Македонија
(Видео) Новинарите бесни на Мицкоски: Да го смени односот и да не се однесува како Груевски
Лидер на опозиција кој претендира да стане премиер бара тв-дуел и обвинува за брутална кампања на медиумите, а нема храброст ниту доблест да се соочи со новинарите – ова се само дел од пораките упатени кон претседателот на ВМРО-ДПМНЕ, Христијан Мицкоски, кој одби да одговори на новинарските прашања на синоќешната прес-конференција. Дел од новинарите кои до доцна во ноќта беа присутни во партиското седиште реагираат дека Мицкоски со ова покажа комплетно непочитување кон новинарската фела и дека само ја продолжува праксата на претходното раководство на партијата – затворено за јавноста и исплашено да се соочи со претходно ненајавени прашања.
„Односот на Мицкоски е сличен со неговиот претходник, комплетно непочитување, став дека медиумите се под нивна контрола и се во нивна функција, како во годините кога беа на власт, кога ги контролираа и финансираа со буџетски пари, тоа е базично непочитување и комплетно некоректен однос. Мицкоски не се дистанцира од тоа како Груевски се однесуваше кон медиумите, и тоа е поразително. Факт е дека ние имаме обврска да го пренесеме ставот на најголемата опозициска партија, но на крајот на тоа целодневно малтретирање кулминацијата беше некаде пред полноќ кога прес-конференцијата траеше непријатно долго повеќе од 20 минути, а Мицкоски не најде сила да се соочи со медиумите и не остави простор за прашања. Па до кога ние ќе треба да глумиме инки, обични проводници само на ставовите на партијата“, вели новинарката Милка Смилевска.
Со сличен став е и новинарот Горан Трпеноски, кој смета дека ВМРО-ДПМНЕ треба да ја научи лекцијата од минатото и новиот лидер Мицкоски треба да почне да го менува односот кон медиумите, бидејќи новинарите не му се непријатели.
„Како лидер на најголемата опозициска партија ВМРО-ДПМНЕ, Христијан Мицкоски мора да има и став и да го почитува времето на новинарите. Лидер кој претендира за премиер, кој треба да води 4000 илјади граѓани треба да има чувство за медиумите, без разлика кој како известува. Да не бевме ние, новинарит,е таму, да го бојкотиравме, тој немаше да ја испрати својата порака. Вели дека медиумите имаат брутална кампања, бара дуел, а нема став. Мора да се одвикнат од минатото, да ги избегнуваат новинарите, да не одговараат на новинарски прашања, да нè држат со часови. Засега, се чини, ја немааат научено лекцијата. Се надевеам дека и Мицкоски и ВМРО-ДПМНЕ ќе ја сменат стратегијата, новинарите не им се непријатели, новинарите многу претрпеа претходно, имаше притисоци, јавувања, повеќе од илјада без работа, ние мора да видиме дека ова не е старото ВМРО-ДПМНЕ. Ако сакаат да се модернизираат, нека градат мостови со новинарите, ние не сме им непритјатели“, вели Трпеноски.
На вчерашната прес-конференција, која се одржа еден час пред полноќ, по завршувањето на Централниот комитет на ВМРО-ДПМНЕ Мицкоски одржа говор од 18 минути на кој меѓу другото кажа дека ќе остават граѓаните по сопствено убедување да одлучат за референдумот. Откако го исчита напишаниот говор, Мицкоски замина од говорницата со образложение дека прес-конференцијата била обемна и дека во наредните денови ќе одговори на новинарските прашања. Денеска Мицкоски, далеку од новинарите и медиумите, напиша статус на „Фејсбук“ дека неговото мислење за бојкотот ќе го каже на крајот на евентуалниот тв-дуел со премиерот Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Божиновска: Кога жените водат, енергетиката свети посилно – не чекајте дозвола, заземете го вашето место
Инклузивната и праведна зелена енергетска транзиција е невозможна без еднакво учество на жените. Тоа беше пораката што силно одекна на сесијата „Жени во енергетиката“, одржана во рамки на 14. Меѓународен форум за енергија и одржлив развој (IFESD-14) во Скопје.
Министерката за енергетика, рударство и минерални суровини, Сања Божиновска, во инспиративно обраќање ја отвори сесијата со порака дека без родова еднаквост, нема вистински напредок во енергетскиот сектор.
„Живееме во пресуден момент. Глобалната енергетска транзиција ги менува економиите, индустриите и општествата. А овде, на Западен Балкан, ние не сме само следбеници на тие промени — ние сме дел од оние што ги водат. Македонија е горда што е дел од оваа трансформација: инвестираме во обновлива енергија, ја зајакнуваме регионалната соработка и се грижиме нашата транзиција да биде одржлива и праведна“, рече Божиновска.
Министерката истакна дека овој процес нема да биде целосен доколку не е инклузивен. „Напредок кој ги остава жените зад себе – не е вистински напредок. Предолго, енергетиката – од инженерство до лидерство – се сметаше за ‘машки свет’. Но, ние секојдневно докажуваме дека тоа веќе не е така. Кога жените водат, енергетиката станува поумна, поправедна и похумана“, нагласи таа.
Податоците, како што потсети Божиновска, го потврдуваат тоа: „Според Меѓународната агенција за обновлива енергија (IRENA), организациите со повеќе жени на лидерски позиции во енергетиката имаат и до 20% повисоки перформанси и иновации. Светскиот економски форум покажува дека родово разновидните тимови се покреативни, попрофитабилни и поотпорни во кризи. Кога жените се оснажени, целиот сектор — и целото општество — добиваат.“
Во еден од најемотивните делови од говорот, министерката се обрати директно до младите жени:
„Не чекајте дозвола за да водите – заземете го вашето место. Не ги замолчувајте вашите идеи – кажете ги смело. Не се сомневајте во вашата сила – посилни сте отколку што мислите.
