Македонија
(Видео) Прес-конференција на Заев и Брнабиќ: Односите меѓу двете земји нема да се нарушат поради лажните вести
Лажните вести нема да застанат на патот на добрососедските односи меѓу Македонија и Србија, изјави премиерот Зоран Заев на прес-конференцијата со српската колешка Ана Брнабиќ. Тој одговара на прашањето како пишувањата на српските медиуми за неговата вмешаност во случајот „Рекет“ може да влијаат на односите меѓу двете земји.
„Нам политичарите, знам јас по себе, должност ни е да работиме на градење на пријателството и секогаш да помогнеме сите да разграничиме што е тоа критичко новинарство, што се лажни вести. Треба да има критичко новинарство, тоа е многу здраво за демократијата, но истовремено лажните вести и невистините се штетни и ја уништуваат демократијата“, рече Заев.
Брнабиќ смета дека лажните вести на сите ни одземаат многу време и енергија и дека секогаш постои дилемата дали да се справите со лажните вести или да работите нешто во интерес на граѓаните. „Сè додека има повеќе конкретни иницијативи, заеднички проекти, директна комуникација, меѓусебни посети, тоа дава многу појасна слика за меѓусебните односи отколку сите други лажни вести. Но, лажните вести се нешто со кое ние политичарите во светот ќе мора да се пресметаме“, рече премиерката.
Запрашани за тоа дали разговарале за тоа што Македонија не ѝ го екстрадира на Србија поранешниот борец на Косовската ослободителна армија, Томор Морина, и двајцата премиери се согласија дека тоа е прашање на судството.
На прес-конференцијата премиерот Заев истакна дека заедно со топлото и срдечно добредојде за српската делегација, ја оцени оваа посета како уште еден придонес во негувањето традиционално добрососедски односи меѓу двете пријателски земји, кои се заеднички посветени на унапредување на регионалната соработка и на интеграцијата во ЕУ на нашиот регион, врз основа на индивидуални заслуги и резултати на секоја земја посебно.
„На средбата меѓу двете делегации и на тет-а-тет средбата со премиерката Брнабиќ, ја истакнав нашата заложба за одржување континуиран политички дијалог на највисоко ниво. Го искажав нашиот жив и силен интерес за одржување трета заедничка седница меѓу двете влади со цел поттикнување на понатамошната севкупна соработка. Тоа ќе помогне да му дадеме поттик и на денешниот значаен настан кога на граничниот премин Табановце – Прешево свечено го отворивме заедничкиот премин по принципот One Stop Shop и кој претставува реализација на една од целите на повеќегодишниот акциски план за создавање регионална економска област на Западен Балкан“, потенцира премиерот Заев и додаде дека овој проект е уште една круна на пријателството и добрососедството помеѓу двете држави.
На прес-конференцијата Заев информира и за трите спогодби што денеска беа потпишани: спогодбата за заедничко признавање доверливи услуги, кои се користат во земјите во соработка со Министерството за информатичко општество и администрација од наша страна и ИОА и Министерството за трговија, туризам и телекомуникации од страна на Република Србија, што во пракса значи дека електронските документи издадени од институциите во Северна Македонија ќе бидат еднакво признаени и во Србија и обратно и на овој начин – за граѓаните од двете земји ќе се намалат административните процедури и времето потребно за издавање овие документи.
Вториот документ е спогодбата меѓу министерствата за финансии и царинските управи на Северна Македонија и Србија за заемно признавање на издадените одобрувања за овластен економски оператор и третиот е спогодбата за соработка во фитосанитарната област и областа на безбедноста на храната и ветеринарство помеѓу министерствата за земјоделсрво на двете земји.
