Македонија
(Видео) Петров: Економските мерки на Владата значат помош за 250.000 работници и 35.000 компании
„Коронавирусот комплетно го промени начинот на кој фунцкионира светот и никој не е поштеден. Загрижени сме за својата иднина, своите работни мести и своите месечни примања.
Драги претприемачи, знам дека ова е тежок период и за вас. Некои од вас беа принудени да го намалат обемот на работа. Други мораа привремено и да ги затворат своите компании, а бидејќи приливите се намалени, многумина од вас се прашуваат како да им ги исплатат платите на своите вработени на крајот од месецот. Ова се неизвесни времиња за сите, но мојата порака до вас денес е следна – не сте сами во ова. Ќе го надминеме ова заедно“, изјави потпретседателот на СДСМ, Коста Петров.
Според него, Владата е свесна за проблемите со кои се соочувате и подготви нов пакет-економски мерки, вреден 200 милиони евра, со една јасна цел – да се ублажи економскиот удар од коронавирусот и да им се помогне на граѓаните, на работниците, на компаниите, на сите на кои им е загрозена финансиската состојба.
„За да ги зачуваме работните места, Владата предводена од СДСМ овозможува директна помош од 14.500 денари од вработен за април и мај за сите фирми погодени од кризата. Со оваа мерка таргетирани се 35.000 компании, односно 50 отсто од сите компании во државата. Би сакал да напоменам дека дури 87 отсто од шифрите на дејност се опфатени со оваа мерка. Ова практично ќе ја покрие целата нето-плата на 75.000 граѓани, а на 180.000 граѓани ќе покрива до 75 отсто од нивната нето-плата. Не се заборавени ниту спортските работници вработени во спортските здруженија, како и самостојните уметници. И за нив е обезбедена минимална плата од 14.500 денари за април и мај, како и придонеси преку Министерството за култура. Сите фирми погодени од кризата нема да плаќаат данок на добивка преку месечните аконтации. Кредитите кај банките и штедилниците се одложени од 3 до 6 месеци, а кај финансиските друштва за 3 месеци, но имаме и случај каде што многу банки ги одложуваат кредитите и до 6 месеци. Извршителите се одложени за 6 месеци. Во периодот на криза се забранува и одење на компаниите во стечај.
Државата ја субвенционира каматата и со тоа им нуди ликвидни средства на компаниите со 0 отсто камата во износ од 13,7 милиони евра со 12 месеци грејс-период и 3 години рок на отплата.
На располагање на фирмите се и евтини кредити од 50 милиони евра со камата од 1 до 1,5 отсто годишно. Казнената камата се намали 50 отсто (од 0,03 на 0,015 отсто). Законската затезна камата исто така е намалена 50 отсто (од 10 на 5 отсто за фирми и од 8 на 4 отсто за граѓани). Граѓаните што останале без работа ќе земаат 50 отсто од просечната плата што ја имале кога биле вработени преку Агенцијата за вработување во согласност со Законот за вработувањето и осигурувањето во случај на невработеност (член 68.) Лицата од неформалната економија, кои останале без приходи, ќе земаат по 7.000 денари помош од државата за април и мај. Со оваа мерка ќе бидат опфатени 20.000 нови домаќинства, кои веднаш ќе влезат во системот на социјална заштита, како и 30.000 веќе постојни корисници“, истакна Петров.
Тој додава дека се овозможува и одложување на плаќањето кирии за станови и деловни простори во државна сопственост за 3 месеци за граѓаните и фирмите погодени од кризата. Сите избрани и именувани функционери на државно и на локално ниво ќе земаат минимална нето-плата од 14.500 денари за април и мај 2020 година. Претседателите и членовите на управни и надзорни одбори на јавни институции, претседатели и членови на советите во општините, а кои се вработени, нема да примаат надомест за времетраењето на кризата. Истовремено, Владата веќе донесе одлука за забрана за нови вработувања и нови ангажирања во јавниот сектор. Донесена е и одлука сите средства од заштеда од непродуктивните трошоци да се пренаменат за справување со здравствено-економската криза. Се формира солидарен фонд за помагање на здравјето на граѓаните и други социјални потреби на граѓаните.
