Македонија
(Видео) СДСМ: Aрсовска си ја наместила мајка си во Државниот совет за статистика

Градската организација на СДСМ денеска обелодени докази за кои велат дека покажуваат оти претседателката на ССК, Данела Арсовска, ѝ овозможила на мајка си Марика Јовановска да стане член на Државниот совет за статистика како предлог на ССК и да зема по 10.000 денари од седница.
Според СДСМ, мајката Марика Јовановска станала член на Советот за статистика по предлог на Сојузот на стопанските комори на Македонија кога ќерка ѝ Данела Арсовска била претседател на ССК.
Како докази беа приложени: номинацијата на Марика Јовановска, мајка на Данела Арсовска (со моминско презиме Јовановска), доставена до Илија Димовски, претседател на Комисијата за прашања на изборите и именувањата во 2019; биографија на номинираната од ССК – Марика Јовановска и извадок од „Службен весник“ бр. 107 од 28 мај 2019, со одлука за именување членови на Советот за статистика, каде што како член е именувана Марика Јовановска, раководител на сектор за набавки во „Титан“ по предлог на Сојузот на стопанските комори на Македонија.
„Има ли појасен случај на непотизам од овој? Само личност што не поседува чесност и личен интегритет, како претседател на ССК, може да овозможи мајка ѝ да биде номинирана и избрана за член на Советот за статистика, каде што хонорарот изнесува 10.000 денари од седница“, обвинуваат од градската организација на СДСМ.
Од таму, воедно, ја повикуваат Државната комисија за спречување на корупцијата да го испита случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кривична пријава против полициски службеници од сообраќајна патрола во Скопје за „попречување на правдата“

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција поднесе кривична пријава против Д.К. на работно место помлад полицаец и Б.Д. на работно место полицаец за безбедност на патниот сообраќај во Единицата за безбедност на патниот сообраќај при СВР Скопје.
Пријавените како службени лица – полициски службеници на 20.04.2025 година со намера да го спречат и отежнат докажувањето, прикривале и фалсификувале документи што може да послужат како доказ во постапка пред суд или друг орган надлежен за водење на постапка уредена со закон, на начин што првопријавениот издал прекршочен платен налог и записник за сторен сообраќаен прекршок на име на лице од Скопје за сторен прекршок, а потоа за да го прикрие прекршокот на лицето, ги преправил и фалсификувал прекршочниот платен налог и записникот за сторен сообраќаен прекршок на начин што на вториот примерок врз податоците нанесени со индиго од првиот примерок со пенкало ги внел податоците од друго лице од Скопје, иако ова лице воопшто наведениот ден не го контролирале ниту од нивна страна било запрено за сторен прекршок, а кое од претходно им било познато како чест извршител на сообраќајни прекршоци.
Второпријавениот, како одговорен на патролата иако знаел дека првопријавениот констатирал прекршок на лице од Скопје, а потоа на прекршочниот платен налог и записникот за сторен сообраќаен прекршок врз податоците на лицето сторител на сообраќајниот прекршок ги внел податоците на друго лице, му помогнал до го изврши кривичното дело, со тоа што во пополнувањето на прегледот на контролирани моторни возила и на извештајот од 20.04.2025 година за радар ги внеле податоците на сторителот на сообраќајниот прекршок, а потоа откако првопријавениот ги фалсификувал и преправил наведениот налог и записник, врз податоците на сторителот на прекршокот ги внеле податоците на друго лице и вака преправениoт преглед на контролирани моторни возила и извештај од 20.04.2025 година за радар, по завршувањето на работните задачи, ги приложиле заедно со наредбата за вршење дејност во Одделението за безбедност на патниот сообраќај Скопје.
Одделот за внатрешна контрола, криминалистички истраги и професионални стандарди против полициските службеници ќе поведе предлог за поведување на постапка за кршење на работниот ред и дисциплина и ќе изрече задолжителна мерка за отстранување од работно место – суспензија до завршување на дисциплинската постапка.
Македонија
СДСМ: Владата на ДПМНЕ се фали со наши проекти, овој пат во Кавадарци

Владата предводена од ВМРО-ДПМНЕ, продолжува со познатата практика на сликање покрај проекти од претходната Влада, велат од СДСМ.
„Последен пример е Кавадарци, каде премиерот Мицкоски, членови на владата и градоначалникот Јанчев се фалеа со проекти како што се колекторскиот и канализацискиот систем во населеното место Моклиште, проекти кои беа планирани, финансисрани, започнати и во напредна фаза на реализација токму во време на Владата предводена од СДСМ.
Добро е што овие проекти се завршњни но граѓаните знаат: овие проекти се резултат на одговорна и визионерска политика на СДСМ која секогаш работеше во интерес на сите граѓани.
За жал, после 10 месеци Вадата на ВМРО-ДПМНЕ нема ниту еден сопствен капитален проект“, се вели во нивната реакција.
Македонија
Меџити: Во Кавадарци инвестираме над еден милион евра во подобрување на водната инфраструктура

Првиот заменик претседател на Владата и министер за животна средина и просторно планирање Изет Меџити денес беше во посета на општина Кавадарци како дел од владината делагација предводена од премиерот Христијан Мицкоски која направи увид во реализацијата на повеќе проекти од различни области што се реализираат со државна помош.
Меџити најави дека во Кавадарци, заедно со општината, Владата преку Министерството за животна средина и просторно планирање се финансираат три проекти во делот на подобрување на водната инфраструктура со вкупна вредност од 1 милион и 300 илјади евра, од кои околу 1 милион евра се неповратни грант средства државна помош, а 300 илјади евра е сопствена контрибуција на општината. Овие средства се обезбедени преку кредитната линија од Европската инвестициска банка наменета за сите општини во државата.
„Во село Моклиште градиме на водоводна и канализациона мрежа во должина од 6.4 километри и резервоар со капацитет од 150 метри кубни. Во самиот град Кавадарци ја градиме водоводната и канализационата мрежа во блок 5.9 ул. „Вељко Влаховиќ“ со што за оваа новоизградена населба ќе обезбедиме поврзување на станбените објекти со постоечката водоводна и канализациона мрежа за 400 домаќинства и набавуваме водомери со далечинско отчитување за замена или поставување на нови мерни инструменти за над 2000 домаќинства“ изјави Меџити.
Според него, со овие проекти Владата и Министерството за животна средина вложуваат во подобрувањето на животниот стандард на кавадарчани и социо-економскиот развој на општината. Од друга страна државата ја помага општината и со имплементација на нова современа технологија за точно отчитување на потрошената вода со што ќе се намалат загубите на вода на територија на Oпштината и ќе се овозможи одржливо и економично управување со водните ресурси, со што се заштитува и животната средина.