Власта целосно го занемарува фактот дека во согласност со здравствените протоколи училишните часови ќе бидат скратени 10 минути, односно за оние ученици до 10 години часовите ќе траат по 30 минути, а сè уште нема никаква одлука за функционирањето на дневниот престој во училиштата. Според информациите од училиштата, првата смена за настава за учениците до 10 години ќе трае од 8 часот до 10.15 часот, а втората смена почнува во 10.30 часот, а ќе трае до 12.45 часот, изјави Ели Панова, пратеничка од ВМРО-ДПМНЕ.

„Власта создава целосен хаос и крах на системот. Родителите, граѓаните, се оставени на избор – дали да дадат откази на работните места или децата до 10-годишна возраст да ги остават сами на себе? Ако се посетува физичка настава, децата од прва смена по 10.15 часот, треба да бидат оставени сами на себе. Ако, пак, треба да следат онлајн-настава, треба да бидат оставени сами дома, незгрижени и, внимавајте, сами да се снаоѓаат пред компјутерот со целосно нов некаковси приод кон онлајн-учење?

Тоа се однесува и за оние деца што ќе бидат втора смена – кој ќе ги однесе до училиштето во 10.30 часот или, пак, кој ќе ги земе во 12.45 часот? Тука станува збор за деца од 6, 7, 8, 9 и од 10 години.

Е ,па, Зоран Заев и неговите пулени Филипче, Шахпаска и Царовска треба да одговорат:
Дали владата намерно турка систем во кој децата од 6 до 10 години ги остава незгрижени?
Ова ли е тоа општество и власт што се грижат за доброто на децата?
Ова ли се мерките што ќе произведат, оние што со сила ги враќаат на работа, целосно безгрижно да се посветат на работата?
Ова ли се вистинските мерки за децата и вистински воспитно-образовен процес со два до три часа физична настава, а потоа децата да останат незгрижени, затоа што државата нема решение за згрижување на децата од 6 до 10-годишна возраст?

Мила Царовска како поранешна министерка за труд и социјална политика, а сега министерка за образование, треба да е свесна дека ова се вистинските проблеми што задираат во правата на децата, задираат во принципите на заштита на правото на живот и развој на детето, заштита на најдобриот интерес на детето, почитување на правото на слобода и безбедност на личноста, услови за здрав живот.

Дури и да е во ред епидемиолошката состојба, а не е, ваквото однесување на власта кон вработените и севкупно кон граѓаните е ништо помалку од насилничко. Заборавени и фрлени во неволја се цели групи граѓани, еднородителски семејства, семејства што немаат каде да ги остават децата на згрижување, уште повеќе семејства што немаат доволно приходи за да плаќаат некој секојдневно да се грижи за нивните деца.

Пред да се донесе мерката Владата не пристапила сериозно кон собирање релевантни податоци за тоа дали и колку од ова поради нивната мерка ризичната група на деца од 6 до 10 години има или може да се потпре на помош од поширокото семејство ниту, пак, дали воопшто би требало да се бара помош од ризична група поради животозагрозувачкиот вирус, кој се уште пламти. Но, најголемиот проблем е што Владата донесе одлука, без да обезбеди државата на кој било начин да ги згрижи децата на возраст од 6 до 10 години.

Забеганата власт вака испраќа порака дека децата и нивната добробит не ѝ се важни.

Инсистираме, Владата да ја повлече оваа избрзана одлука, да отвори јавна дебата и пред носење нова одлука да ги земе предвид барањата и потребите на родителите и, пред сè, во фокусот да ја стави грижата за доброто на децата. И овој пат изборот е или мафијата или Македонија“, заклучи Панова.