Македонија
(Видео) Николова: Скопје и Аеродром со ВМРО-ДПМНЕ го живеат најголемиот ужас од своето постоење

Скопје, а и општина Аеродром во последните години го живеат најголемиот ужас од своето постоење, само како резултат на кадровските решенија кои што ги понудија ВМРО-ДПМНЕ за град Скопје, Данела Арсовска и за Аеродром, Тимчо Муцунски и сега в.д градоначалникот во последните неколку месеци, истакна пратеничката на СДСМ Даниела Николова, на расправата на собраниската комсија за финансирање и буџет.
Николова нагласи дека кога ВМРО-ДПМНЕ ја презеде власта во касата на општина Аеродром имаше 240 милиони денари.
„Наместо овие средства како и потрошените три буџети во изминатите три години да се искористат за подобрување на квалитетот на живот во општина Аеродром, таа денес станува синоним за диви депонии, пожолтени паркови, руинирани детски и спортски игралишта, а едноставно Тимчо Муцунски, кој е актуелен министер за надворешни работи не успеа да реализира ниту еден проект од програмата која што тој ја вети пред граѓаните“, рече Николова, образложувајќи го поднесениот амандман со кој треба да се обезбедат 70 милиони денари, за изградба на кружен тек кај ОУ Блаже Конески, каде се спојуваат два булевари и три улици, односно три населби, Мичурин, Острово и Стар Аеродром, каде живеат над 20.000 жители.
Николова, наведе дел од неисполнетите ветувања на ВМРО-ДПМНЕ и Тимчо Муцунски во општина Аеродром, за кои доби поддршка од граѓаните во 2021 година.
„Се уште граѓаните од Аеродом чекаат четири нови градинки, кои тој им ги вети, а со вистинска голема радост и нетрпение го очекуваат паркот Радост, најавувањето беше поддржано и од Мицкоски, со кој сечеа ленти, бришеа маркици ама затоа денес таму може да се види неискосена трева, многу смет, тоа место почнува да се претвара во дива депонија. Радоста за паркот Радост се уште ја одржуваме, иако надежта полека ни умира“, рече Николова.
Таа додаде дека се уште се чека новата гимназија, новата општинска зграда, новиот мултифункционален центар со простории за младински центар, новиот спортски центар Пирин во наслебата Лисиче, Музејот на МЗТ, кино салата и театарската сцена во Ново Лисиче.
„Се уште чекаме еднократната помош за новороденчињата да се зголеми од 8 на 20.000 денари, се уште ја чекаме стратегијата за млади, стипендии за млади таленти во износ од 30.000 денари, како и завршување на сите постапки за легализација“, нагласи Николова.
Пратеничката Даниела Николова потсети дека СДСМ во буџетите издвои многу средства за Аеродром, и тоа за доградба на ОУ Блаже Конески 100 милиони денари, за нов објект Изворче, клон на градинката Срничка 70 милиони денари, за реконструкција на улиците Црноризец Храбар, Мите Богоевски Илија Димовски Гоче 60 милиони денари, за нов објект на полициската станица Аеродром 130 милиони денари, за реконструкција на дворот во училиштето Браќа Миладиновци, 2,6 мил денари, 700.000 денари за техничка документација за водоводна мрежа во Долно Лисиче, а граѓаните гледаат што успеаја да реализраа градоначалниците.
„Ги изманипулиравте граѓаните на најлош можен начин. Ветувавте Никогаш Северна, лажевте за Преспанскиот договор, за договорот со Бугарија, дека Мицкоски го болат колениците, па мора да патува со бизнис класа, дека ќе ги зголемите платите, ветувавте учебници, па сега препорачувате да се учи од серии. Лажевте дека ќе има ред во државата, сега граѓаните плаќаат да се земе невеста од Косово, обезбедувањето на спикерот на собранието вопоставува ред и ги дисциплинира безбедностите структури на аеродромот во Скопје, на раководна позиција го ставате бодигардот на Мицкоски, кој тепаше полицаец, кој бил на должност, лажевте дека сте големи патриоти, ама не ви пречеше да објавите фотографии од средбите во Бугарија каде нема макеонско знаме. Лажевте дека ќе бидете транспарентни а сите закони што ги донесовте во овој период се по скратена постапка, ете затоа граѓаните ви веруваа, ама не знам дали сега е баш така. Вашиот претседател предложи предвремени избори па после пола саат се премисли, тоа не е случајно“, порача кон пратениците од ВМРО-ДПМНЕ, пратеничката на СДСМ Даниела Николова, на расправата на собраниската комсија за финансирање и буџет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Концентрациите на ПМ 10 честичките во Трубарево во рамките на дозволените граници

