Првообвинетиот Драги Рашковски е осуден на единствена казна затвор од осум години. Второобвинетиот Ивица Димитровски доби пет години казна затвор. На Игор Христов му е одредена казна од пет години и шест месеци. Четвртообвинетиот Даниел Станчев е осуден на 4 години. Ирена Ивановска доби три години и шест месеци, а хонорарците Игор Ивановски и Маја Силјановска добија по три години затвор. Казните ги изрече судечкиот совет, чиј претседател е судијката Фанка Јанчулева Михаиловска.

Што направиле

„Софтвери“ е предмет отворен по допрен глас од обвинителката Ивана Трајчева. Обвинението е за набавка на два софтвера и исплата на хонорари. Првиот софтвер е за сообраќајни прекршоци и биометриска идентификација, кој, според обвинителката, никој не ги користел, а Генералниот секретаријат со кој управуваше Рашковски ги набавил иако немал надлежност за тоа. Дополнително, обвинителката докажуваше дека тендерите биле наместени.

Вториот дел од обвинението е за хонорарите. Тој склучувал авторски договори со физички лица што не ги извршувале работните обврски. Според обвинението, тие подигнувале дел од парите и му ги враќале на Рашковски. Со тоа е направена штета на буџетот во вкупен износ од 1.320.000 денари.

За што се гонат

Првообвинет е Рашковски. Обвинет е дека сторил продолжено кривично дело злоупотреба на службената положба и овластувањето и кривично дело перење пари и други приноси од казниво дело. Дополнително, во текот на постапката му беше ставено на товар уште едно кривично дело – фалсификување исправа бидејќи презентира извод од банка со нецелосни податоци, а ги претставуваше како целосни.

Второобвинет е Ивица Димитровски, професор на Факултетот за информациски технологии и компјутерско инженерство (ФИНКИ) и ангажиран во Генералниот секретаријат. Се гони за кривичното дело злоупотреба на службената положба и овластувањето. Според обвинението, иако изготвувал техничка спецификација за тендерите, истовремено учествувал и во постапките за јавни набавки за нив – во едната како изведувач, во другата како подизведувач. И Димитровски се товари дека ги враќал парите што му биле исплаќани од Генералниот секретаријат.

Третообвинет е Игор Христов. Станува збор за сопственик фирмата „ГБЦ системи“. Доколку се следи текот на набавката на опремата, која секогаш завршувала во Генералниот секретаријат, ќе се утврди дека секоја фирма што склучила некој од четирите договори за јавни набавки ја набавила од неговата фирма. Истовремено, и тој бил надворешен соработник во Владата. Рашковски и сам призна дека се стари пријатели.

Даниел Станчев е четвртото обвинето лице. Тој е сопственик на фирмата „Инвока груп“ за која јавноста дозна кога беше утврдено дека користела простории на Правниот факултет, каде што предава првообвинетиот Рашковски. Според презентираните пораки од Обвинителството, тој бил во постојана комуникација со Рашковски кога се подготвувале тендерите, кога се спроведувала јавната набавка и се договараат за последна цена во јавната набавка. Сите овие пораки беа презентирани во судница, а Рашковски никогаш не ја демантира содржината, туку само дека не се гледа неговото име. Притоа обвинителката на секое рочиште потенцира кои лица и броеви биле во посочените вибер-групи, меѓу нив и Рашковски, потпишан како „Перо 078“. Дури и обвинетите кога контактирале меѓусебно, зборувале за „Перо“, а според обвинението, тоа е Рашковски. Тој негира дека има ваков прекар.

Хонорарците што се гонат дека зеле пари без да работат се Игор Ивановски и Маја Силјановска. Истовремено, хонорарец е и Ирена Ивановска, која ја има во комуникациите од вибер-групите заедно со Станчев и Рашковски. Обвинението е дека Ирена Ивановска им ги дава своите извештаи на својот брат Игор Ивановски и на Маја Силјановска за тие да ги достават извештаите само со сменето име. Дополнително, двајцата хонорарци Игор и Маја, според обвинението, враќале дел од парите што завршувале кај Рашковски.