Македонија
(Видео) „Наместо Младински центар, во центарот на Прилеп сведоци сме на сцени од хорор филмови“, велат СДСМ Прилеп

„Некогашната Виша економска школа, локацијата на која согласно изборната програма на ДПМНЕ и Борче Јовчески, требаше да се отвори Младински центар. Но наместо Младински центар, во центарот на Прилеп сведоци сме на сцени од хорор филмови“, рече Бојан Цветаноски, претседател на ЛК СДММ-Прилеп.
„Којзнае кое по ред нереализираното изборно ветување и сцените кои ги гледате, се вистинската слика за четиригодишното владеење на локалната власт на ДПМНЕ – излажани граѓани, изневерени очекувања, распаднати институции.
Не само што изборното ветување прерасна во нова лага, туку ДПМНЕ и Јовчески го прекршија Законот за младинско учество и младински политики.
Имено, од донесувањето на Законот во јануари 2020 година, општините беа должни во рок од 5 години да овозможат функционирање на најмалку еден Младински центар на својата територија.
Пет и пол години подоцна, општина Прилеп е меѓу малкуте во државата и единствена во регионот која не ја исполнила законската обврска.
Советничката група на СДСМ и Локалниот клуб на СДММ во повеќе наврати поднесуваа амандмани и иницијативи за пренамена на еден од постоечките објекти во општина Прилеп во Младински центар. Но советниците на ДПМНЕ и градоначалникот Јовчески сите нив ги одбија.
Последиците од владеењето на ДПМНЕ ги гледаме на секој чекор. Младите се најголемата жртва на неспособната општинска власт и затоа нивното забрзано заминување од градот никого не треба да чуди.
Сликите кои ги гледате се најдобра потврда дека актуелната власт на ДПМНЕ е најголемата елементарна непогода која било кога ја зафатила општина Прилеп“, изјави Бојан Цветаноски, претседател на ЛК СДММ-Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.