„Знам дека ова е тежок период, но само заедно, сплотени и солидарни, можеме да ја победиме оваа криза. Нека биде ова време на солидарност, на поддршка и заедништво. Ние покажавме како преку исправни политики, истрајност и посветеност се рушат сите бариери и се постигнуваат зацртаните цели. Затоа веруваме дека сите заедно и овој пат ќе успееме да се избориме и со здравствената и со економската криза! И, запомнете, не сте сами во ова. Ќе го надминеме ова заедно“, додава Петров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради јазични бариери одложено продолжението на конститутивната седница на работната група за реформи во изборното законодавство, кажа Филков
Поради технички причини денешната конститутивна седница на работната група за реформи во изборното законодавство беше одложена за следната недела. Министерот за правда Игор Филков изјави дека членовите на работната група не се впуштиле во материјална расправа затоа што прво треба да се утврди дневниот ред.
,,Иако денес требаше да биде одржана првата конститутивна седница на работната група за реформи во изборно законодавство на која требаше да се избере претседател, како и да се донесе предлог-деловник за утврдување на методологијата и динамиката на работење, сепак тоа не се случи поради одредени јазични бариери. Од дел од присутните претставници на политичките партии беше побарано материјалите да бидат преведени за полесно да можат да се разберат’’, рече Филков.
Филков се надева дека следната недела членовите ќе се усогласат за термин , ќе се избере претседател на работната група и ќе се отпочне со работа каде што сите ќе имаат можност да ги дадат своите предлози и сугестии за реформите во изборното законодавство.
Македонија
Сиљановска-Давкова-Грлиќ Радман: потврдена подготвеноста на Хрватска да придонесе кон забрзување на македонскиот евроинтеграциски процес
Претседателката Гордана Сиљановска-Давкова денеска го прими Гордан Грлиќ Радман, министер за надворешни и европски работи на Република Хрватска, кој престојува во официјална посета на земјава.
Обајцата го потврдија цврстото македонско-хрватско пријателство коешто двете земји го негуваат повеќе од 3 децении, втемелено на взаемна почит и разбирање и реализирано низ политички дијалог и конструктивна соработка.
Претседателката искажа искрена благодарност за хрватското отворено и континуирано разбирање и поддршка на македонската интеграција, како и на принципиелниот став на Хрватска дека проширувањето на Унијата со Западен Балкан треба да се темели на реални заслуги, без билатерализација и вето.
Министерот Радман ја потврди подготвеноста на неговата држава да придонесе кон забрзување на македонскиот евроинтеграциски процес во рамките на Копенхашките критериуми, потенцирајќи дека македонската држава доби статус на кандидат за членство во ЕУ во март 2005 година, односно неколку месеци пред Хрватска.
Соговорниците очекуваат дека партнерството дополнително ќе се зајакне со Договорот за стратешка соработка со Владата на Република Хрватска, како и со претстојната официјална посета на Претседателката Сиљановска-Давкова на пријателска Хрватска, кон крајот на март.
Македонија
Уапсен тетовец: осомничен за лажни дојави за поставени бомби во образовни институции
Утрово во 09:10 часот во с.Палатица, тетовско, полициски службеници од одделот за сузбивање на организиран и сериозен криминал при Министерството за внатрешни работи во координација со полициски службеници од СВР Тетово го лишиле од слобода М.Р.(18) од село Палатица.
Тој се сомничи дека во повеќе наврати испраќал електронски пораки на повеќе образовни институции во Тетово дека во институциите има поставено експлозивни направи.
Полицијата соопшти дека по преземени мерки и извршени проверки е констатирано дека сите дојави за поставени бомби биле лажни.
Денеска, со сдуска наредба, бил извршен и претрес во неговиот дом во селото, при што биле одземени повеќе електронски уреди.
Лицето било приведено во полициска станица и по целосно расчистување и документирање на случаите, во координација со јавен обвинител против него ќе биде поднесена соодветна пријава.

