Македонија
(Видео) Пендаровски: Никогаш во историјата на нашата земја не е разговарано на толку високо политичко ниво за аерозагадувањето

Во првиот дел од седницата на Советот за безбедност, што се одржа во кабинетот на претседателот Пендаровски, се разгледаа тековни прашања од интерес на безбедноста на државата.
Претседателот Пендаровски во дадената изјава по завршувањето на седницата рече дека прва точка на дневен ред беше извештај за состојбата со нашите војници кои се во меѓународни мисии, за која реферирале началникот на Генералштабот и министерката за одбрана. Претседателот рече дека во овој момент имаме војници во меѓународни мисии во Босна и Херцеговина, во Авганистан, во Либан, како и војници кои се распоредени на нашата јужна граница.
„Состојбата со сите наши контингенти и на границата со Република Грција и надвор од нашите граници е редовна“, изјави претседателот Пендаровски.
Втора точка на дневниот ред, посочи Претседателот, беше извештај за тековните процеси на кадровска и техничка екипираност на Оперативната техничка агенција за која директорот на ОТА реферираше до каде е стигнато со просторното сместување, кадровското екипирање, обуката на неопходниот кадар, техничко-технолошката опрема која е неопходна за да ги извршуваат своите задачи и обврски согласно Законот.
„Можеме да констатираме дека во тој дел работите се одвиваат со она темпо кое го посакуваме. Тука имаме дел и странски експерти кои помагаат од самиот почеток на етаблирање на таа за нашиот систем нова институција и можам да кажам дека и нивните евалуации се прилично позитивни и дека ОТА за година и пол колку што постои е веќе на висина на својата задача. Некои поголеми потешкотии во нејзиното работење не се забележани“, рече претседателот Пендаровски.
Вториот дел на седницата беше посветен на проблемот со аерозагадувањето, и присутните ја поздравија иницијативата на Претседателот за подигнување на темата на така високо ниво, а сите се согласија дека оваа тема не треба да се политизира и да се користи во дневно-политички препукувања.
Претседателот Пендаровски на прес-конференцијата рече дека на оваа тема се разговарало повеќе од 2 часа, а дијалогот го оцени како конструктивен. Проблемите во делот на заштитата на животната средина, посочи Претседателот, треба да се решаваат подобро и системски и никој не може да ги реши во еден мандат.
„Главната идеја која беше при свикувањето ја реализиравме, тоа е кревање на јавната свест, затоа што никогаш до сега во историјата на нашата земја на толку високо и репрезентативно политичко ниво не е разговарано за овој проблем кој станува сè поактуелен, не само кај нас, не само во нашиот регион, туку насекаде во светот. Советот за безбедност е советодавно тело на Претседателот, не е тело кое одлучува, кое решава. Ние не се собравме тука за да донесеме одлуки за решавање на овие проблеми, или за забрзување на позитивните трендови во оваа област. Неспорно е дека е потребно и на ова ниво да дадеме еден импулс плус во јавноста, да ова прашање се третира не ад-хок, туку системски, односно посистемски од досега. Јас мислам дека тоа беше и главната поента која сите учесници во денешната дебата ја поддржаа, често се разговара за ова – на највисоко политичко ниво и луѓето кои се во невладиниот сектор да бараат отчет од луѓето кои се платени да работат во таа област“, рече претседателот Пендаровски.
Претседателот Пендаровски потсети дека и во неговото годишно обраќање се заложил за зголемување на државниот буџет за заштита на човековата околина, кое, како што нагласи, би морало во наредните години да биде што е можно побрзо и што е можно поблиску до просекот на земјите членки на Европската Унија.
Според Претседателот и поглавјето 27, што се однесува на заштита на човековата околина, се смета за едно од најтешките и едно од најскапите во преговорите, и во тој дел ние мораме добро да се подготвиме.
„Еве сега на седницата чувме дел од учесниците дека поглавјето 27 според проценка на преговарачите од Црна Гора, која е прилично одмината во тие преговори, тие сметаат дека во една декада би ги чинело милијарда и пол евра. Ако одиме по тие параметри, значи уште сега би можеле да кажеме една цифра, како една груба проценка, дека нас поглавјето 27 би нè чинело над 5 милијарди евра. Значи станува збор за исклучително важен сегмент од животот на луѓето“, рече претседателот Пендаровски, по завршувањето на втората седница на Советот за безбедност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поддршка од министерот за правда за Пандов чијашто куќа беше запалена: „Случајот бара одлучна акција“

