Македонија
(Видео) Пендаровски: Самостојноста не ни е подарена од никого, туку е дело на многу генерации
Претседателот, Стево Пендаровски, во своето обраќање на централната свеченост по повод 30-годишнината од независноста, истакна дека самостојноста не ни е подарена од никого, туку е дело на многу генерации водени од идеалот за слободна и своја држава.
Пендаровски нагласи дека континуитетот, но и концептот на државата е јасно впишан и во клучните документи на трите Илиндени: Крушевскиот манифест кој декларира соживот меѓу еднаквите, Декларацијата за основните права на граѓанинот на демократска Македонија од Св. Прохор Пчински и Декларацијата за сувереност и ја потврдуваат визија на основачите за демократска република, втемелена врз сите меѓународни документи и принципи за човековите права и слободи.
Претседателот на државата потсети дека во завршната етапа, независноста беше стекната во исклучително сложени геополитички и безбедносни околности, на крајот на Студената војна и на почетокот на крвавиот распад на југословенската федерација.
„Во овие триесет години сите имавме прилика да потврдиме една вистина, една реалност, а таа е дека опстојот и просперитетот на нашата независна македонска држава зависат од два процеси: од внатрешната инклузивност и од надворешната интегрираност. Мултиетничкиот соживот и вековната традиција на почитување на различноста се нашата најголема вредност и тоа не е така само во пишаните документи со кои ќе се фалиме пред светот, за тоа постојат многубројни примери во нашето секојдневие каде што и радоста и тагата луѓето еднакво ја делат независно од нивната вера или нација“, рече Пендаровски.
Истакна дека уште на самите почетоци на независноста, сите релевантни политички и општествени субјекти постигнаа општ консензус околу неопходноста од членство во Северно атлантската алијанса и во Европската економска заедница.
„Освен што ја јакнеа меѓуетничката кохезија, евроатлантските интеграции ги помируваа и политичките противници. Интеграциските процеси беа, и сѐ уште се, и мотив и средство за достигнување на европските стандарди на живеење во многу области. Земени заедно, внатрешната инклузивност и надворешната интеграција се клучните оски за долгорочна стабилност и просперитет на нашата држава. Северна Македонија може да напредува само ако сите нејзини граѓани ја чувствуваат како своја татковина, и ако е целосно интегрирана во западната заедница на народите“, потенцираше претседателот.
Пендаровски нагласи дека во перспектива Северна Македонија ја гледа како земја во која се обезбедени сите услови младите генерации да останат во земјата и тука да живеат, да работат и создаваат иднина.
„Република Северна Македонија треба да ја градиме како држава во која владеењето на правото ќе биде без алтернатива. Да вложуваме во квалитетно образование што ќе ги подготви младите да се вклучат во глобалната дигитална револуција. Да инвестираме во здравствен систем што ќе се грижи за здравјето на граѓаните, вреднувајќи го трудот на здравствените работници. Да го негуваме културното и историско наследство и да вложуваме во новата генерација артисти кои не се подолу од врвните во светот. Да градиме држава во која сите нејзини граѓани ќе чувствуваат дека имаат еднакви права и можности, држава без привилегирани и потчинети, без домаќини и гости. Солидарно и хумано општество што ќе го гарантира достоинството и на најранливите и на најслабите негови членови“, издвои, меѓу другото, претседателот Пендаровски во овој дел од своето обраќање.
Денес, кога го празнуваме континуитетот на трите наши Илиндени, подвлече претседателот на државата, не треба да изгубиме од предвид дека да се има сопствена, независна држава е голема привилегија, но и голема одговорност.
„Ние немаме резервна татковина. Ова е нашиот единствен, заеднички дом и тој ќе биде пристојно место за живеење само доколку секој од нас го вложува во него својот труд и својата совест. При тоа, се разбира дека одговорноста е најголема кај оние кои ја добиваат честа да ја водат општината, градот, владата или државата. Апсолутно сум убеден дека ако секој од нас се вложи за таа кауза до крај, беа остаток, беа калкулации, тогаш ќе имаме држава со која сите ќе се гордееме“, нагласи Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Паркинзи“ на Општина Центар продолжува со акцијата за отстранување на хаварисани возила од јавните површини
Во изминатата година, ЈП „Паркинзи на Општина Центар“ успешно отстрани над 120 хаварисани возила од јавните површини на територијата на oпштина Центар. Со оваа акција, претпријатието продолжува да придонесува кон создавање на почиста, побезбедна и поурбана животна средина за сите граѓани.
