Македонија
(Видео) Николовски: Со развој на земјоделските задруги до поголеми економски и социјални придобивки

Министерот за земјоделство, шумарство и водостопанство, Љупчо Николовски, денеска ја отвори 3. сесија на работната група за земјоделство и рурален развој организиранa од Националната конвенција за Европска Унија во Република Македонија.
Фокус на денешната конференција беа земјоделските задруги, бенефитот за вкупното земјоделство од здружувањето и мерките што Владата ги презема во оваа насока.
„Наша цел е да поттикнеме модернизација на македонското земјоделство и зголемување на неговата конкурентност. Со развојот на земјоделските задруги го постигнуваме токму тоа. Овозможуваме здружување на земјоделските производители, со што им следуваат многубројни економски и социјални придобивки. Ова е значаен проект за македонското земјоделство бидејќи со развојот на земјоделските задруги следуваат многубројни економски и социјални придобивки за земјоделците“, изјави министерот Николовски.
Преку здружувањето во задруги земјоделците може полесно да аплицираат за финансиска поддршка преку програмите на МЗШВ наменети за земјоделство и рурален развој, како и друг вид поддршка што им е достапна на земјоделските задруги преку инструментот за претпристапна помош на ЕУ за рурален развој, односно ИПАРД-програмата.
Во оваа насока во тек е и реализацијата на проектот „Поддршка за развој на земјоделските задруги во Република Македонија“ финансиран од инструментот за претпристапната помош на Европската Унија, кој почна во декември 2017 година и ќе трае 4 години. Тој предвидува директна техничка и финансиска поддршка во вид на грантови на 8 постојни и 12 новоформирани задруги, како и поддршка на МЗШВ во однос на подобрување на постојната законска регулатива, со која се регулира функционирањето на земјоделски задруги, информираа од МЗШВ по завршувањето на сесијата.
Досега беа објавени два јавни повика на кој пристигнаа 51 апликација. Од нив 20 апликации се од постојните задруги, а 31 апликација се за формирање нови задруги, велат од Министерството.
„Сите тие ќе добијат техничка помош и помош за изготвување бизнис-планови. Во периодот што следува ќе се објави уште еден повик на кој од сегашните пристигнати апликации ќе се изберат 12 нови и 8 постојни задруги кои ќе добијат финансиска поддршка. Просечната сума на грантовите ќе изнесува 50.000 евра, а максималната 80.000 евра, со 20 отсто кофинансирање“, стои во соопштението.
Исто така, оттаму додаваат дека првпат по 5 години, се реализира мерката 131 – економско здружување на земјоделски стопанства за заедничко вршење земјоделска дејност во рамките на Националната програма за рурален развој за 2018 година. Оваа мерка опфаќа неколку подмерки и видови поддршка, со што дополнително ќе се поттикне формирањето земјоделски задруги и нивно функционирање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце и Богородица времето на чекање за влез во државата е околу 1 час

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини Табановце и Богородица времето на чекање за влез во државата изнесува околу 1 час. На останатите гранични премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Претпладне сончево, попладне наместа нестабилно со локален дожд и грмежи

Претпладне сончево со умерена облачност. Попладне наместа ќе биде нестабилно со локален дожд и грмежи. Ќе дува слаб до умерен ветер од југоисточен правец. Минималната температура ќе биде во интервал од 6 до 12, а максималната ќе достигне од 19 до 26 степени.
Во Скопје, сончево со умерена облачност и со слаб до умерен југоисточен ветер. Попладне во делови од котлината ќе има развој на нестабилна облачност со услови за пороен дожд и грмежи. Минималната температура ќе се спушти до 8, а максималната ќе достигне до 26 степени.
Времето во наредните денови
Од среда на повеќе места ќе биде нестабилно со повремени врнежи од дожд, локално поројни, проследени со грмежи. Дневната температура ќе биде во постепено благо опаѓање.
Македонија
Карпош, Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
· Oд 08:00 до 16:00 часот, дел од корисниците во Стопански Двор. (Општина Ѓорче Петров);
· Oд 09:00 до 13:00 часот,ул.24 с.Сопиште КАЈ ИЦЕ МАК (Општина Сопиште);
· Oд 09:00 до 14:00 часот, дел од корисниците на ул.Ванчо Мицков,во Долно Нерези (Општина Карпош) ;
· Oд 10:00 до 14:30 часот, дел од потрошувачите на ул.Женевска (Општина Карпош).