Претседателот на Сојузот на синдикатите на Македонија (ССМ), Слободан Трендафилов, е подготвен една година тој и сите избрани и именувани лица за земаат плата од 500 евра доколку веднаш во Собранието се изгласа измена со која и минималната ќе се зголеми на 500 евра. Предлогот Трендафилов го даде како одговор на нападите дека синдикалните лидери од ССМ земаат високи плати на грбот на работниците.

„Јас како претседател на ССМ им подавам рака на сите избрани и именувани лица во Македонија, 1.080 мислам дека беа на број, од утре мојата и нивната плата да ни биде 500 евра, но заедно да изгласаат закон за измени и дополнувања на Законот за минималната плата и работниците да добијат 500 евра минимална плата. Јас и тие една година ќе примаме минимална плата од 500 евра и немам никаков проблем со тоа. Ги повикувам следниот пат текстот што ќе го внесат во идиотот и кога ќе читаат од него да прочитаат дека тие се согласни цела Влада, цел парламент, сите избрани и именувани лица, директори, шефови, раководители и што ли уште не, кои се ‘ухлебани’ на државна сметка цел живот, да примаме 500 евра минимална плата колку што ќе примаат речиси 200.000 работници во Македонија“, рече Трендафилов.

Особено се обрати до пратеникот Бране Петрушевски од ВМРО-ДПМНЕ, кој на прес-конференции зборува за платата на синдикалните претставници и побара исправка.

„Го повикувам од неговата плата да ми даде дел за да ми ги надополни овие 15.000 денари што ги немам и секој месец да имам 75.000 денари за да не лаже“, рече Трендафилов, кој објасни дека неговата плата е 60.000 денари, обезбедени од членарината на работниците во синдикатите, и нагласи дека на ист начин ќе се борел за минимална плата од 500 евра и кога неговата би изнесувала 300.000 денари.

ССМ извести дека протестот закажан за утре, кој ќе претставува јавна седница на највисоките синдикални тела, ќе почне во 12.05 часот. На улица ќе излезат 300 члена на највисокото раководство на ССМ, а добредојдени се и работниците.

„Јавната седница ќе биде отворена пред ССМ и ќе продолжи пред парламентот, каде што ќе им порачаме на пратениците дека не може да има за пратениците, а да нема за работниците. Ќе продолжиме пред Стопанската комора, каде што ќе порачаме дека подадената рака од работникот денес може многу лесно да стане стисната тупаница утре. Ќе завршиме пред Владата, каде што ќе им порачаме на владините функционери дека не може да се одлучува за работниците беа работниците“, најави претседателот на ССМ, Трендафилов.

Преку утрешната јавна седница ССМ сака да го изрази незадоволството од политиките што ги води Владата за кои сметаат дека се во погрешна насока и на штета на работниците. Барањата се 500 евра минимална плата и зголемување 100 евра на сите други плати.

Оваа Влада и ДПМНЕ се очигледно сериозно вмешани во криминал а лица од најголема доверба на премиерот во континуитет се во комуникација со подземните нарко кланови. Имаме сериозни причини да прашаме: Дали сме сведоци на целосна криминализација на ВМРО-ДПМНЕ и Владата предводена од Христијан Мицкоски, прашува Миле Талески, пратеник од СДСМ.

Фактите, како што вели се загрижувачки и алармантни.

„Ангел Самараков, човек од најтесното обезбедување на премиерот Мицкоски, е фатен како оддава доверливи информации на лица од скопската населба Грчец – средина добро позната по активностите на организираниот криминал. Самараков не е случаен „обезбедувач“ кој се нашол до премиерот. Тој е лојален партиски кадар на ВМРО-ДПМНЕ. Неговата сопруга е вработена во Општина Велес и беше кандидат за советник на локалните избори – исто така од редовите на ВМРО-ДПМНЕ. Ова значи дека се работи за човек од најблискиот круг на доверба на Мицкоски. А ова не е изолиран случај“.

Според него, пред само неколку месеци, шефот на обезбедувањето на премиерот, нападнал полицаец кој бил на должност за време на акција за борба против дрога. Се обидел да ја спречи полицијата во претрес во скопски локал, случај за кој јавноста дозна, како што вели, само откако медиумите го обзнанија па не можеше да се крие.

„Два инцидента, двајца блиски луѓе до Мицкоски и два обиди од МВР да се прикрие скандалот. Два пати вистината излезе на виделина само благодарение на медиумски притисок“.

Од неговата партија прашуваат зошто луѓето од доверба на премиерот имаат соработка со подземјето.

„Дали ова е случајна состојба или организирана шема? Дали веќе не зборуваме за Влада, туку за структура длабоко поврзана со криминални мрежи? И клучното прашање: Како обезбедувачот имал такви документи, кој му ги дал доверливите информации? Кој друг е вклучен во скандалот од МВР? Само една година откако ВМРО-ДПМНЕ ја презеде власта, државата се соочува со бранот најсериозни криминални инциденти и улични пресметки во последната деценија“, констатира тој.

Според Талески, дали државата ја води Владата, или криминалното подземје преку луѓето на Мицкоски

Ова, оценува, не е политички напад туку аларм.

„Ако премиерот на една држава се опкружува со луѓе кои ја саботираат полицијата и им пренесуваат тајни на криминалци – тогаш прашањето е: кој навистина ја води државата?“

СДСМ бара итна и целосна истрага. Бараат политичка и институционална одговорност и граѓаните да знаат што се случува зад затворените врати на оваа власт.

„Ова не е борба за власт. Ова е борба за каква држава ќе бидеме – правна и безбедна, или заробена од мафијата“, напоменува Талески.

За жал, пратениците од владејачкото мнозинство, составено од ДПМНЕ-ВРЕДИ-ЗНАМ, продолжуваат со нивната арогантност игнорирајќи ги потребите и барањата на граѓаните. На денешната седница на Собранието се најдоа два Предлог-закони на пратеничката група на Левица со кои беше предвидено зголемување на породилното отсуство од 9 на 18 месеци и исплаќање на платите на работниците до петти наредниот месец наместо до петнаесетти, велат од партијата.

Пратеникот од Левица, Амар Мециновиќ, го образложи Предлог-законот за дуплирање на породилното отсуство потенцирајќи дека ваквото законско решение одговара и на левиот и на десниот политички кампус, односно, како што кажа, вградена е вредноста за социјалните права и семејните вредности. Тој истакна дека обединувачка е националната потреба која е од корист за целата држава.

„Во 2016 имало граѓанска иницијатива за вакви законски измени, па во 2017 пратеничката група на ВМРО-ДПМНЕ предложила вакви законски измени кои тогаш не добиле поддршка од тогашното мнозинство“ – потсети пратеникот од Левица.

Мециновиќ истакна дека овој предлог во однос на мајчинството е само почеток, а треба да се адресираат и други неразумни сегменти какви што се: условот за непрекинат работен однос од 6 месеци, губењето на работното место и со тоа – ограничување на породилното отсуство и слично.

Владејачкото мнозинство не го прифати ниту предлогот за исплата на платата на работниците до 5-ти во месецот, а овој Предлог-закон го образложи пратеникот од Левица, Сашко Јанчев.

„Ако може за нас, пратениците, платата да се исплаќа до петти во месецот – тогаш треба и за сите останати кои нѐ избрале да им се исплаќа до петти“ – истакна тој.

Јанчев посочи дека сегашното правило за исплаќање на платите на работниците до 15-ти во месецот ги става во особено тешка ситуација граѓаните коишто треба да исплаќаат рати од кредитите, да плаќаат кирија и да ги платат месечните сметки.