Македонија
(Видео) Отворен кардиоваскуларен центар во Градската општа болница „8 Септември“

Од денеска во рамките на Градската општа болница „8 Септември“ функционира кардиоваскуларен центар. Центарот свечено беше отворен од страна на претседателот на Владата, Зоран Заев, и министерот за здравство, Венко Филипче. Кардиоваскуларниот центар се отвори токму на патрониот ден на болницата.
„Овој центар дефинитивно ќе ги надополни досегашните центри. Најголемиот капацитет е Клиниката за кардиологија. Постојат насекаде низ градовите, постои еден дел и во Здравствен дом Скопје, но Градската болница навистина го опслужува градот, а ја опслужува и цела Република Северна Македонија. Продолжуваме во здравството со сите политики коишто дефинитивно ќе го подигнат нивото на здравствените услуги. Во моментов знам дека се распишани постапки за реновирање на речиси сите здравствени установи. Распишани се постапки за опремување на повеќе од 34 здравствени институции во државата, голем дел на тендерски постапки се објавени за дополнително квалитетно здравство за граѓаните. Продолжуваме со мотивацијата на лекарите и здравствените работници преку зголемувањето на платите. Знаете дека силен фокус имаме на постапката за изградбата на новиот клинички центар за сите граѓани, во делот на терцијарното здравство, коешто е многу важно за сите граѓани“, потенцираше премиерот Заев.
Во овој центар сместени се кабинетот за трансторакална, трансезофагеална и стрес-ехокардиографија, кабинет за холтер и АБП-дијагностика, кабинетот за коронарен стрес-тест и ергоспирометрија.
Во рамките на центарот се наоѓа сала за ангиографија и сала за имплантација на пејсмејкери, кои исто така се работат во оваа болница. Ергоспирометријата како метода се користи за проценка на функционалниот капацитет на кардиоваскуларниот, респираторниот, мускуло-скелетниот систем и метаболизмот за време на одење по подвижна лента.
„На вработените во овој центар им посакувам успешен почеток. Од моја страна и од страна на Владата останува заложбата за подобрување на условите на здравствените работници и обезбедување средства за повисоки плати, а пациентите достоинствени услови за лекување. Во периодот што следува продолжува интензивната работа, подготвувањето на постапката и градбата на новиот клинички центар, којшто ќе биде тип на зграда со интегрирана услуга, како што има оваа болница. Ова е единствена болница којашто била пред многу години градена специјално со таа намена, многу слично на зградата на ВМА во Белград и заради тоа е тоа битно да се олесни пристапот и нормално со тоа квалитетот на здравствената услуга расте“, изјави министерот Филипче и додаде дека Министерството за здравство почнува постапка за подобрување на условите во над 30 јавни здравствени установи во државата.
Директорот на ГОБ „8 Септември“, Христијан Костов, инфомираше дека просторот што го користеше како дијагностички центар, Клиниката Жан Митрев, вратен на користење на Градската општа болница „8 Септември“, се реконструираше во кардиоваскуларен центар.
„Зголемувањето на интензитетот на работата на одделението и кабинетот за кардиологија, како и воведувањето нови дијагностички методи ја наметна потребата за отворање на кардиоваскуларен центар во Градската општа болница ‘8 Септември’ се во интерес на пациентите. Кардиоваскуларниот центар има три кардиолошки амбуланти и кабинети за дијагностички методи лоцирани во еден заеднички простор лесно достапни за пациентот“, истакна директорот Костов.
Премиерот Заев и министерот Филипче на вработени им го честитаа патрониот празник, како и денот на независноста, „8 Септември“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.