Нова мерка на СДСМ, спортистите добиваат услови за пензиско и здравствено осигурување и пензија, приход или плата, ја исправаме децениската неправда кон спортистите. Една од главните мерки во полето на спортот е да овозможиме грижа за спортските ветерани, истакна претседателот на Комисијата за спорт на СДСМ, Наумче Мојсовски, на денешната трибина Агенда спорт 20-24.

Како ракометар со 20 години ракометна и репрезентативна кариера, рече тој, немам еден ден стаж, а како мене има многу вакви примери.

Мојсовски додаде дека мерката ќе ги вклучи сите спортисти без разлика дали доаѓаат од колективен или индивидуален спорт.

На трибината се обрати и Андријана Будимир, членка на Комисијата за спорт на СДСМ и поранешна ракометарка. Таа кажа дека конечно имаме влада која има слух за рамноправноста на жените и вложува да се воспостави потребниот баланс.

„30 години сум во спортот, 20 години како играч, 10 како тренер и сум била сведок на неправда кон жените во спортот. Денес, конечно имаме Влада која има слух за рамноправноста на жените и вложува да се воспостави потребниот баланс. Огромна чест ми е да сум дел од Комисијата за спорт на СДСМ предводена од Мојсовски и ветувам дека посветено ќе работам на зајакнување на позицијата на жената во спортот и унапредување на спортот целокупно“, рече Будимир.

Таа додаде дека целта е да се воведат квоти во сите управни одбори и федерации за рамноправно учество на жени.

„Учеството на жените во федерациите ќе придонесе жените да го кажат своето искуство и да влијаат на целосно унапредување на спортот“, заклучи Будимир.

Претседателот на СДММ и директор на Агенција за млади и спорт, Дарко Каевски, кажа дека во 2017 година само 9 отсто млади практикувале спорт, а во 2019 процентот е зголемен над 27 отсто.

„Училишниот спорт се врати на прав пат. Имаме зголемен број на новитети, повеќе натпревари, повеќе клубови и тренери. Ги наградуваме најдобрите младински клубови како дополнителен стимул за младите. Млади спортски надежи е проект со кој младите надежни таленти ќе бидат детектирани. За Олимпските игри во 2020 во Токио добивме олимписка норма, тоа е доказ за успешноста на политиките за спорт, тоа е мотив да продолжиме по прав пат и интензивно да вложуваме во спортот“, заклучи Каевски.

Трибината Агенда спорт 20-24 е дел од серијалот на повеќе програмски трибини на СДСМ, консултации со стручната јавност, граѓаните и невладините организации.