Македонија
(Видео) СДСМ бара Христовски итно да се повлече од директор на АНБ: „Користењето на фалсификуван документ е криминал“
Социјалдемократскиот сојуз на Македонија повика Бојан Христовски итно да биде повлечен од директорската позиција на Агенцијата за национална безбедност.
Методија Илиевски од СДСМ на прес-конференција изјави дека користењето на фалсификуван документ е криминал.
„Бојан Христовски не ги исполнува законските услови за позицијата директор на АНБ. Користење на фалсификуван документ е криминал, а не само законски пропуст. Христовски нема соодветен меѓународно признат сертификат за познавање на англиски јазик, туку се користел со фалсификуван документ за да ја добие функцијата. Ова претставува кршење на законот и кривично дело за кое мора да одговара“, рече Илиевски и го повика Јавното Обвинителството да отвори постапка.
Од опозициската партија велат дека скандалозно е што тој бил Државен советник за криминалистички работи во МВР.
Партијата повика и на реакција на Државната комисија за спречување на корупција (ДКСК), која треба да ги потврди информациите и да се изјасни по ова прашање.
„Повикуваме на транспарентна истрага, која ќе утврди кој го овозможил ова кривично дело и кој е одговорен за неговото назначување. Одговорност и оставка од Мицкоски, кој свесно ги партизира институциите со поставување на лица без квалификации и нарушен интегритет“, додаде Илиевски.
СДСМ претходно денес објави дека сертификатот за англиски јазик на Христовски е лажен и дека центарот во Пловдив – Бугарија каде што тој тврди дека го добил, не постои. Покрај сертификатот, СДСМ тврди дека Христовски нема ниту безбедносни сертификати ниту доволно работно искуство на раководни позиции, што е предуслов за назначување на позицијата директор.
Информацијата во јавноста првично ја објави бугарскиот портал Фактор.бг, кој тврди дека во Пловдив не постои центар за странски јазици „Јулија“ за полагање на испити, чиишто сертификат го пријавил новиот директор на АНБ.
Фактор.бг ги проверил податоците на училиштето за странски јазици Julia Co.LTD кое е наведено во биографијата на Христовски како издавач на неговиот ТОЕФЛ сертификат за познавање на англиски јазик, но на посочените адреси во Пловдив немало такво јазично училиште. Порано таму била сместена компанијата Julia Co.LTD, но сега канцеларијата е затворена, и таа фирма чија примарна дејност е преведување и консултации при вработување сега работи онлајн. Во телефонски разговор на новинарот на фактор.бг со жената која одговорила на телефонскиот број од брошурата на фирмта им било посочено дека компанијата во моментот не издава сертификати за TOEFL и не организира обука за добивање на таков сертификат за познавање на англискиот јазик. Жената не се сеќава ниту дали „Јулија“ некогаш спроведувала обука по овој систем порано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Општините го добиваат првиот дел од 250 милиони евра за реализација на капиталните инвестиции
Во Владата денес беше потпишан договорот од првата транша од проектот 250 милиони евра за капитални инвестиции во општините.
Дел од тие средства ќе бидат реализирани во овој буџет, останатиот дел дополнет со оние средства коишто недостигаат ќе биде со следниот буџет за следната година.
Премиерот Христијан Мицкоски, на настанот истакна дека согласно првиот повик кој го објави Министерството за локална самоуправа денес се вклучени договорите за 274 проекти во вкупна вредност од околу 4.1 милијарди денари.
„Ова е наше клучно ветување до граѓаните и е доказ за нашата посветена работа за инфраструктурни инвестиции и директна поддршка на илјадници граѓани. За само три месеци овој проект станува реалност и сега почнува процесот на она што ќе придонесе за промена на тешката реалност и отсуството на поддршка на општините“, рече Мицкоски.
За инфраструктурни проекти од областа на образованието и науката за 2024 година се издвојуваат речиси 133 милиони денари (132.619.804 денари). Со оваа одлука се опфатени општините Гази Баба, Битола, Липково, Боговиње, Кичево и други, а проектите се однесуваат на реконструкции, изградби и модернизирање на училишта и спортски сали и унапредување на условите за образование.
За инфраструктурни проекти од областа на транспортот ќе се инвестираат 2 милијарди и 800 милиони денари (2 786.655.032 денари). Опфатени се општини како Берово, Аеродром, Битола, Брвеница, Богданци, Босилово, Бутел, Валандово, Вевчани, Велес, Врапчиште, Гази Баба, Гевгелија, Гостивар, Градско, Дебар, Делчево, Демир Капија, Дебарца, Демир Хисар, Дојран, Долнени, Ѓорче Петров, Желино, Зелениково, Зрновци, Илинден, Јегуновце, Кавадарци, Карпош, Карбници, Крива Паланка, Крушево, Маврово и Ростуше и други. Овие проекти се инвестиции во локална патна мрежа, коловози, патеки, пристапни улици.
