При денешната посета на општина Свети Николе, претседателот на ВМРО-ДПМНЕ, Христијан Мицкоски, одговарајќи на новинарско прашање во однос на тоа дали да учествува ВМРО-ДПМНЕ во техничка влада, истакна дека во рамките на партијата ќе се одржат состаноци за учество во техничката влада, а негов предлог ќе биде да номинираат личности што ќе имаат основна задача да го чуваат демократскиот процес бидејќи власта во периодот што следува ќе се обидува да создава проблеми и да им ја украде волјата на граѓаните.

„Па, да, периодов што следува ќе имаме состаноци во рамките на партијата, извршниот и централниот комитет, тоа е мојот став, ќе видиме како понатаму ќе се развива тоа, каков ќе биде ставот на ИК и ЦК, ценам дека е потребно учеството на ВМРО-ДПМНЕ во техничката влада откако претходно понудивме да се интервенира законски да се избрише овој имплант, кој, според нас, а и според многу уставни експерти, е спротивен на Уставот, но, ете, од страна на Владата тоа беше одбиено и тие рекоа дека еве од следните избори“, рече Мицкоски.

Мицкоски најави дека укинувањето на техничката влада ќе се направи по изборите.

„Во имe на тоа како ВМРО-ДПМНЕ ќе предложам законски измени во рамките на парламентот, да, еве, од 1.1.2025 или 2026 година овој имплант да биде избришан од законот и веќе следните парламентарни избори да се одржат без овој имплант техничка влада, но веќе кога е законска обврска, мојот предлог ќе биде да номинираме личности што ќе имаат основна задача да го чуваат демократскиот процес бидејќи власта во изминатиот период, но и во периодот што следува, ќе се обидува по три основи да создава проблеми. Првиот е немилосрдно да ги троши буџетските средства, на тој начин што идната влада на ВМРО-ДПМНЕ има тешкотии во работењето и да се соочи со неликвидност на државниот буџет и безмислосно ќе ги трошат буџетските средства. Второ, насилно ќе се однесуваат и ќе ја опструираат работата на ДИК. Јасно дефинираната опозиција, во условно кажано албанскиот блок, гледаме дека не може на пристоен начин да номинира член во рамките на ДИК. И морам да признам, ако продолжат вака да се однесуваат, сѐ уште се консултирам со соработниците, но мислам дека нема што ни ВМРО-ДПМНЕ да бара во работата на ДИК. Тогаш нека си спроведат избори ДУИ, Али Ахмети, Зечевиќ, Маричиќ, Ковачевски, Спасовски, па да видиме како ќе изгледаат. Затоа што од самиот почеток гледаме дека некој се обидува да имаме нелегитимен и нелегален изборен процес. Нека си спроведат избори Артан Груби, Османи, Али Ахмети, Зечевиќ, Маричиќ и другите, ние нема што да правиме. Трето, она што слушаме е дека СДСМ насекаде на оние состаноци со малкумина, сѐ уште се останати симпатизери и поддржувачи на политиките на Зечевиќ, Маричиќ и Ковачевски, главната порака е дека имаме многу пари, ќе потрошиме многу пари, ние сме свесни дека ќе загубиме, но на тој начин со поткуп и со девијантно однесување ќе ја намалиме победата на ВМРО-ДПМНЕ и ќе им отежниме на Мицкоски и на ВМРО-ДПМНЕ да може понатаму да работат“, рече претседателот на ВМРО-ДПМНЕ.

Мицкоски порача дека се лажат ако мислат дека на тој начин ќе направат нешто и увери дека секој оној што ќе се дрзне да прави нерегуларности поткуп и ќе ги слуша насоките на Зечевиќ, Маричиќ, Ковачевски, Ахмети, Груби, Османи, ќе биде фатен и ќе биде процесиран пред истражните органи и пред судско-обвинителскиот систем, кој ќе биде ослободен.