Македонија
(Видео) СДСМ бара Христовски итно да се повлече од директор на АНБ: „Користењето на фалсификуван документ е криминал“

Социјалдемократскиот сојуз на Македонија повика Бојан Христовски итно да биде повлечен од директорската позиција на Агенцијата за национална безбедност.
Методија Илиевски од СДСМ на прес-конференција изјави дека користењето на фалсификуван документ е криминал.
„Бојан Христовски не ги исполнува законските услови за позицијата директор на АНБ. Користење на фалсификуван документ е криминал, а не само законски пропуст. Христовски нема соодветен меѓународно признат сертификат за познавање на англиски јазик, туку се користел со фалсификуван документ за да ја добие функцијата. Ова претставува кршење на законот и кривично дело за кое мора да одговара“, рече Илиевски и го повика Јавното Обвинителството да отвори постапка.
Од опозициската партија велат дека скандалозно е што тој бил Државен советник за криминалистички работи во МВР.
Партијата повика и на реакција на Државната комисија за спречување на корупција (ДКСК), која треба да ги потврди информациите и да се изјасни по ова прашање.
„Повикуваме на транспарентна истрага, која ќе утврди кој го овозможил ова кривично дело и кој е одговорен за неговото назначување. Одговорност и оставка од Мицкоски, кој свесно ги партизира институциите со поставување на лица без квалификации и нарушен интегритет“, додаде Илиевски.
СДСМ претходно денес објави дека сертификатот за англиски јазик на Христовски е лажен и дека центарот во Пловдив – Бугарија каде што тој тврди дека го добил, не постои. Покрај сертификатот, СДСМ тврди дека Христовски нема ниту безбедносни сертификати ниту доволно работно искуство на раководни позиции, што е предуслов за назначување на позицијата директор.
Информацијата во јавноста првично ја објави бугарскиот портал Фактор.бг, кој тврди дека во Пловдив не постои центар за странски јазици „Јулија“ за полагање на испити, чиишто сертификат го пријавил новиот директор на АНБ.
Фактор.бг ги проверил податоците на училиштето за странски јазици Julia Co.LTD кое е наведено во биографијата на Христовски како издавач на неговиот ТОЕФЛ сертификат за познавање на англиски јазик, но на посочените адреси во Пловдив немало такво јазично училиште. Порано таму била сместена компанијата Julia Co.LTD, но сега канцеларијата е затворена, и таа фирма чија примарна дејност е преведување и консултации при вработување сега работи онлајн. Во телефонски разговор на новинарот на фактор.бг со жената која одговорила на телефонскиот број од брошурата на фирмта им било посочено дека компанијата во моментот не издава сертификати за TOEFL и не организира обука за добивање на таков сертификат за познавање на англискиот јазик. Жената не се сеќава ниту дали „Јулија“ некогаш спроведувала обука по овој систем порано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ во паника, клевети од страв од пораз, каде се вработени сопругата и сестрата на Бујар Османи, прашуваат од „Вреди“

Партијата прогласена за Non Grata од меѓународниот фактор реагирала на вработувањата на Албанците во државните институции. Тие преку клевети сакаат да ги покријат своите неуспеси во периодот додека повеќе од две децении беа на власт, велат од „Вреди“.
Широката јавност, потсетуваат од таму, многу добро знае дека тие 20 години се грижеа единствено за вдомување на своите семејства, и тоа на работни места каде месечната плата е повеќекратно повисока од просечната во РСМ.
„Наместо да дадат отчет зошто Албанците ги претворија во администратори без работа и зошто ги оставија без реална застапеност, функционерите на ДУИ избираат да клеветат.
На оние што излегуваат на прес-конференции, им порачуваме да се вратат во канцеларија и да го прашаат својот шеф Бујар Османи, кој е и шеф на штаб, и кандидат за градоначалник, а воедно и потпретседател на партијата, зошто ги лаже!
Нека го прашаат Османи каде е вработена неговата сопруга, чие име од коректност нема да го спомнеме? Но, пред да прашаат, ние им откриваме дека сопругата на Бујар Османи зема месечна плата над 100 илјади денари, што изнесува колку четири плати на администратори кои ДУИ ги лажеше повеќе од 20 години.
Исто така, нека прашаат каде е вработена неговата сестра и колкава е нејзината месечна плата“.
Албанците, според „Вреди“, добро знаат дека во М-НАВ, сестрата на Бујар Османи зема месечна плата над 3 илјади евра, што е колку шест плати на еден друг администратор.
„Вреди“ како што истакнуваат, нема повеќе да наведува имиња, но предупредува дека во наредните денови целосно ќе го обелодени непотизмот и вработувањата на семејствата на ДУИ во последните 20 години, со име и презиме.
„За направените клевети ќе се иницира соодветна постапка доколку не биде побарано јавно извинување од ДУИ“.
Македонија
Јаневска: Образовниот систем ќе има клучна улога во остварувањето на целите од Стратегијата за соработка со СЗО