За инфраструктурни проекти од областа на Министерството за социјална политика, демографија и млади ќе се инвестираат околу 59 милиони денари (58.573.514 денари), кои ќе бидат употребени за изградба на нови детски градинки во Петровец и Гази Баба.
Во областа на спортот за што се потпишуваат договори во висина од 220 милиони денари (220.064.186 денари) и тоа за изградба на центри за спорт, рекреативни паркови, и спортски сали во Вевчани, Демир Хисар, Центар, Битола, Кавадарци, Чашка. За културата и туризмот се предвидени близу 200 милиони денари (199.460.590 денари) за реставрација на културни знаменитости, туристички атракции, музеи, домови на култура во Гевгелија, Пехчево, Радовиш, Гази Баба.
За проекти во областа на животната средина и просторното планирање ќе се инвестираат близу 630 милиони денари (629.263.261 денари) за инвестиции во изградба на атмосферски и фекални канализации, колектори, нови водоводи, регулации на реки и други проекти. Со оваа одлука се опфатени општините Василево, Берово, Шуто Оризари, Пехчево, Пробиштип, Тетово, Бутел, Могила, Делчево, Врапчишта, Липково, Кисела Вода, Чаир, Арачиново, Охрид, Росоман, Чучер Сандево и други.
Премиерот рече дека ова е историски најголемата инвестиција на централната власт за локалните самоуправи и ќе продолжат јавните повици се до целосно искористување на предвидените 250 милиони евра. До општините апелира да изработуваат квалитетни проекти кои ќе бидат реализирани.
Македонија
Мицкоски е уверен дека Христовски ги исполнува условите за директор на АНБ, ја повика Антикорупциската комисија случајот да го стави на брза трка
Премиерот Христијан Мицкоски е уверен дека директорот на Агенцијата за национална безбедност, Бојан Христовски, ги исполнува законските услови.
Прашан од новинарите дали ќе бара одговорност од Христовски поради наводите кои се појавија за лажен сертификат по англиски јазик, Мицкоски изјави дека ќе го направи тоа ако го констатира соодветна институција.
Премиерот рече дека ваквите тврдења излегуваат од опозициската СДСМ и исплашените поранешни разузнавачи кои ваквите агенции ги претвориле во тврдина за борба против нив, во времето кога биле опозициска партија.
„Дополнително ме мотивира кога овие кодошко удбашки инсталации во СДСМ и ДУИ напаѓаат чесни луѓе кои си ја сакаат и работат за оваа татковина“, рече Мицкоски.
На коментарот на новинарите дека тврдењата за сертификатот беа објавени од бугарскиот сајт „Фактор“, и прашањето дали разговрал со Христовски, Мицкоски ја изрази увереноста дека се’ е по закон, а потоа ја повика Антикорупциската комисија, како најнадлежна институција да истражи и да го стави случајот на брза трака.
„Јас сум уверен дека ги исполнува условите. Зарем ќе дозволиме такво нешто да се случи. Тој сертификат е издаден од 2022 година. Сега во меѓувреме дали постоела или не постоела таа агенција, тоа е друго прашање. Имаме институции и систем кој функционира“, рече Мицкоски.
Додаде дека удбашко-комунистичките инсталации кои се обидуваат да им вршат притисок имаат зошто да се плашат, бидејќи информациите коишто доаѓаат од таму се катаклизмични.
Во биографија на Бојан Христовски стои дека тој се стекнал со сертификат за владеење на англиски јазик според системот ТОЕФЛ, со полагање на испитот во 2022 во јазичното училиште Language School Julia Cо.LTD во Пловдив.
Македонија
Кога ќе се констатира грешка, се презема одговорност, тоа е доблесно, рече Мицкоски за оставките на членовите во Комисијата за помилување
Жив човек кој што работи знае и да погреши. Кога ќе се констатира грешката се презема одговорност, тоа е доблесно. Вака премиерот Христијан Мицкоски ги искоментира оставките на сите членови на Комисијата за помилување.
„Констатирана е грешката и единственото нешто што тие го имаат како морален чин е да се повлечат, а тоа и го направија. Така што очекувам тука да се затвори таа тема во јавноста“, изјави Мицкоски, одговарајќи на новинарско прашање на настан по повод потпишување на договорот од првата транша од проектот 250 милиони евра за капитални инвестиции во општините.
Членовите на Комисијата за помилување вчера поднесоа колективна оставка, соопшти професорот Гордан Калајџиев.
Oставките дојдоа во моментот кога помилувањата кои ги потпиша претседателката Гордана Сиљановска-Давкова предизвикаа бројни реакции во јавноста.
Одлуката за помилување на осуденици, претседателот на државата ја носи по препорака на Комисијата за помилување, која е постојано работно тело во служба на претседателот.