Македонија
(Видео) Поповски повика на организиран фронт за борба против лажните вести

Mинистерот без ресор задолжен за комуникации, транспарентност и отчетност, Роберт Поповски, денеска се обрати на отворањето на Петтата конференција за медиуми на Југоисточна Европа која денеска и утре (11-12 мај) се одржува во Струга, во организација на Канцеларијата на претставникот за слобода на медиумите на ОБСЕ, Арлем Дезир, со поддршка на теренските операции на ОБСЕ во Југоисточна Европа.
Целта на конференцијата, на која учествуваат меѓународни и локални експерти и членови на медиуми од Југоисточна Европа, е да се обезбеди платформа која преку отворањето дискусии за низа прашања, како што се безбедноста на новинарите, условите за работа на новинарите и медиумските работници, зајакнувањето на јавните сервисни радиодифузери, медиумската саморегулација и почитувањето на професионалните стандарди и лажните вести, ќе создаде услови за подобрување на медиумскиот простор во регионот, вклучително и преку презентирање на најдобрите практики.
Поповски говорејќи за значењето на слободата на изразувањето, вклучувајќи ја тука како што рече и слободата на медиумите како четврта власт во демократските општества, ги означи како едни од универзалните човекови права, признати и заштитени со соодветни документи од највисоките меѓународни организации.
„Кога Република Македонија беше обележана како ‘заробена држава’ беше така квалификувана и поради крајно загрижувачките извештаи за состојбата со слободата на медиумите и на изразувањето во државата. Посебен акцент беше ставен на лошата ситуација во која се наоѓаат медиумите во однос на нивната основна функција, слободно и без притисоци да ја информираат јавноста за сите релевантни прашања во општеството”, рече Поповски, и нагласи дека важен фактор за слободата на медиумите и изразувањето е овозможувањето услови и средина во која ќе се практикува слободното информирање без притисоци.
Toj потенцираше дека актуелната Влада по крајот на политичката криза демонстрираше силна политичка волја за спроведување на медиумските реформи на најтранспарентен начин, заложувајќи се за подобрување на условите за работење на медиумите во соработка со медиумските претставници.
„Во согласност со своите темелни принципи за транспарентност и инклузивност, најавивме и покажавме дека при донесувањето на законите и законските измени, целта на Владата е да се чуе гласот на медиумските професионалци, тие да бидат моторот на медиумските реформи, а ние подоцна да помагаме со механизми за нивна имплементација”, оцени Поповски.
Осврнувајќи се на предложените измени во медиумската легислатива, кои се во последната фаза од донесувањето во Собранието, Поповски ја повтори заложбата на Владата за целосна независност во медиумската сфера, преку професионализирање и департизирање на националниот сервис и Агенцијата за аудио и аудиовизуелни медиумски услуги.
„Целта ни беше што е можно повеќе да ја намалиме улогата на Владата и затоа покрај суштинските консултации со сите субјекти во медиумската сфера, во носењето на законските измени, побаравме поддршка и од опозицијата, за да создадеме целосно независен јавен сервис и да создадеме услови за целосна независност и ослободување од какви било можности за влијанија врз регулаторот, Агенцијата за аудио и аудиовизуелни медиумски услуги”, порача Поповски.
Според него, по прашањето за јавниот радиодифузен сервис особено е значајно да дојде до израз и почитувањето на концептот на едно општество за сите, за да може Македонската радиотелевизија (МРТВ), растоварена од политичкото или кое било друго влијание, да се издигне во вистински репрезент на културните и политичките различности.
Министерот Поповски во својот говор се осврна и на неодамна презентираните податоци по повод Светскиот ден за слободата на медиумите, според кои, статистички најризична професија во изминатата година била новинарската професија, која ги вклучува и сите други медиумски работници. Тој оцени дека тие тажни факти опоменуваат дека не смее да има застој во борбата за заштита на новинарите и во борбата за создавање услови за нивно непречено извршување на професионалните обврски.