А до мажите – и вие сте ни потребни. Вистинскиот напредок се случува кога стоиме рамо до рамо, како сојузници, работејќи за истата визија за еднаквост и напредок.“
Во своето обраќање, министерката сподели и лично искуство:
„Како жена во енергетиката, знам дека патот не беше секогаш лесен. Многу од нас мораа да се борат за своето место на масата и да докажат дека компетентноста нема пол. Но секоја пречка што ја рушиме – отвора пат за друга жена да се издигне.“
Таа подвлече дека како министерка поставила јасна мисија – да ја смени перцепцијата дека енергетиката е машки свет.
„Организирам настани и менторски програми за студентки од техничките факултети, за да видат дека нивната иднина може да биде токму овде – во енергија, технологија и лидерство. Работам со жени од рударството и индустријата, чии резултати често остануваат невидливи, но се клучни за нашите успеси.“
Божиновска додаде дека Министерството за енергетика денес е меѓу најродово-избалансираните институции во земјата. „Имаме повеќе жени од мажи и многу од клучните сектори ги водат силни, стручни и одлучни жени. Тие се жив доказ дека компетентноста нема пол,“ рече министерката, додавајќи дека е особено горда што ја претставува Македонија како амбасадорка на WOBA – Women on Board Adria, регионална мрежа што ги поврзува и поддржува жените лидери во Адриатскиот регион.
„Преку WOBA работам за да им отворам врати на жените во одборите и носењето одлуки, за да ги зајакнеме нивните лидерски улоги и да обезбедиме нивниот глас не само да се слуша, туку и да се вреднува. Верувам дека жените заслужуваат повеќе – повеќе можности, повеќе признание, повеќе лидерство. Но исто така верувам дека мора да се избориме за тоа. Рамноправноста не е услуга, тоа е право што мора да го бараме, браниме и градиме – заедно.“
Божиновска го заврши обраќањето со цитат од Маргарет Тачер:
„Ако сакате нешто да се каже – прашајте маж; ако сакате нешто да се направи – прашајте жена.“ „Да бидеме тие жени што прават работи – што водат, инспирираат и создаваат енергетска иднина во која светлината свети посилно за сите.“
Во рамките на сесијата, претставничката на УНДП, Ана Чернишова, потсети дека учеството на жените во енергетската транзиција сè уште е ограничено, главно поради структурата на пазарот на труд и секторската сегрегација.
„Техничката експертиза и носењето одлуки во секторите на енергија и климатски промени се доминантно концентрирани кај мажите. Ова укажува на потребата од таргетирани политики за зголемена родова рамноправност во зелената транзиција,“ истакна Чернишова.
Таа додаде дека преку Програмата за зелен финансиски инструмент, УНДП приоритизира инвестиции во жени претприемачи и домаќинства каде што жените се носители на приходот. Досега се поддржани речиси 8,5 милиони долари инвестиции во решенија за чиста енергија.
Панелистите на сесијата заклучија дека иднината на енергетиката е инклузивна, фер и визионерска — со подеднакво место за сите што ја движат напред.
Македонија
Герасимовски го посети штандот на ЈП „Паркинзи на Општина Центар“: Информативни табли со QR-код за брзо плаќање
Градоначалникот на Општина Центар, Горан Герасимовски, денеска го посети штандот на ЈП „Паркинзи на Општина Центар“, каде што заедно со директорот Душко Коцевски разговараа за новите услуги и иновации во системот за паркирање.
Коцевски го информираше Герасимовски дека на новите информативни табли на ПОЦ е поставен QR-код со директен линк, што овозможува едноставно и брзо плаќање на паркинг услугата со платежна картичка, без потреба од регистрација или испраќање SMS порака.
„Одличен потег на ЈП ПОЦ за модернизација и поефикасно паркирање во општината. Ги следиме модерните трендови за побрзи и електронски достапни услуги со кои корисниците ќе можат полесно и поедноставно да ги користат услугите“, истакна Герасимовски.
На информативниот штанд беа промовирани и нови типови паркинг-карти достапни на веб-страницата www.poc.mk, како што се мултинеделната карта и гостинските паркинг-карти, кои нудат поголема флексибилност и ефикасност при користење на паркинзите во општина Центар.
Македонија
Минчев-Сулстром: Целта е да изградиме јавна администрација која е сервис на граѓаните, професионална, транспарентна и насочена кон резултати
Министерот за јавна администрација, Горан Минчев, денеска оствари протоколарна средба со амбасадорот на Кралството Шведска во Република Македонија, Ола Сулстром. На средбата, Минчев и Сулстром разговараа за можностите за продлабочување на соработката меѓу двете земји во областа на јавната администрација и зајакнувањето на институционалните капацитети.
Министерот изрази благодарност за континуираната поддршка на Кралството Шведска во реформските процеси и потенцира дека овие партнерства се од суштинско значење за унапредување на квалитетот на јавните услуги и институционалната ефикасност.
„Нашата цел е да изградиме јавна администрација која е сервис на граѓаните, професионална, транспарентна и насочена кон резултати. Поддршката од нашите меѓународни партнери, како што е Шведска, е од големо значење во овој процес на модернизација и институционална зрелост“ изјави Минчев.
На средбата беше изразена заедничка подготвеност за понатамошна соработка, размена на искуства и спроведување на заеднички проекти во областите на модернизација на јавниот сектор, управувањето со човечките ресурси, транспарентноста, отчетноста и примена на добри европски практики.
Министерството за јавна администрација, велат од таму, ќе продолжи активно да работи на воспоставување и јакнење на партнерства со земјите членки на Европската Унија, со цел приближување на стандардите и вредностите на европското управување.

