Пратеничката на СДСМ, Сања Лукаревска во рамките на расправата на собраниската комисија за финансирање и буџет, посветена на предлог-буџетот за 2025 година истакна дека реториката на напад на власта полека оди кон одбрана, на моменти неосновано и безаргументирано.

„Мислев дека нема да се критикува претходната власт, а и не би личело кога зборуваме за нов буџет, нема веќе простор за обвинувања за некакви душмански трошења, несоодветна распределба на средства, фаворизирање на една или друга институција, па некогаш не одат во прилог бројките за споредба по било кој параметар, особено за јавниот долг, гломазноста и секако сè ќе пукне како балон, за што се милуваше овде долго и долго да се зборува претходните неколку години“, рече Лукаревска, и направи споредба со сите епитети коишто што беа давани изминатите години, кога се носеа буџетите.

Лукаревска истакна дека владата предводена од ВМРО-ДПМНЕ скрои буџет од 6,5 милијарди евра во услови кога претходната влада предводена од СДСМ ги санираше разорувачките последици од пандемиската криза, на која и се надоврза економската криза, војната во Украина, енергетската неизвесност, ценовните шокови и неминовната инфлација.

„Во целиот текст на буџетот провејуваат оптимистички проекции, но истите ако не се остварат ќе имаме влошување на фискалната консолидација во земјата. На пример се планира раст од 13,1% на приходи од данок на личен доход во 2025 во однос на планираните од минатата година, тоа тешко да се оствари во отсуство на овогодинешна даночна реформа затоа што слушнавме дека ќе имаме одреден напредок во 2026 година и во услови на инфлација и забавен раст на платите“, рече Лукаревска, додавајќи дека покрај ова има и даночни приходи, кои се планирани да растат уште и посериозно, како и раст на БДП од 3,7% во 2025, што исто така не го зема предвид забавувањето на економијата во еврозоната, посебно во Германија.

Лукаревска нагласи дека кај тековните расходи, најголем е растот масата на плати и социјални трансфери, капиталните расходи се зголемуваат повеќе од тековните расходи, што на прв поглед изгледа во ред, но треба да се постави прашањето колкав дел од тие плаќања ќе останат во македонската економија.

Нема средства за унапредување на здравствена заштита преку фондот за здравство, за поддршка на земјоделството средствата се намалуваат од 128 во 2024 на 117 милиони евра. Се намалуваат средствата за поддршка на развој на мали и средни претпријатија од 80 милиони денари на 18. Тие се двигателот во бизнис заедницата, а од друга страна за поддршка на странски инвестиции има 36 милиони евра, истакна Лукаревска, и констатираше дека оваа влада ги продолжува проектите, кои се осмислени, преговарани и договарани од претходната влада, како коридорите на Бехтел и Енка кои беа „криминален проект“, а сега се високо на агендата на проекти за реализација на новата влада.

Предлог Буџетот за 2025 точно ја дефинира политиката која има намера да ја тера оваа влада исклучиво за свои потреби, минимална грижа за граѓаните, максимална за себе, минимална реална посветеност и максимална пропаганда. Единствено што може да се заклучи од предложениот буџет за 2025 година е дека смело чекориме кон нови задолжувања, кои, кон крајот ќе стигнат за наплата кај секој граѓанин, без разлика на што и кој ќе го користи кредитот, каматата секако е наменета за граѓаните, порача пратеничката на СДСМ Сања Лукаревска.

Претседателот на градската организација на СДСМ, Ѓорѓи Галтеновски, упати критики до градската власт поради хаосот во јавниот превоз во Скопје.

Tој предупреди дека граѓаните се оставени на милост и немилост на лошото управување со ЈСП. „Граѓаните на Скопје мрзнат! Утрово се жалат дека повеќе од 40 минути чекале на автобусите со број 5 и 15. Ова е недозволиво,“ изјави Галтеновски. Тој посочи дека и покрај вчерашните уверувања од Град Скопје дека ЈСП ќе вози со полн капацитет, ситуацијата денеска била уште полоша. „ЈСП сè уште е без нафта.

„Претпријатието кое има проблем со автобуси и долгови, сè уште не обезбедило основни ресурси за нормално функционирање,“ додаде Галтеновски, пренесувајќи ја загриженоста на синдикатот на ЈСП, кој оваа состојба ја нарече „голем срам за градот“. Според Галтеновски, ваквото управување не е само прашање на некомпетентност, туку и на целосна негрижа за потребите на скопјани.

„Срам за Град Скопје и за оние што го водат. Градот не е приватна фирма за експериментирање. Ако градоначалничката и Советот не можат да ја завршат својата работа, време е да си заминат,“ истакна тој.

Претседателот на градската организација на СДСМ повика на итни мерки за решавање на проблемите во јавниот превоз.

„Потребно е итно решение за јавниот превоз на скопјани. Град Скопје заслужува подобро од ова,“ потенцира Галтеновски.

СДСМ апелира до градските власти да преземат одговорност и веднаш да ги обезбедат потребните ресурси за нормално функционирање на јавниот превоз, бидејќи трпението на граѓаните е на граница.

„Стратешките приоритети на Владата на ВМРО-ДПМНЕ при подготовка на Буџетот за 2025 година, се насочени кон одржување на макроекономската стабилност и одржување на стабилен и одржлив национален економски развој. Дополнително со ваквите инвестиции ќе се отворат нови работни места и ќе ја зголемат продуктивноста во долг рок, што ќе има позитивен ефект врз економскиот раст и животниот стандард на граѓаните“, изјави пратеничката на ВМРО-ДПМНЕ Биљана Кузманоска во своето излагање на денешната расправа за предлог-буџетот за 2025 година.

Кузманоска јасно даде до знаење дека веќе условите се променети. Посочи дека ВМРО-ДПМНЕ како одговорна партија секогаш е на страната на домаќинско и одговорно работење. Напомена дека партијата секогаш ќе биде верен партнер на граѓаните кои чесно работат и придонесуваат да изградиме квалитетно општество.

„Сега уловите се променија. Како одговорна партија, домаќинското работење е клучно за ВМРО-ДПМНЕ. Ние сме партија која ги почитува граѓаните кои со труд, работа и капитал се борат за поквалитетен живот“, децидна беше Кузманоска.

Апелираше СДСМ да започнат да поддржуваат и поздравуваат добри политики и да не се служат со деструктивни критики. Истакна дека време е зрело да се делува во интерес на граѓаните, користа да ја почувствуваат и уживаат и идните генерации.

„Затоа колеги од СДСМ време е да почнете да почитувате, потребно е да почнете да делувате, а не само да критикувате. Да дадеме можност, а притоа да ги користиме сите механизми што ни се на располагање за вршење на задачите и обврски кои ни ги доделиле граѓаните, за добробит на сите, во настојувањето да градиме подобра иднина и да ја развиваме нашата државата на сите полиња, за нашите и идните генерации“, заклучи Кузманоска.