„Оттаму, за Владата што ја претставувам на оваа конференција не постои никаква толеранција за никакви притисоци, закани, уцени врз новинарите и медиумските работници. Нула толеранција зак аков било обид за загрозување на слободата на говорот и изразувањето“, нагласи Поповски.
Тој повтори дека Владата, отворено осудувајќи ги сите напади што се случија во изминатиот период кон новинарите и медиумските работници, инсистира на правна разрешница на сите случаи на закани и додаде дека принципот на нула толеранција се однесува и на неказнивоста во однос на насилниците врз слободата на медиумите и врз слободата на изразувањето на медиумските работници.
Истакнувајќи ја заложбата за силна поддршка за истражувачкото новинарство, министерот Поповски потсети на мерките и чекорите кои ги презеде актуелната влада за полесен пристап до информациите во сопственост на владините институции, во согласност со политиките на транспарентност и отчетност.
„Суштината на медиумскиот бизнис лежи во информациите, т.е. испорачување на вистина преку објективно и целосно информирање на јавноста и сето тоа сторено со почитување на етичките правила. На тој начин, со саморегулацијата се штитат и универзалните човекови права – слобода на изразување и право на информирање, и слободните и професионални медиуми”, рече Поповски надоврзувајќи се дека само регулацијата е концептот од кој ќе произлезе и алатката за борба против модерниот, глобален тренд – лажните вести.
„Градот Велес стана синоним на лажните вести, но јас денеска уште еднаш ве повикувам сите вас – да направиме да биде синоним на борбата против нив. Вистината е оружјето, а проверката на фактите алатка”, оцени министерот Поповски, кој истакна дека е застапник на организиран фронт за борба против лажните вести, следејќи го принципот дека секоја Влада заедно со новинарите, медиумите и граѓаните, треба да бидат на чело на тој фронт против лажните вести.
Претставникот на ОБСЕ, Дезир, подвлече дека медиумите се општо добро, како воздух и вода, и служат на интересите на секој сектор на општеството, кога тоа е здраво, слободно и заштитено. Во своето уводно излагање, тој ја истакна силната потреба новинарите да дејствуваат заедно во духот на солидарноста и подвлече дека медиумите се најдобри кога новинарите можат да работат заедно, да ги изложуваат прашањата во општеството, како што е корупцијата, за да ги нагласат фактите и да ги објавуваат различни мислења за нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски во дводневна посета на Лондон на Самитот за Западен Балкан

Претседателот на Владата, Христијан Мицкоски, заедно со владина делегација ќе присуствува на Самитот за Западен Балкан, кој оваа година се одржува во Лондон, Велика Британија.
Од Владата соопштија дека Мицкоски, заедно со вицепремиерот Александар Николоски, министерот за надворешни работи и надворешна трговија, Тимчо Муцунски, министерката за финансии Гордана Кочоска Димитриеска, како и министерот за евроинтеграција Орхан Муртезани ќе учествуваат на голем број состаноци во состав на Берлинскиот процес.
„На маргините на самитот, а и во рамки на посетата на Обединетото Кралство, предвидени се голем број на билатерални средби, за што навремено ќе ја информираме јавноста. При посетата на Обединетото Кралство, владината делегација ќе оствари повеќе економски работни средби кои ќе преставуваат економски исчекор за меѓусебната соработка“, велат од Владата.
Македонија
Мојсоска: 3.000 гласа вредни како 30.000, нашата борба можеби е тешка, но е праведна

Скоро 3.000 гласа вредни како 30.000, со овие зборови Јована Мојсоска, актуелен пратеник и кандидатка за градоначалник на Струга, им се заблагодари на своите сограѓани за поддршката на локалните избори. Во објава на социјалните мрежи, Мојсоска порача дека секој глас добиен за Левица е „чист како солза“, без поткуп, уцени или закани, туку даден од искрена желба за подобро утре.
„Мои стружани и стружанки, фала ви од срце за секој глас и поддршка, секој наш глас е чист како солза, без поткуп, уцени и закани – туку од искрена желба за промена и подобро утре. Тие чесни луѓе кои го ставаат јавниот пред личниот интерес се хероите на нашето време! Позитивниот прием кој го осетив изминатиов месец е само показател дека стружани имаат желба за промена и дека нашата борба допрва претстои“, истакнува Мојсоска.
