Македонија
(Видео) Николов: По изиграните ора во Штип, Филипче и Заев го исмеваат народот со нови мерки

„Заев и Филипче глумат загриженост, наводно прифаќаат некакви мерки, но во исто време на корона-изборите тераат оро и слават во кафеана. Додека пациентите не може да се обезбедат со инсулинска и антикоагулантна терапија, додека се соочуваме со инсулинска криза во државата, тие народот го лажат и го замајуваат дека имало мерки и дека се преземаат нови. Во најмала рака ова е навреда за граѓаните и навреда за болните“, изјави Игор Николов, претседател на Комисија за здравство на ВМРО-ДПМНЕ.
Според него, наместо да се слушне струката во врска со пандемијата на Ковид-19, таа се користи како параван за неспроведување на мерките, а се слушаат пиар-претставите на Филипче и на Заев. Комисијата за заразни болести не е ништо друго, туку еден обичен параван.
„Кога веќе објавуваат мерки, потребно е Комисијата за заразни болести да ги каже епидемиолошките цели поради кои се предлагаат тие мерки, во исто време треба да се објави и објасни кога се планираат тие цели да бидат остварени. Во спротивно, сè што прават Комисијата и Филипче претставува еден обичен пиар. Треба да се одговори зошто досегашните мерки што ги имавме, наместо резултати, дадоа пролонгирана агонија. Ги навикнаа граѓаните на 20, 30,, па и 40 починати во текот на денот, во текот на 24 часа. Ги навикнаа граѓаните на 30-35 % позитивни од вкупно тестирани во 24 часа.
Здравството се претвори во ковид-здравство. Последна клиника што станува ковид-клиника е Клиниката за трауматологија, а наверојатно со оваа динамика и со овие мерки-немерки набргу и целата зграда на Хирургија ќе стане ковид во кампусот клиники „Мајка Тереза“. И наместо претворање на целокупното здравство во ковид-здравство и лекување само една дијагноза, требаше да се загрижат и да ги згрижат другите пациенти, другите заболувања и другите дијагнози. Наместо мерки за бенефит на граѓаните, денес се носат задоцнети мерки, кои нема да променат ништо. Заболените од Ковид-19 плаќаат само 4.000 денари за да обезбедат антикоагулантна терапија, која не може да се купи ниту на приватно. За овие граѓани се потребни субвенции.
Наместо 3-4 карантин-викенди, како што предлагаа експертите епидемиолози претходно, со цел да се стави епидемијата под контрола, денес повторно се предлагаат мерки-немерки, кои тешко дека ќе дадат видливи резултати, ниту се објавува кога овие резултати ќе ги видиме. Наместо промена на протоколите од примарно до терциерно ниво и нивна дистрибуција до целокупниот медицински и немедицински персонал, се одвлекува вниманието со некакви мерки за порано затворање на рестораните и кафулињата. Наместо мапирање на целокупниот медицински персонал за да се види неговата расположливост за да биде вклучен во битката со Ковид-19, јавноста се замајува со некакво наградување на медицинарите што биле на првата линија на борба со короната, а за таквото наградување ниту имаше и ниту има трага и глас. Наместо одговорност, лагите и пиарот бесрамно продолжуваат. Потребна е или да се промени и професионализира Комисијата за заразни болести или одговорност на Заев и Филипче“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.