Министерот за правда Игор Филков најостро го осудува палењето на куќата на директорот на Управата за извршување на санкции, Александар Пандов и бара одлучна акција во која ќе се утврдат причините и најстрого казнат можните сторители.
„Најостро го осудувам палењето на куќата на директорот на Управата за извршување санкции, Александар Пандов. Му давам целосна поддршка во неговата истрајност и борба против криминалот и корупцијата. Овој случај како и неколкуте други случаи поврзани со лицата вработени во УИС и затворите, бараат одлучна акција во која ќе се утврдат причините и најстрого ќе се казнат можните сторители“, вели Филков.
Директорот на Управата за извршување на санкции, Александар Пандов, претходно, на социјалните мрежи објави дека му бил запален домот. Нема да не запрат и нема да не поколебаат, напиша тој.
Македонија
Кирков: Вработените во ЗОО последно земале февруарска плата

До Стефан Кирков, којшто е член на Советот на Град Скопје, пристигнала молба од вработените во скопската Зоолошка градина и барање за реакција и помош. Го известиле дека последна плата која ја земале е фебруарската плата и одтогаш немаат никакво примање.
„Веќе сме мај, а овие вработени се оставени без примања и навистина сум запрепастен до каде ќе се оди со непрофесионалноста во ова раководство на Градот и кадрите кој ги поставува?! Вработените од утре ќе бидат и без здравствено осигурување !!! Поминаа празници како 8ми Март, Рамазан Бајрам , Велигден на праг е и 1ви Мај а вработените се оставени и заборавени замислете да им се исплати плата !!! Цели фамилии страдаат од нечија непрофесионалност!“, напиша Кирков на социјалните мрежи.
Тој ги проѕва Град Скопје , Данела Арсовска и Зоран Попов сигнализирајќи и дека состојбата може да доведе до протести.
Македонија
Реконструкција на водоводна мрежа и проширување на мостот на Маркова Река, најави Општина Аеродром

Општина Аеродром најави дека во наредниот период започнува со целосна реконструкција на водоводната мрежа на улица 2 во Долно Лисиче, а исто така се започнува и реализација на проектот за проширување на мостот на Маркова Река што ги поврзува Долно и Горно Лисиче.
Тендерските постапки и за двата проекта се во финална фаза и се очекува наскоро, по нивното комплетирање да се почне со реализација на терен.
„Водоводната мрежа на улица 2 во Долно Лисиче за првпат од нејзината изградба добива целосна реконструкција при што старите и дотраени цевки ќе бидат заменети со нови и пошироки инсталации во должина од околу 1 300 метри. Со ова конечно се става крај на повеќедеценискиот проблем со водоснабдувањето што го имаат жителите во овој дел од Аеродром“, соопштија од Општината.
Наредниот период Општина Аеродром започнува и со реконструкција и проширување на мостот на Маркова Река, меѓу Горно и Долно Лисиче.
„Мостот се наоѓа на многу фреквентна сообраќајница и токму заради зајакнување на безбедноста во сообраќајот се врши реконструкција со проширување на овој мост, со што би се добило побрз проток возилата, но она што е уште позначајно е дека ќе се зголеми и самата носивост на објектот“, се наведува во соопштението.
Реконструкцијата на водоводната мрежа и на мостот,додаваат од таму, се два капитални инфраструктурни прокета од витално значење, особено за жителите на Долно и на Горно Лисиче, и се финансиски поддржани од Владата.
Вкупната вредност на реконструкцијата на водоводната мрежа изнесува 15.457.871 денар, додека вкупната вредност на проширувањето на мостот е во висина од 12.066.494 денари.