„Нашите намери за продлабочување на инфраструктурното поврзување продолжуваат и во делот на идентификување заеднички интереси и настапи за добивање поддршка за транспортни, инфраструктурни и енергетски проекти од обостран интерес во согласност со насоките од берлинскиот процес, од кои се очекува економската компонента на односите меѓу двете земји да продолжи да се унапредува преку континуираните B2B (Би-ти-би) средби на секторско ниво, на бизнис-форуми, како и со заедничко вмрежување за настап на трети пазари“, нагласи премиерот Заев и додаде дека заедно со соработката во туризмот со заедничка промоција на туристичката понуда на двете земји на трети пазари од посебен интерес и со големи очекувања се работи на иницијатива за заемно отворање културно-информативни центри во Белград и Скопје како уште еден вреден сегмент што ќе го зајакне традиционалното пријателство меѓу Северна Македонија и Србија.
„Наша трајна и непоколеблива заложба е да ги решаваме сите отворени прашања во регионот преку инклузивен дијалог во интерес на сите граѓани со цел одржување на трајниот мир, развој на демократијата, економијата и животниот стандард на граѓаните“, истакна Заев во завршницата на своето обраќање на заедничката прес-конференција со премиерката Брнабиќ.
Претседателката на владата на Република Србија, Ана Брнабиќ, во своето обраќање се задржа на значењето на спогодбите што денеска ги потпишаа претставниците на двете влади, што ќе ѝ дадат конкретна поддршка на работата на концептот One-stop-shop, заедничко управување на граничните и царински контроли со едно застанување на граничниот премин Табановце – Прешево.
Брнабиќ го оцени настанот на граничниот премин како историски и како инспирација за сите други земји од Западен Балкан за ваков тип соработка, кој ги приближува земјите до моделот на земјите на ЕУ кон кои се стремат сите земји од регионот. Брнабиќ се согласи со премиерот Заев дека надминувањето на вредноста на трговската размена на двете земји од 1 милијарда евра во 2018 година е силен мотив соработката да продолжи насочена кон иднината, а иднината на двете земји е членството во ЕУ. Во таа насока претседателката на владата на Србија, Брнабиќ, изрази надеж дека Северна Македонија набргу ќе ги почне преговорите со ЕУ и дека Србија е подготвена да ја даде максималната поддршка за Република Северна Македонија за остварување на оваа цел. Премиерите на двете земји потоа одговараа на прашања од интерес на новинарите од двете земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Касами: Тетово ја заслужува оваа трансформација – продолжуваме уште посилно со Второто поглавје за развој
Градоначалникот на Тетово и кандидат за нов мандат, Билал Касами, порача дека големата поддршка што ја добил на 19 октомври покажала дека Тетово е на вистинскиот пат, дека градот се менува, трансформира и се развива.
„Тетово докажа дека ја цени работата и сака овој развој да продолжи уште посилно. Ние возвраќаме на ова признание со уште повеќе работа,“ изјави Касами.
Тој денес беше на улицата Поточка, заедно со улиците 134 и Прохор Пчински, кои, како што истакна, биле целосно асфалтирани според современи стандарди.
„Изградивме нова современа улица со должина од речиси еден километар и асфалтирана површина од околу 5.000 квадратни метри. Со инвестиција од приближно 200 илјади евра, односно околу 12 милиони денари, ја трансформиравме оваа населба во близина на градинката кај Поточка, давајќи ѝ европски изглед,“ нагласи Касами.
Тој додаде дека Тетово ја заслужува оваа трансформација и модерни патишта, училишта, градинки, базени и услови за функционален и чист град.
„Добрите дела за Тетово мора да продолжат уште повеќе, уште подобро, уште посилно — со Второто поглавје за развој,“ порача градоначалникот Касами.
Македонија
Димитриевски: Проблеми имало и ќе има, со посветена работа ќе ги решаваме без да застанеме
Изборот во недела е јасен. Куманово мора да има континуитет и да продолжи по истиот пат. Проблеми имало и ќе има, но јас како градоначалник ви давам збор – заедно со мојот тим и со Советот на општината со посветена работа ќе ги решаваме без да застанеме и само во интерес на граѓаните, порача вчера од граѓанскиот собир во кумановската населба Гоце Делчев, кандидатот за градоначалник на Куманово и лидер на Движењето ЗНАМ –За наша Македонија, Максим Димитриевски.
