Македонија
(Видео) СДСМ: Градоначалникот на Кисела Вода склучувал договори со роднини, пријатели и со медиумски поддржувачи

Градоначалникот Орце Ѓорѓиевски склучувал договори со роднини, пријатели и со медиумски поддржувачи блиски до ВМРО-ДПМНЕ, изјави на прес-конференција Гордан Шутаров, генерален секретар на СДММ и советник во Советот на Град Скопје.
Тој рече дека во време на најголема економска и енергетска криза локалната власт на ВМРО-ДПМНЕ, наместо работа и исполнување на ветеното, целиот фокус им е ставен на партиски вработувања, трошење пари и полнење на џебовите на свои роднини и пријатели.
„Градоначалникот на Кисела Вода, Орце Ѓорѓиевски, нема реализиран ниту еден свој проект досега. Но, затоа има куп склучени договори за вработувања, меѓу кои и голем број со авторски договори. Преку договори со суми од 40, па и од 50.000 денари, парите на граѓаните завршуваат кај членови на ВМРО-ДПМНЕ, нивни роднини, пријатели, па дури и нивни медиумски поддржувачи.
Само во еден месец, ноември 2021 година, Орце Ѓорѓиевски склучил 11 вакви договори, кои се продолжени и во оваа 2022 година. Славче Трпевски, партиски кадар на ВМРО-ДПМНЕ, поранешен директор на Катастарот, против кого има кривична пријава за злоупотреба на службената положба и овластувањето.
Еве го тој договор. На партискиот кадар на ВМРО-ДПМНЕ, Ѓорѓиевски му обезбедил 40.000 денари, а има и анекс на договорот.
Наталија Митовска од порталот „Инфомакс“, медиум кој е под директна контрола на ВМРО-ДПМНЕ, исто така има договор со Општина Кисела Вода. Со парите на граѓаните очигледно се плаќаат пропагандата на ВМРО-ДПМНЕ и ширењето лажни вести.
Еве го договорот на Митовска, 24.000 денари месечно, но има и анекс на договорот, како нешто да не било доволно. Исто како Трпески, и таа е ангажирана за изготвување извештај со елаборирање за спроведување програма на месна самоуправа.
Тоа не е сѐ, на списокот со партиски договори на Орце Ѓорѓиевски има и роднини и лични пријатели на градоначалникот.
Сара Ѓорѓиевска – роднина, поточно братучетка на градоначалникот, исто така има договор вреден 30.000 денари.
Прием на странки, телефонски разговори и прием на пошта. Како од цела општина да немало човек за оваа работа, па морало братучетката на градоначалникот да биде наградена.
Договор има и за Кирил Митревски, близок пријател на градоначлникот, вреден 50.000 денари, но и многу други лица блиски до ВМРО-ДПМНЕ, како Влатко Стојановски, Кирил Димчевски, Сашо Јовановски, Ленче Алтова и др.“, изјави Шутаров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.