Македонија
(Видео) Спасовски до Кочовска: Дали има одлука за исплата на средства за семејствата на загинатите и повредените во Кочани

Пратеникот на СДСМ, Оливер Спасовски на денешната собраниска седница посветена на пратенички прашања, упати прашање до министерката за финансии, Гордана Димитриеска-Кочоска, кое се однесуваше на одлуката да изврши исплати на средства од Буџетот на државата на семејствата на починатите и повредените во трагедијата во Кочани и ако има таква одлука, колку средства се исплатени на семејствата на загинатите и повредените.
Тој реагираше во однос на присуството на членовите на Владата.
„Имаме обврска денес, односно тие имаат обврска да бидат присутни на седницата. Имаме известување само од двајца министри дека не можат да присуствуваат и дека ќе бидат нивните заменици. Меѓутоа, гледаме и повеќе министри коишто не се присутни, ниту има заменици, за да можеме да ги поставиме пратеничките прашања“, кажа Спасовски.
Околу прашањето за Кочани Спасовски посочи дека граѓаните покажаа сериозна солидарност.
„Беа отворени сметки на кои се уплаќаа финансиски средства од граѓаните како помош за настраданите. Тие финансиски средства, пред сè, беа на сметките кои ги имаше отворено Црвениот крст на Република Северна Македонија. Според последното соопштение, стои дека за настраданите од пожарот во Кочани се собрани досега 156.542.967 денари, и тоа заклучно со 23.05.2025 година. Во неколку наврати, Црвениот крст има извршено исплата на погодените семејства од пожарот во Кочани. Со овие средства досега е обезбедена финансиска поддршка на семејства на починати лица во вкупен износ од 52.038.593 денари, од кои: за настраданите лица кои се на лекување во странство- 44.163.258 денари; за оние кои се лекуваат во земјава: 11.247.250 денари.
Вкупно досега исплатени: 107.449.101 денари.
Преостанати средства: 46.593.866 денари – на сметката на Црвениот крст.
Притоа, во соопштението се укажува дека сега ќе се направат консултации со надлежното министерство за да се утврди, зависно од степенот на повредите, колку финансиски средства и на кои лица и семејства ќе им бидат исплатени“, нагласи пратеникот на СДСМ.
Упати прашање до министерката за финансии: „Дали досега е донесена одлука да се извршени исплати на средства од Буџетот на државата на семејствата на починатите или на повредените, и ако има таква одлука, колку средства се исплатени за оваа намена“, праша Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од 1 јули целосна забрана за движење во шумите

Министерството за земјоделство, шумарство и водостопанство по барање на ЈП Национални шуми – Скопје, согласно член 57, став 3 од Законот за шумите, даде согласност за воведување на целосна забрана за движење во шумите и шумското земјиште во периодот од 6:00 до 20:00 часот, на територијата со која стопанисува јавното претпријатие.
Забраната, како што е појасенот од страна на надлежните, се воведува со оглед на зголемената опасност од појава на шумски пожари на отворен простор.
„Целосната забрана за движење во шума стапува на сила од 01.07.2025 година и ќе трае до 31. 08. 2025 година.
Целосната забрана за движење во шумите и шумското земјиште не важи за:
Министерството за внатрешни работи, Министерство за одбрана, Шумската полиција, Центарот за управување со кризи, Дирекцијата за заштита и спасување, Државниот инспекторат за шумарство и ловство, ЈП Национални шуми, субјектите што вршат шумскостопански активности, сеча, дотур и транспорт на дрво и дрвни сортименти, и лица коишто имаат писмено одобрение за движење во шумите со кои управува ЈП Национални шуми – Скопје.
Движењето ќе биде дозволено единствено со писмено одобрение издадено од подружниците на ЈП Национални шуми – Скопје за подрачјето со кое стопанисуваат/управуваат.
За спроведување на забраната одговорни се вработените од ЈП Национални шуми кои вршат дејност заштита, Шумската полиција и МВР.
За непочитување на оваа забрана на физичките лица кои ќе бидат затекнати дека се движат во шума и шумско земјиште, согласно член 106 од Законот за шумите, ќе им биде изречена парична казна од 1500 до 2000 евра“.
Македонија
Стојаноски: Конечно се зборува за тоа колку километри автопатишта се градат, тоа е едно нормално, коешто граѓаните на оваа држава го заслужуваат

