Македонија
(Видео) Николовски: Итни мерки за спас на економијата
Македонија се соочува со сериозна ерозија на капацитетите за справување со најголемата криза што ја гледаат и Македонија и Европа во последните децении. Системот не функционира, а економијата пропаѓа. Но, она што функционира, за жал, се добрите пиар-алатки, порача потпретседателот на ВМРО-ДПМНЕ, Александар Николовски.
„Една недела гледаме пиар-алатки и појавување по трипати на ден со разни информации, но никаква активност. Една недела гледаме како си тераат сопствен пиар на грбот на граѓаните, а реалноста е дека ништо не функционира. Претседателот на државата самиот призна дека системот не може да издржи и дека ќе колабира. Па, јавно прашувам, затоа што не е негова работа да констатира состојби, туку да решава состојби што направил од моментот кога сфатил или добил информација дека системот на може да издржи до овој момент? Дали само констатира или решава проблеми? Тој од мај оваа година е претседател на државата, а не аналитичар и е избран на највисоката позиција во државата за да решава проблеми“, истакна Николовски.
Тој ги обвини министерката за одбрана, Шекеринска, и министерот за надворешни работи, Димитров, дека ловеле политички поени, а истовремено на првиот човек на МНР му се заглавени илјадници Македонци на аеродромите и граничните премини во Европа, а како што рече, Шекеринска говори за стандарди, а не е способна да организира едно прифатилиште во Пеплиште.
„Мерките не се доволно рестриктивни, тоа не го кажуваме ние, тоа го кажуваат Обединетите нации. Во согласност со јавно достапните електронски податоци од Обединетите нации, кои се собираат преку нивните надлежни агенции, Македонија е карактеризирана во земји што немаат јасни ограничувања во однос на приемот на лица од други држави. Регионално, нашата земја се вбројува во Централна Европа и за споредба со другите земји што имаат далеку поголеми рестрикции.
Одлуките за затворање гранични премини или на аеродромите доаѓаат по појавувањето случаи, одлуките за рестриктивно движење одредени групи категории доаѓаат само и кога ќе се појават одредени случаи, што значи дека државата доцни најмалку еден месец и се соочува со катастрофата што ја гледаме, а доколку не се преземат итни мерки, уште поголема катастрофа ќе гледаме во следниот период.
Затоа, ВМРО-ДПМНЕ бараше веднаш воведување кризна состојба, нешто што не го прифати СДСМ, со цел да може да ги носи законите, односно во согласност со Уставот – уредбите со законска сила, кои, верувајте, ќе бидат од корист на богатење на фамилијата на Зоран Заев, ќе видите какви уредби ќе се донесат со законска сила.
Во однос на економијата, на бизнисот итно му е потребна инјекција – пари и помош. Покрај угостителството, туризмот транспортот, сè повеќе ќе биде погодена и автомобилската индустрија затоа што најголем дел од странските и домашните капацитети што работат во Македонија се поврзани со автомобилската индустрија, а автомобилската индустрија веќе влегува во рецесија во Европа. Имаме веќе најави за огромни отпуштања работници, насекаде во Македонија, а за тоа Владата не презема ништо.
Затоа, предлагаме замрзнување на обврските на компаниите кон државата, чија работа е поврзана или е погодена со ситуацијата. Второ, замрзнување на обврските за компаниите кон банките и заемодавателите, најмалку за март, а доколку е потребно и кризата продолжи, и за април. Трето, Владата да ги преземе обврските да ги сторнира и да ги плати каматите по однос на кредитите на компаниите за март, а доколку продолжи кризата, и за април. Четврто, државата да ги плати трошоците за вработените во компаниите што се погодени во висина од 50 отсто од вкупниот трошок за вработените, односно 50 отсто од бруто-платата. И, конечно, последно, потребно е веднаш да се направи анализа на сè она што се случува во моментот, кои сектори и компании се погодени и да им се исплатат субвенции од страна на државата како би можеле да го преживеат овој период.
Смешни 5 милиони евра не ја решаваат состојбата. Државите околу нас одат со помош, која се брои во стотици милиони евра, дури и милијарди евра. Потребни се субвенции за најпогодените сектори.
Исто така, еден сектор, кој досега не беше споменуван, а е многу значаен, е транспортниот. Предлагаме да не се плаќа патарина за сите оние што вршат транспорт на патници и стока. Државата да ја преземе обврската за трошоците за регистрација на возилата, камионите и автобусите при следната регистрација. Поедноставено, транспортните компании да не ја платат следната регистрација кога ќе ги носат возилата на регистрирање. Трето, да се поделат субвенции за овие компании.
Ова не е битка за поени, ова прераснува во битка за опстанок на државата. Сè што ќе се става под тепих, ќе излезе, и тоа многу побргу од тоа што се очекува и тоа, за жал, овие денови.
Утрово добивме информација дека Министерството за финансии сака да издаде обврзница во висина од 400 милиони евра. Тоа задолжување оди, како што кажав, со врзан потпис поради техничката Влада. Ова е потврда дека на нашите очекувања што ги имавме и причините зошто сакавме да се воведе вонредна состојба, а не кризна. Ние сме спремни и ќе го поддржиме ова барање за еврообврзница, нема да бидеме како СДСМ, кој во 2005/2006 година кога исто така во услови на криза праќаше писма до директорите, па пораснаа каматите. Напротив, ние сме спремни да го поддржиме и ќе го поддржиме ова, но под еден услов – да се формира комитет кој ќе следи за што се трошат овие средства. Значи, потребно ни е транспарентно трошење на средствата“, заклучи Николовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Не е точно дека со ДУИ подготвуваме сценарио за бојкот на вториот круг на претседателските избори“, кажа Ковачевски
Претседателот на СДСМ, Димитар Ковачевски кажа дека не е точно дека подготвуваат со ДУИ сценарио за бојкот на вториот круг на претседателските избори на 8 мај.