„Нашата цел е целосно да го ослободиме Центар од хаварисани возила кои ја нарушуваат урбаната слика и зафаќаат паркинг места и јавни површини. Апелираме до сите сопственици на хаварисани возила да се приклучат кон нашата акција и да ги пријават своите возила за отстранување,“ изјави директорот на ЈП Паркинзи на Општина Центар, Душко Коцевски.
За повеќе информации или пријава на хаварисано возило, граѓаните можат да контактираат со ЈП „Паркинзи на Општина Центар“ на телефонскиот број: 076 350 767
Преку оваа акција, ЈП ПОЦ бесплатно ги транспортира хаварисаните возила до отпад, а средствата од откупот директно се префрлаат на сметката на сопственикот. На овој начин, секој граѓанин кој ќе се вклучи во акцијата придонесува за поуреден, побезбеден и пофункционален Центар.
Македонија
Компанијата „Зегин“ и фондацијата д-р Верица Механџиска со значајна донација за ГОБ „8 Септермври“ – Скопје
Компанијата Зегин и Фондацијата, Верица Механџиска, вчера донираа медицинска опрема на одделот за физикална медицина и рехабилитација во ГОБ „8 Септември” во Скопје со што остварија значаен придонес за македонското здравство и уште еднаш покажаа пример за општествена одговорност. Вкупната вредност на оваа значајна донација изнесува околу 140.000 евра.
Станува збор за хипербарна комора која ќе го подобри квалитетот на здравствените услуги, особено во третманот на пациенти со изгореници, за третман и лекување на пациенти со хронични рани кои тешко заздравуваат, дијабетично стапало, како и за постоперативни третмани но и за спортисти при спортски повреди, за зајакнување на нивните спортски перформанси, а ќе им биде на располагање и на одделите за пластичната хирургија, пулмологија, дерматологија и останатите оддели.
Дополнително се донира и нов клима уред , две мултифункционални маси за физикална рехабилитација кои се применуваат при невролошка рехабилитација, ортопедска рехабилитација, детска рехабилитација, рехабилитација за лица со попреченост, геријатриска рехабилитација, рехабилитација по спортска медицина, ментална рехабилитација итн, како и лента за трчање.
На проектот за хипербарна комора се работеше пет месеци, а крајната цел е создавање на подобри услови за поквалитетно и поблиско здравство до сите граѓани кои имаат потреба од овие третмани.
(ПР)
Македонија
Касами: Тетово ја заслужува оваа трансформација – продолжуваме уште посилно со Второто поглавје за развој
Градоначалникот на Тетово и кандидат за нов мандат, Билал Касами, порача дека големата поддршка што ја добил на 19 октомври покажала дека Тетово е на вистинскиот пат, дека градот се менува, трансформира и се развива.
„Тетово докажа дека ја цени работата и сака овој развој да продолжи уште посилно. Ние возвраќаме на ова признание со уште повеќе работа,“ изјави Касами.
Тој денес беше на улицата Поточка, заедно со улиците 134 и Прохор Пчински, кои, како што истакна, биле целосно асфалтирани според современи стандарди.
„Изградивме нова современа улица со должина од речиси еден километар и асфалтирана површина од околу 5.000 квадратни метри. Со инвестиција од приближно 200 илјади евра, односно околу 12 милиони денари, ја трансформиравме оваа населба во близина на градинката кај Поточка, давајќи ѝ европски изглед,“ нагласи Касами.
Тој додаде дека Тетово ја заслужува оваа трансформација и модерни патишта, училишта, градинки, базени и услови за функционален и чист град.
„Добрите дела за Тетово мора да продолжат уште повеќе, уште подобро, уште посилно — со Второто поглавје за развој,“ порача градоначалникот Касами.