„За разлика од другиот кандидат кој се залага за ред, а на кого му дадов мандат во јавното претпријатие да направи ред, тој го остави без ред и нема една шајка заковано. Јас Куманово од најзадолжена општина со над 15 милиони евра, воведов ред во работењето и ја направив финансиски најстабилна. Ред не се прави со трчање и џогирање. Ред се прави со работа и со излегување во пресрет на луѓето. Да им кажеш јасно и децидно – овој проблем може да се реши веднаш, а другиот не може веднаш и да им дадеш рок до кога ќе се разреши. А, не да даваме лажна слика дека ќе направиме се. Па не живееме во Кувајт, не лежиме на нафта, туку живееме во скромна, но горда Македонија“, рече Димитриевски.
Тој ги увери жителите на населбата дека е еден од нив, дека тоа досега со работа многу пати и го покажал и докажал, за разлика од другите, како што ги нарече, мамини и татини синови кои сметат дека функциите им припаѓаат по наследство. Повика на обединување на сите граѓани во недела масовно да гласаат сите за број 2 и да го направат Куманово најперспективно место за живеење и најголем логистички центар на Балканот, што ќе го направи заедно со Премиерот Христијан Мицкоски – со кого успешно соработуваат и носат решенија како парнтери во Владата.
На присутните, меѓу кои симпатизери и подржувачи на ВМРО-ДПМНЕ, симпатизери и подржувачи на Движењето ЗНАМ – За наша Македонија, како и многу други локални жители, им се обрати и пратеникот од редовите на ВМРО – ДПМНЕ, Бране Петрушевски, кој им посочи на присутните дека во Куманово во недела има два избора – од кои едниот значи враќање назад со политиките на Оливер Спасовски и неговите „пајташи“ кои претходно го уништија градот на секаков можен начин и кои сакаат на голема врата повторно да го вратат ДУИ на власт и во игра. „И, затоа се обединивме сите, да ги поразиме. И, ги поразивме тие
политики, а ќе ги поразиме уште посилно сега. Затоа што од оваа страна имате логичен избор – го имате Максим Димитриевски и оваа наша коалиција која на 2 ноември не треба само да победи – туку и да ги прегази таквите стари и ретроградни политики. Затоа е потребна убедлива победа против нив кои со византиски игри по секоја цена сакаат да се вратат на власт“, нагласи пратеникот Петрушевски.
На присутните се обратија и претседателот на Општинскиот комитет на ВМРО-ДПМНЕ, Бобан Николовски, како и Претседателката на Советот на Општина Куманово и носител на листа на Движењето ЗНАМ – За наша Македонија Ивана Ѓорѓиевска кои, исто так, повикаа на масовна излезеност на вториот круг во недела, за голема победа на актуелниот градоначалник, Максим Димитриевски, што ќе значи – раст, развој и просперитет на Куманово.
Македонија
(Видео) Илјадници пластични шишиња во Вардар, од Министерството за животна средина велат виновни се слабите комунални услуги
Министерството за животна средина и просторно планирање соопшти дека појавата на пластичен и друг амбалажен отпад во реката Вардар и другите водотеци се должи на незадоволителното ниво на комунални услуги, особено во руралните средини. На ова претходеа видео снимки на кои може да се забележат илјадници пластични шишиња во реката.
Од ресорното министерство нагласуваат дека во овие подрачја е евидентно присуство на диви депонии на јавни површини, за чија санација и контрола се надлежни општините и нивните инспекциски служби.
Министерството и Државниот инспекторат за животна средина, како што се наведува, континуирано укажуваат преку ЗЕЛС на потребата од редовно следење на состојбите со управувањето со отпадот и засилено присуство на општинските инспектори на терен.
Во моментов, Државниот инспекторат е во фаза на подготовка на измени на Законот за инспекциски надзор во животната средина, со цел воспоставување единствен систем на инспекциски надзор што ќе овозможи поефикасна контрола во оваа област.
Министерството апелира до општините, комуналните претпријатија и граѓаните за заедничка одговорност и делување во насока на зачувување на чистотата на реките и водните текови.