„Тоа не е точно, јас вчера имав многу јасна порака на митинзите во Сарај и Чучер Сандево. Ги повикувам сите гласачи масовно да излезат на 8 мај и да ги поддржат претседателскиот кандидат Стево Пендаровски и коалицијата За европска иднина на парламентарните избори. Да избереме и претседател и парламентарен состав, Македонија да продолжи на својот пат на европските инетеграции“, рече Ковачесвки.
Тој кажа дека никој не ги има гласачите под своја контрола за да ги наведува како да гласаат.
„Ја примивме пораката во првиот круг за сите грешки кои ги направивме минатите седум години. Очекуваме да ја добиеме поддршката во вториот круг. Нормално е дека нашето членство го повикавме на изборите. Свесни сме дека граѓаните испратија јасна порака до СДСМ, дека граѓаните укажаа на грешките. Работевме во услови на голема пандемија, енергетска и економска криза предизвикани од војната во Украина. Свесен сум за нивото на инфлација и цените. Се обидовме да ги зголемиме и платите и пензиите секој да се справи на најдобар начин со оваа криза. Знам дека тоа не беше доволно, знам дека треба повеќе. Во новата програма имаме и зголемување на платите и на пензиите и секако многу јасни мерки во однос на владеење на правото и борбата против корупцијата“, кажа Ковачевски.
Тој очекува во вториот круг поддршка од сите граѓани во Македонија.
Ковачевски кажа дека Пендаровски е граѓански кандидат и ја бара поддршката од граѓаните, а не од претседателските кандидат коишто не се пласирале во вториот круг.
„Имаме разговори со политичките партии на различни нивоа и ги повикувам сите да имаме масовна излезност на 8 мај. Да избереме претседател на државата со којшто ќе имаме сигурна европска иднина и да избереме парламент што ќе носи храбри одлуки за државата, за да го дадеме на граѓаните она што го заслужуваат и очекуваат“, рече лидерот на СДСМ.
Тој додаде дека со крената глава продолжуваат во вториот круг и знае од што се незадоволни граѓните.
Македонија
(Видео) Стојаноска: Време е да се обединиме сите околу тоа повеќе да не функционираме како до сега
„Во текот на вчерашниот ден направивме анализа од резултатите од првиот изборен ден на претседателските избори и истото покажува дека голем број на нашите сограѓани Албанци, Турци, Роми и Бошњаци го имаат дадено својот глас за нашиот претседателски кандидат Гордана Силјановска Давкова“, рече Дафина Стојаноска, носител на изборна единица 6.
„Во име на тоа, од срце им се заблагодарувам на сите мои сограѓани и ги повикувам истото да го направат да го направат и во вториот круг имено ВМРО-ДПМНЕ подава рака кон сите, време е, момент е да се обединиме сите околу тоа повеќе да не функционираме како до сега, туку да вложиме да инвестираме во вистинска слобода, вистинска благосостојба и вистински соживот особено за нас особено во шестата изборна единица. Време е заедно да се спротивставиме на криминалот и Македонија да ја направиме своја и горда“, изјави Дафина Стојаноска, носител на изборна единица 6.
Македонија
„Алкалоид“ добитник на „Патент на годината за 2023“ за иновативниот „Омепразол“ во течна форма
Иновативната формулација на „Алкалоид“ АД за лекот со додадена вредност „Омепразол“ во течна форма, готов за употреба, прва од ваков тип во светски рамки, е прогласена за „Патент на годината за 2023“ од Државниот завод за индустриска сопственост, во рамките на пригодното одбележување на Светскиот ден на интелектуалната сопственост – 26 април.
Меѓународната патентна пријава на „Алкалоид“ за „Oмепразол“ во течна форма беше поднесена на 17 април 2020 година, со опфат на голем број региони и земји, меѓу кои земјите од Европската Унија, САД, Канада, Кина, земјите од Евроазиската економска унија и други. Патентната пријава при Европскиот завод за патенти, чии ингеренции опфаќаат патентни активности во 39 земји во Европа, беше одобрена на 3 август минатата година и валидирана во триесетина земји, меѓу кои и Македонија.
Патентот на „Алкалоид“ АД ја заштитува течната фармацевтска дозна форма на „Омепразол“, која се базира на два посебни раствори содржани во двокоморско пакување, кое при отворањето автоматски ги меша двата раствора и така се добива готовиот течен омперазол за употреба. Овој препарат е наменет, пред сѐ, за третман на рефлуксен езофагитис и на гастроезофагеалната рефлуксна болест (ГЕРБ) кај малите деца кои не можат да голтаат таблети, како и кај возрасните пациенти кои имаат тешкотии со голтањето (пациети со дисфагија) и неможност за голтање (пациенти со поставени сонди за гастрично хранење и/или геријатриски пациенти).
Државниот завод за индустриска сопственост е основан на 1 декември 1993 година како самостоен орган на државната управа и е надлежен за вршење на работите во врска со стекнувањето и со заштитата на правата од индустриска сопственост кои опфаќаат патенти, индустриски дизајни, трговски марки и ознаки за потеклото на производите. Оваа институција триесетта година по ред традиционално организира активности во насока на афирмација на улогата на индустриската сопственост во поттикнувањето иновации и креативни творби.
ПР