Собранието, а тоа е да се поддржуваат сите законски решенија кои имаат за цел поддршка на граѓаните и квалитетот на нивниот живот.
„Вака СДСМ и коалицијата ќе продолжи да се однесува и наредните четири години секогаш кога е во прашање интересот на граѓаните“, порача Битиќи.
Македонија
Петровска: СДСМ е државотворна партија и повторно ќе се врати на победничките патеки
Кандидатката за претседател на СДСМ, Славјанка Петровска денеска пред членовите од Велес ги претстави клучните приоритети од нејзината програма „Манифест за социјалдемократијата“.
„СДСМ е државотворна партија и повторно ќе се врати на победничките патеки онаму каде што припаѓа. Тоа ќе го постигнеме само ако сме обединети и ако постојано го слушаме нашето членство. Тоа, јас како иден претседател, се обврзувам да го правам, да ги слушам членовите кои како што го избираат претседателот на партијата, така ќе ги избираат и претседателите на општинските организации, но и идните пратеници, советници, градоначалници“, посочи Петровска и дополни:
„Заедно ќе успееме, заедно ќе го вратиме СДСМ на кормилото на државата“.
Македонија
Собранието го донесе Законот за енергетика со кој ќе се спречи поскапување на струјата
Со 84 гласа ЗА, и ниту еден против и воздржан, Собранието го донесе Законот за дополнување на Законот за енергетика што го најави ВМРО-ДПМНЕ, за да се спречи зголемување на цената на струјата.
Пратениците на СДСМ претходно најавија дека ќе го поддржат законот, посочувајќи дека тој е продолжение на добрите политики на минатата влада.
Од Левица реагираа за овој Закон, но на крајот немаше гласови против.
Претседателот на Комисија за економски прашања, труд и енергетска политика, Бојан Стојаноски од ВМРО-ДПМНЕ, кој е и еден од предлагачите на законското решение, посочи дека измените се многу суштински, но се прилично едноставни, поради што законот е поднесен по скратена постапка.