Националната стратегија за соработка со Светската здравствена организација во следните пет години ги утврдува здравствените приоритети на државата, кои ќе се реализираат во соработка со СЗО и агенциите на ОН, како УНИЦЕФ и УНФПА, преку клучните владини министерства, институции и граѓанското општество. Ова го нагласи министерката за образование и наука Весна Јаневска на презентацијата на Првата стратегија за соработка на СЗО со Македонија 2026–2030.
„Здравјето е основа на одржлив развој на секоја држава. Наша цел е да изградиме отпорен здравствен систем, заснован на еднаков пристап, превенција, дигитална трансформација и компетентни човечки ресурси. Неопходно е да ги унапредиме јавните политики за да можат да одговорат на комплексните здравствени предизвици со кои се соочува Македонија. Во реализацијата на оваа важна и одговорна задача Министерството за здравство не е само“, нагласи министерката Јаневска.
Преку подобрување на наставните програми, модернизација на лабораториите и практичните обука, поддршка за континуирана едукација на здравствените работници и соработка со универзитети и здравствени установи, Јаневска укажа дека воспитно-образовниот систем подготвува генерации со знаење, вештини и ставови потребни за препознавање, разбирање и ефективно справување со здравствените предизвици.
„Образованието има суштинска улога во развојот на систем што се грижи за сите и не остава никого зад себе. Училиштето формира вредности на еднаквост, развива чувство за грижа кон ранливите и создава капацитет за препознавање и спречување на насилство, занемарување и повреди, што е еден од приоритетите во Стратегијата“, рече Јаневска.
Таа се заблагодари на Светската здравствена организација за помошта во изготвувањето на Протоколот за реализација на настава во услови на топлотен бран, како и за обуките на околу 700 стручни соработници од основните и средните училишта за психосоцијална помош и поддршка во унапредување на добросостојбата и менталното здравје на децата и младите во образовните, здравствените и загрижувачките институции и средини.
Стратегијата за соработка со СЗО е петгодишен документ дизајниран да ги поддржи нашите национални здравствени цели, обврските поврзани со пристапувањето кон ЕУ, како и глобалните Цели за одржлив развој. Мултиресорскиот пристап кон нејзината реализација е услов за градење здравствен систем што ги следи протоколите, истовремено темелејќи се на вредности како човечност, правичност и грижа.
Македонија
За развој на лидери и менаџери меѓу административците Министерството за јавна администрација ќе соработува со ВИТА Институтот

Министерството за јавна администрација и ВИТА Институт за истражување, едукација, менаџмент консалтинг и коучинг од Скопје, денес потпишаа Меморандум за соработка со цел унапредување на професионалните, менаџерските и лидерските капацитети на јавната администрација.
Овој Меморандум ја потврдува целосната заложба на Министерството за развој и јакнење на човечките ресурси на сите нивоа во јавната администрација.
Преку оваа соработка, Министерството за јавна администрација ќе обезбедува системски пристап кон професионалната едукација и континуираното јакнење на човечките ресурси на сите нивоа во јавниот сектор. Дополнително соработката со ВИТА Институт во рамки на програмите за менаџерски и лидерски развој ќе ја унапреди професионалноста, ефикасноста и современото управување во јавната администрација.
„Овој Меморандум ја потврдува нашата заложба за континуиран развој на јавната администрација и зајакнување на капацитетите на службениците на сите нивоа, со цел обезбедување професионална и ефикасна услуга за граѓаните“, истакна Горан Минчев, министер за јавна администрација.
ВИТА Институт, пак, преку своите програми придонесува кон развојот на лидерските и менаџерските капацитети преку примената на универзални принципи и пренос на добри практики од приватниот сектор и меѓународни искуства од јавниот сектор.
Со тоа се овозможува стекнување на применливи знаења и практични вештини кои директно ги поддржуваат реформските и развојните цели на институциите.
„Со ова партнерство ги комбинираме знаењата и експертизата од приватниот и јавниот сектор за да создадеме програми кои директно ги поддржуваат лидерските и менаџерските развојни цели на јавната администрација,“ – потенцира Христина Велковска, директорка на ВИТА Институт.
Министерството за јавна администрација и ВИТА Институт ќе соработуваат во повеќе области, вклучително размена на информации, усогласување на годишните програми за едукација, организирање на едукативни настани и конференции, како и примена на иновативни методи и меѓународни добри практики.