Од Министерството за животна средина известуваат дека согласно индикативните мерења на суспендирани цврсти честички (PM10) на мерното место во Трубарево, спроведени во периодот од 21.09.2025 во 08:30 часот до 22.09.2025 во 08:30 часот, просечната концентрација изнесува 14.2 µg/m³.
„Највисоката измерена вредност е 44.1 µg/m³, додека моменталното ниво е 11.9 µg/m³“.
Резултатите, како што е соопштено покажуваат дека концентрациите на PM10 се во рамки на дозволените и не ја надминуваат 24-часовната гранична вредност пропишана за заштита на човековото здравје, согласно Уредбата за квалитет на амбиентниот воздух.
Македонија
„Влен“: Селотејп коалицијата Таравари-Села-Ахмети е најголемата политичка измама

„Селотејп коалицијата Таравари-Села-Ахмети е најјасната слика за политичка измама. Тие дури и не веруваат на зборовите што ги изговараат. Едниот држи митинг без другиот, вториот оди во Арачиново не за да го честита затворањето на каналот што го реализираше ВЛЕН, туку за да ги продаде истите теми што жителите ги слушаат 20 години. Лаги и измами!“, велат од „Влен“.
„Оваа коалиција се удира по гради за Албанците, но едниот е зафатен со тендерите на „Ѓоко Констракшен“, другиот за да ја спаси својата политичка кариера, додека последниот се труди да дојде на власт и да ги спаси членовите на своето семејство. Народот не е слеп и не јаде трева. Кога ги броеше тендерите и привилегиите, никој не и сметаше на Ахмети, дури ни Груевски или Мијалков.
Денес, без власт, се обидуваат да се претстават како патриоти. Но секоја општина што ја водеа е во хаос.Нивниот патриотизам е како празно тенџере прави многу врева, а внатре нема ништо.На 19 октомври, Албанците ќе го дадат заслужениот одговор“, соопштуваат од „Влен“.
Македонија
(Видео) Герасимовски пред преполните контејнери: Четири години нашите хигиеничари им ја вршат работата на Комунална хигиена

Градоначалникот на Центар Горан Герасимовски во обиколка на улиците, заедно со хигиеничарите на Центар, затекна контејнери опкружени со купишта ѓубре, известуваат од Општината. Од терен тој упати апел до Јавното претпријатие „Комунална хигиена“ редовно да го собира отпадот и да ја преземе својата законска обврска.
„Вака Комунална хигиена си ја завршува својата работа. Како изминативе години, така и денеска, и ова понеделничко утро, центарци се будат во ѓубре. Целата општина е полна со смет, нашите хигиеничари се постојано на терен, го сработуваат сето она што Комунална хигиена не го сработува изминативе години. И после овој мој апел, повторно ќе слушнеме демант на Јавното претпријатие дека навремено си ги завршуваат своите обврски, го собираат сметот од улиците, рече градоначалникот на Центар.
Во утринската акција, хигиеничарите на ПОЦ го расчистија просторот околу контејнерите. Герасимовски порача дека општина Центар ќе продолжи да работи во интерес на своите жители и кога тоа е надвор од ингеренциите. Најави нова опрема која ќе се набави во наредниот период, се наведува во соопштението.
„Нашите 120 хигиеничари цело време се на терен и ја завршуваат работата која е обврска на Јавното комунално претпријатие и за која граѓаните на Општина Центар ги плаќаат. Продолжуваме да си го чистиме Центар и да ја завршуваме работата на Јавното комунално претпријатие, продолжуваме и со она што го ветивме пред граѓаните – да купуваме дополнителна опрема. Во наредниот период се купуваат нови две цистерни за да се мијат улиците, но и нови метларки и камион кој ќе ни треба, бидејќи очигледно Комунална хигиена не си ја врши работата. Верувам дека после толку апели ќе се свестат и овој смет нема повеќе да го има на улиците на Центар“, рече градоначалникот Герасимовски.