Македонија
(Видео) Со кампања за правилно миење раце, ќе се спречи ширењето зарази во училиштата

Преку кампања за правилно миење раце и одржување на хигиената во училиштата, ќе се подига свеста кај децата за да се избегнат ширењето на бактериите и појавата на разни заразни болести, рече Ирина Сотирова-Бухова, директорка на Државниот санитарен и здравствен инспекторат, која го најави проектот што почнува во училиштата во општина Центар. Сотирова-Бухова рече дека потребата од ваква кампања доаѓа по сознанијата од истражувањата дека голем дел од децата воопшто не ги миеле рацете додека се на училиште.
„Нашата цел е да ги посетиме сите основни училишта, почнувајќи од општина Центар, и на соодветен начин да ги едуцираме учениците како да изградат правилни хигиенски навики. Постојат низа примери за вакви кампањи во голем број европски земји и ние како Државен санитарен и здравствен инспекторат утврдивме да го следиме овој пример и да ја спроведеме оваа активност“, изјави Сотирова-Бухова.
Покрај учениците во процесот на едукација што ќе го спроведат стручни лица, ќе бидат вклучени и вработените во училиштата.
„Правилното миење на рацете со сапун ги отстранува бактериите, кои се причинител за разни болести, пред сè, дијареја. Речиси 80 отсто од децата што имале дијареја ја добиле во училиштата. На овој начин ќе се спречи и појавата на инфекции на дишните патишта, како што се пневмонијата и грипот, кои се најчестите болести кај децата на оваа возраст“, рече д-р Весна Герасимовска, специјалист интернист и нефролог.
Како што беше најавено на денешната прес-конференција, првата едукативна работилница ќе се одржи на 21 декември во ОУ „Киро Глигоров“, а подоцна ќе бидат вклучени и другите училишта во општина Центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ вели дека економијата се стабилизира од пустошот и хаосот кој го остави СДСМ

Економијата се стабилизира од пустошот и хаосот кој го остави СДСМ после 7 години катастрофално менаџирање, лоши економски политики и отсуство на мерки и проекти, велат од ВМРО-ДПМНЕ.
„После 7 години откако СДС ја уништи економијата и го срози стандардот на граѓаните, од голем минус стопанството и трговијата во индустријата се стабилизираа. Индикаторите за првиот месец од вториот квартал се високи, што покажува дека состојбата е стабилизирана во рамките на нула. Имаме раст на трговијата во индустријата од 6%, раст на преработувачката индустрија од 6,6%. Раст на прометот со трговијата во индустријата на меѓународниот пазар, каде имаме многу повеќе раст од домашниот. Прометот во трговијата во индустријата надвор е околу 7,5 – 7,6 проценти. За краток период Владата предводена од ВМРО ДПМНЕ исто така успеа да ги стабилизира буџетските приходи, и енормно да ја зголеми довербата на инвеститорите. Владата работи посветено со домаќински скроен буџет, се зголемија платите во клучни сектори како здравство, образование, полиција, се работи на конкретни мерки и проекти за намалување на невработеноста со цел подобар и поквалитетен живот на граѓаните“, се вели во соопштението на ВМРО-ДПМНЕ.
Македонија
Денес протест пред МВР поради одложеното рочиште за убиството на кучето Феликс

Денеска пред Министерството за внатрешни работи во 12 часот ќе се одржи протест поради одложеното рочиште за убиството на кучето Феликс.
Протестот го организира граѓанската иницијатива „Зелен хуман град“ заедно со активистички здруженија и групи за заштита на животните од држава.
-На 15 јуни во 12 часот ве повикуваме на мирен, но гласен и масовен протестен марш што ќе започне пред Министерството за внатрешни работи! Кога едно убиство — најтежок облик на кривично дело — останува неказнето, тоа е тешка повреда на правниот и на моралниот поредок во целото општество. Кога убиец останува на слобода се губи доверба во институциите (полиција, обвинителство, судство), се праќа порака дека животот нема вредност, се поттикнува култура на страв и молчење, наместо правда и одговорност, а насилството се нормализира! Кога нема казна, има повторување! Правдата не е избор, туку обврска на секое демократско и хумано општество! Феликс — симбол на добрината, верноста и кроткоста — беше брутално убиен. Феликс не беше само уште едно бездомно куче, не беше само уште една несреќна жртва! Неговото убиство не смее да помине неказнето! Правдата не дискриминира по вид. Живот е живот! Судот мора да изрече затворска казна ако сакаме и најмал зрак на надеж дека слични дела нема да се повторуваат во иднина!, велат од здруженијата.
Здруженијата бараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од една година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.
Македонија
По половина час се чека на граничните премини Табановце и Богородица

На граничните премини Табановце и Богородица, времето на чекање за влез и излез од државата изнесува околу 30 минути. На останатите гранични премини од македонска страна, нема подолги задржувања за влез и излез од државата.
Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е умерен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.