Општина Битола набави нови, еколошки минибуси на метан, со по 16 и 19 патнички седишта. Градоначалничката на општина Битола, Наташа Петровска, посочи дека возилата ќе бидат наменети за учениците и за други услуги наменети за граѓаните.

„Во согласност со програмите за работа и средствата предвидени од буџетот, Општина Битола годинава набавува 4 минибуси со капацитет од 70 седишта, во вредност од 18 милиони денари. Според нашата споредбена анализа, ќе покажеме кои се ефектите на едни поинакви политики што ги покажува оваа локална самоуправа. Во изминатиот период за превоз на ученици, со некои поинакви политики, беа потрошени речиси 9 милиони евра, што во превод би значело набавка на 116 вакви минибуси. Замислете, ако се воделе домаќински политики, како што ги покажуваме ние денес, кој капацитет на превозни средства и кои услуги би ги имала нашата локална самоуправа. Општина Битола ќе продолжи да се однесува во оваа насока затоа што само на ваков домаќински начин може да имате поефективен, поекономичен и поуслужлив превоз за граѓаните“, рече Петровска.

Минибусите пристигнаа непосредно пред седницата на Советот, каде што се носи последната одлука за формирање регионалното јавно претпријатие за подобрени услуги во превозот за жителите на општините Битола, Могила и Новаци.

„Следната недела доаѓа уште едно превозно средство, кое покрива категорија граѓани што во изминатиот период имале сериозни проблеми од аспект на мобилноста. Ветуваме дека со ваквите домаќински политики, кои покажаа дека една локална самоуправа може да се справи и со сопствени средства за набавка на толку значајни услуги кон граѓаните може да се реализира ветеното“, истакна Петровска.