Потпретседателот на ВМРО-ДПМНЕ, Александар Николовски, истакна дека на денешното рочиште за „Рекет“ се потврдило она што тој го тврдел пред неколку месеци – дека еден амбасадор од земја членка на ЕУ реагирал кај министерот Димитров затоа што почесниот конзул на таа држава бил рекетиран од Бојан Јовановски и други лица поврзани со него, со синот на Катица Јанева и други.

„Драго ми е што вистината излегува на виделина, знаете дека Зоран Заев се закани дека ќе ме тужи за клевета за случајот ‘Рекет’. Јас пред неколку месеци на телевизиско соочување, односно дебата со министерот за надворешни работи, Никола Димитров, реков дека еден амбасадор од земја членка на ЕУ реагирал кај министерот за надворешни работи затоа што почесниот конзул на таа држава, за која еве сега е познато името, бил рекетиран од Бојан Јовановски и други лица поврзани со него, синот на Катица Јанева и други. Тоа тогаш беше најостро демантирано од Никола Димитров дека таква работа немало, дека тоа било лага и така натаму. Но, пред вистината и боговите молчат. Еве, по неколку месеци, во судска постапка се потврдува дека Никола Димитров знаел за рекетот и не пријавувал затоа што тоа е кривично дело и би сакал да го повикам ЈО и сите други органи да го повикаат Никола Димитров и да го прашаат зошто не пријавил и соодветно да спроведат кривична постапка против него затоа што затскривање или непријавување кривично дело е исто така кривично дело. Очекувам првин министерот за надворешни работи да поднесе оставка и потоа кривично да одговара поради тоа што не го пријавил случајот ‘Рекет’“, рече Николовски.

Тој смета дека во судовите има два типа на случаи, едните што одат многу бавно и други што одат многу бргу.

„Во едните или судијата заборава да закаже рочиште по 90 дена, па почнуваат од почеток или вака се донесуваат ослободителни пресуди, а другите гледаме одат по 12 часа на ден, па преспиваат луѓето, па продолжуваат утредента. Во првите има договор со Зоран Заев, во вторите нема договор со Зоран Заев. Јас зборував уште минатата година дека постои криминална коалиција, таа криминална коалиција ја гледаме на дело. Интересно е што пред оваа судска одлука имаше изјави на еден од сега веќе ослободените во однос на тоа дека Албанците треба да гласаат директно за СДСМ, а исто така е интересно што еден од членовите на Судскиот совет е сопруга на висок функционер на СДСМ, што само потврдува дека се работи за потврда на криминалната коалиција за која ние зборуваме повеќе од една и пол година, која, за жал, функционира во државата, ја разјадува државата, го разјадува судството и го разјадува владеењето на правото“, вели Николовски.