Таа најави дека заедно со советникот Климе Карамитре ќе се борат за интересите на сите граѓани, со цел да се спречат, како што вели „лукративните пазари на бизнис партиите“.
Особено ја радуваат, додава, резултатите во градот, каде што на шест избирачки места, во училиштата „Ибрахим Темо“ и „Јосип Броз Тито“, Левица освоила прво место по број на гласови.
„Ме радуват и драстично зголемениот раст на поддршката во Подгорци, Октиси и Лабуништа – што покажвит дека времето на Левица во Струга допрва доаѓа“, додава таа.
Мојсоска завршува со порака: „Фала ви од срце убај луѓе – нашата борба можеби е тешка, но е праведна!“.
Македонија
Најголема победа во првиот круг има Јане Мицевски во Сопиште со освоени 80,2% од гласовите, вети нов резервоар за вода

Кандидатот за градоначалник на Сопиште од ВМРО-ДПМНЕ, Јане Мицевски, извојува најголема победа во првиот круг на овие локални избори со освоени 80,2% од гласовите на жителите со право на глас. Од запишаните 5.483 гласачи во оваа општина, на гласање излегоа 2.937 жители, а за него гласаа 2.524.
Тој на жителите на Сопиште им вети нов резервоар за вода, како еден од посериозните проекти на кои ќе работи во претстојниот мандат покрај многуте проекти за подобрување на инфраструктурата, спортот, образованието, безбедноста, транспортот и културата на кои рече дека активно ќе работи.
Мицевски на овие избори доби втор мандат од жителите на Сопиште. Тој и досега беше градоначалник на Сопиште. И во 2021 година во првиот круг беше избран за градоначалник со освоени 67,96% од гласовите кога за него гласаа 2.161 жител на општината.
Зад Мицевски со освоени 79,73% од гласовите е победата на Александар Георгиевски од ВМРО-ДПМНЕ во Илинден, кој исто така на овие избори доби втор мандат од граѓаните. Од вкупно запишани 14.908 гласачи, на гласање излегоа 7.746, а за него гласаа 6.386 граѓани.
И на претходните избори во 2021 година кога го доби првиот градоначалнички мандат, Георгиевски беше избран во првиот круг со освоени 54,75% од гласовите кога за него гласаа 4..861 жител на Илинден.
Меѓу тројцата градоначалници кои извојуваа најголема победа во првиот круг на овие избори е и Борче Митевски од ВМРО-ДПМНЕ, кој во Петровец доби петти мандат со освоени 77,43% или 3.493гласа. Во оваа општина се запишани 8.144 избирачи, а на гласање излегоа 4.410.
Убедлива победа има и Иван Јорданов од ВМРО-ДПМНЕ во Штип со освоени 76,74% од гласовите со што доби втор, последователен мандат.
Со 74% од гласовите победа во прв круг и втор мандат освои и Славе Андонов од ВМРО-ДПМНЕ во Василево.
Со убедлива победа трет мандат на овие избори освои Митко Јанчев кој доби 73,89% од гласовите, следуваат Марко Колев со освоени 73,34% од гласовите во Велес, Тодорче Николовски во Кратово со 73,2%, Киро Нацков во Градско со 71,92% од гласовите, Ристо Манчев во Босилово со 70,12 % од гласовите, а останатите градоначалници добија поддршка помала од 70% од гласовите.
Процентуално најголема поддршка вчера доби кандидатот на Алијанса за Албанците во Врапчиште, Исен Шабани. Тој според податоците од Државната изборна комисија доби 88,13 % од гласовите, но гласањето мора да се повтори поради мал одѕив на изборите На гласање излегле 24,41% од запишаните граѓани со право глас место една третина колку што пропишува Изборниот законик.
Во првиот круг избрани се градоначалници во 43 општини,а во останатите, како и во Град Скопје градоначалник ќе се бира во втор круг, на втори ноември.