Без исказот од заштитениот сведок, пресудата за „Монструм“ не може да опстане, тврди адвокатот Асмир Алиспаиќ, бранител во случајот за убиството на младите момчиња кај Смилковското Езеро. Тој бара Врховниот суд да изрече ослободителна пресуда за лицата што се осудени дека го извршиле крвавиот масакр за празникот Велигден. Укажуваше и на незаконски постапувања во текот на постапката, која се водеше во Кривичен, а потоа и во Апелација.

„Она што сакам да потенцирам, а тоа е во поглед на т.н. нови сведоци, кои продефилираа во првостепената постапка. Тие само дополнително докажаа дека овој предмет треба да добие една единствена ослободителна пресуда. Но, за жал, ни првостепениот суд немаше храброст и доблест да ја донесе таа одлука, а ниту второстепениот суд, ние очекуваме дека највисокиот суд нема да иде против заземениот став со пресудата, која е потенцирана од наша страна.
Втор момент во врска со незаконитоста на тие докази, отворете го извештајот, кој е направен по барање на СЈО изработен од МВР во поглед на постоење или непостоење писмени валидни наредби издадени од истражен судија. Тоа е потенцирано во тој извештај, а сето тоа како одлука го има и Врховниот суд со одлука во која е потврдено дека докази прибавени на незаконит начин не може да бидат употребени во кривична постапка. Очекуваме една и единствена одлука, а тоа е да се укинат одлуките и предметот повторно да се врати на одлучување пред пониските судови“, рече адвокатот Алиспаиќ.

Тој посочи дека ако заштитениот сведок и неговите искази ги нема во предметот, ќе немало ниту докази. Со ова адвокатот укажува дека пресудата се темели само на овој исказ.

„Ние како одбрана не очекуваме ништо надвор од она што како став го има заземено претходниот судечки совет, кој одлучивал по нашите жалби и донел одлука да се уважат тие наши жалби, тоа е на 31.10.2017 година. Токму и во јавнодостапната одлука на Врховниот суд јасно се укажува во делот на она што се вели теорија на случај на Јавното обвинителство. Од наша страна беше посочено дека таа теорија може да опстане со два споредни клучни доказа, тоа се исказите на заштитениот сведок и наводната изјава, која според нив е прибавена на законит начин на сега обвинетиот Хаки Азири. Ако ги немаме повеќе заштитениот сведок и исказите на зашитениот сведок, тогаш се поставува прашањето како може да опстане повторно една ваква пресуда, каде што ни првостепениот ни второстепениот суд не постапил по овие јасни напатсвија, на кои ги укажа Врховниот суд. Таа одлука, според мене, не е доволно експолатирана во јавноста и кај лицата што се заинтересирани овој предмет да добие релевантна правна завршница во поглед на постоење или непостоење на кривичното дело“, додава Алиспаиќ.

За убиството на момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута. Врховниот суд во 2017 година ги укина пресудите, ги ослободи од притвор осудените Агим Исмаиловиќ, Хаки Азири, Сами Љута и Фејзи Азири. Предметот беше вратен на повторно судење. Во 2018 година случајот го презеде поранешното СЈО. Во септември 2019 година предметите на СЈО ги презеде Основното јавно обвинителство за гонење организиран криминал. На повторно судење, во 2021 година, Кривичниот суд изрече три доживотни казни за бегалците Алил Демири и Африм Исмаиловиќ, како и за Агим Исмаиловиќ. Обвинетиот Хаки Азири беше осуден за помагање за што доби единствена казна во траење од 9 години. Фејзи Аризи е осуден за помагање сторител по извршено кривично дело на 15 години затвор.