На денешната собраниска седница, посветена на пратенички прашања свое обраќање имаше пратеникот од ВМРО-ДПМНЕ, Бојан Стојаноски. Тој постави три прашања кои се однесуваа до претседателот на Владата, Христијан Мицкоски. Стојаноски праша кои се идните чекори коишто се планирани во насока на подобрување на здравствената инфраструктура, бидејќи како што кажа тој истото е една од општествените сфери кои најмногу ги интересираат граѓаните.
„Кои се идните чекори коишто се планирани во насока на подобрување на здравствената инфраструктура и во здравството како сфера воопшто, бидејќи од она коешто може да се види тоа е една од општествените сфери кои најмногу ги интересираат граѓаните“, вели Стојаноски.
Стојаноски постави дополнително прашање од енергетиката. Тој праша до каде е процесот за отпочеток на градбата за интерконекторот за гас со Грција, нешто коешто треба да даде енергетска независност на Македонија, како и дополнителни околности за функционирање на нашето стопанство.
„До каде е процесот за почеток на градбата за интерконекторот за гас со Грција? Нешто коешто сме го зборувале тука неколку години, коешто треба да даде една енергетска независност, или приклучок на Македонија со гас за да можеме да бидеме и во таа рамка, односно во тој дел, да добиеме дополнителна енергетска независност, како и дополнителни олеснителни околности за функционирање на нашето стопанство и на нашите граѓани“, истакна Стојаноски.
Стојаноски смета дека прашањата треба да се однесуваат за реализација на мерки и проекти кои треба да го подобрат животот на граѓаните. Тој додаде дека драго му е што конечно дојдовме до ниво да разговараме за тоа колку и какви услуги се достапни, колку километри автопатишта се градат, и додаде дека тоа е едно нормално коешто граѓаните на оваа држава го заслужуваат.
„Сметам дека ова се прашања кои ги интересираат граѓаните. Она коешто се најавува како дискурс во јавноста, што е присутно во медиумите, во ТВ дневниците или порталите. Драго ми е што конечно се зборува за тоа колку и какви услуги се достапни, можеби од аспект на дигитализација на одредена платформа, колку километри автопатишта се градат, дали е потребно да градиме. Дојдовме до тоа ниво, разговараме колку клиники ќе отвориме, или какви болници ќе се градат, каде ќе се градат и сметам дека тоа е едно нормално коешто граѓаните на оваа држава го заслужуваат“, дециден е Стојаноски.
Македонија
Прво изградба на болниците во Штип и Кичево, а потоа клинички центар во Скопје, порача Мицкоски

„Од првиот ден откако бевме избрани како Влада, здравството беше централна тема и ако се сеќавате мојот прв теренски настан и изјава беше токму од Клиничката болница во Штип“, порача премиерот Христијан Мицкоски одговарајќи на пратеничко прашање.
Тој рече дека состојбата во здравството која ја затекнала била хаотична.
„Она кое што го затекнавме во здравството навистина беше една алармантна состојба. Состојба во која што владеело буквално безредие и хаос, долгови натрупани“.
Мицкоски го искоментира и вчерашниот отчет за сработеното во Клиниката за детски болести каде што рече дека некои работи мора да се направат и со малку пари.
„Некогаш работите можат да се направат и без пари или јас би рекол со многу малку пари. Еве самите го споменавте вчерашниот ден и мојата посета на Клиниката за детски болести и она кое што на луѓето најмногу им остави впечаток е дека клиниката беше исчистена. Во која смисла исчистена? Најпрво од хигиенски аспект, но исчистена беше и од аспект на тоа дека беа исфрлени 50 тони дигитален отпад. И тоа е однесено да се рециклира со компанија. Просто беше неверојатно тоа што го гледавме, како изгледало претходно и како изгледа сега, балконите на клиниката биле натрупани со стари компјутери, принтери, тоа беше една хаотична слика. И тоа е една од тие 11 работи кои што ги направил директорот за тие 11 месеци“, вели Мицкоски и истакна дека вкупно проектите кои биле презентирани чинеле 40 милиони денари.
Премиерот Мицкоски посочи дека со кредитот од стратешкиот договор со Обединетото Кралство ќе се вложат над 200 милиони евра во здравството за изградба и реконструкција на клинички болници.
„Сакам да споменам дека повеќе од 200 милиони евра од кредитот ќе бидат инвестирање во довршување на штипската клиничка болница, изградба на Медицински факултет и студентски дом со 200 легла. Исто така изградба на болница во Кичево и целосна реконструкција на клиничката болница во Тетово и опремување за да можат да одговорат на потребите на пациентите“, кажа Мицкоски и додаде:
„Откако ова ќе биде завршено ќе преанализираме за потребите на оној фамозен Клинички центар кој што конечно треба да се изгради, иако ќе ве потсетам дека во 2017 година постоеше завршена постапка, избран изведувач за што сега сме и на арбитража, и тогашната Влада влезе и во нивен стил како што тие само знаат да го направат, го прекинаа договорот, го избркаа изведувачот и сега сме ние на арбитража и најверојатно поради таквото неодговорно однесување од владата на СДСМ и ДУИ, граѓаните ни криви ни должни ќе треба да плаќаат оштета, исто како што сега треба да го плаќаме оној солидарен данок 50 милиони евра зошто незаконски им бил одземен на фирмите од страна на претходната влада.“
Премиерот Мицкоски истакна дека здравството е главен приоритет на Владата.
„Факт е дека здравство било на маргините, факт е дека е најголем проблем за граѓаните, и исто така е факт дека е еден од нашите главни приоритети“, порача Мицкоски.