Ноќеска околу полноќ багери и камиони влегуваа на новото градилиште за деветкатница кај „Мајчин дом“ за која аеродромци сметаат дека е еколошка катастрофа. Жителите од околните згради вознемирени од полноќните активности алармираа на социјалните мрежи за уништувањето на зеленилото, а утрово веќе се гледа ископ за новата зграда. Неколку багери и сега копаат покрај „Мајчин дом“ во Аеродорм.

Аеродромци, организирани на социјалните мрежи, бараат оставка од градоначалникот , а за попладнево во 17 часот најавуваат протест пред „Мајчин дом“ за спас на зеленилото.

„Златко Марин веднаш да се повлече од функцијата затоа што не успеа да го исполни ветувањето што им го даде на аеродромци“, напишаа од иницијативата „Сакаме Аеродром да дише“.

На ист начин како што ВМРО-ДПМНЕ градеше споменици – ноќе, СДСМ гради згради, коментираа аеродромци. Имаше повици да излезат и да застанат пред багерите за да не се дозволи да почне изградбата, но сè остана на социјалните мрежи.

Неколку багери и утрово копаат покрај „Мајчин дом“ во Аеродорм

Стопирањето токму на овој објект и поништување на планот со кој е предвиден беше главен адут во изборната кампања на сегашниот градоначалник на Аеродром, Златко Марин. Тој како опозиционер што се бори за градоначалничка функција на претходниот градоначалник му предлагаше решенија, како обесштетување на сопствениците на земјиштето со пари или компензација со земјиште на друга локација за да го заштити просторот од дополнително градење и да ги послуша граѓаните. Кога стана градоначалник, не само што самиот не ги премиени советите што му ги даваше на претходникот туку го смени и мислењето и во неколку наврати се оправдуваше дека не може ништо да преземе за да ја спречи градбата.

Градоначалникот Марин сега вели дека се исцрпени сите правни можности за стопирање на планот и му издале одобрение за градење на инвеститорот оти детаљниот урбанистички план И 10 е сè уште во сила.

На прашањето од „Макфакс“ дали никнувањето на овој објект, меѓу другото, градоначалникот го доживува и како личен неуспех поради тоа што бришењето на оваа зграда беше еден од главните адути во неговата изборна кампања, од Аеродром велат: „Претходното раководство предводено од ВМРО-ДПМНЕ на Општина Аеродром ѝ го донесе ДУП И10 ненајавено и без дебата. Ваквото постапување предизвика бурни реакции во јавноста, а градоначалникот Марин лично ги поддржа жителите на Аеродром во борбата против пренамена на земјиштето пред „Мајчин дом“ од зона Д1 во зона А2 (станбено домување). Неговиот став за ова прашање останува непроменет, меѓутоа, како што веќе нагласивме, исцрпени се сите правни механизми за спречување на градбата“.

Од Општината потврдија дека издале одобрение за градење.

„За градежната парцела бр. 5.34 од ДУП за четврт И10, Општина Аеродром, КП 192/3 КО Кисела Вода 2, Скопје, по барање на инвеститорот ‘ЗСФ-ком’ ДООЕЛ Скопје во управна постапка е издадено одобрение за градење на А2 – домување во станбени згради од втора категорија“, велат од Аеродром.

Друштвото за градежништво „ЗСФ-ком“ и утрово, исто како вчера, е недостапно за коментар.