Македонија
(Видео) Спасовски до Кочовска: Дали има одлука за исплата на средства за семејствата на загинатите и повредените во Кочани
Пратеникот на СДСМ, Оливер Спасовски на денешната собраниска седница посветена на пратенички прашања, упати прашање до министерката за финансии, Гордана Димитриеска-Кочоска, кое се однесуваше на одлуката да изврши исплати на средства од Буџетот на државата на семејствата на починатите и повредените во трагедијата во Кочани и ако има таква одлука, колку средства се исплатени на семејствата на загинатите и повредените.
Тој реагираше во однос на присуството на членовите на Владата.
„Имаме обврска денес, односно тие имаат обврска да бидат присутни на седницата. Имаме известување само од двајца министри дека не можат да присуствуваат и дека ќе бидат нивните заменици. Меѓутоа, гледаме и повеќе министри коишто не се присутни, ниту има заменици, за да можеме да ги поставиме пратеничките прашања“, кажа Спасовски.
Околу прашањето за Кочани Спасовски посочи дека граѓаните покажаа сериозна солидарност.
„Беа отворени сметки на кои се уплаќаа финансиски средства од граѓаните како помош за настраданите. Тие финансиски средства, пред сè, беа на сметките кои ги имаше отворено Црвениот крст на Република Северна Македонија. Според последното соопштение, стои дека за настраданите од пожарот во Кочани се собрани досега 156.542.967 денари, и тоа заклучно со 23.05.2025 година. Во неколку наврати, Црвениот крст има извршено исплата на погодените семејства од пожарот во Кочани. Со овие средства досега е обезбедена финансиска поддршка на семејства на починати лица во вкупен износ од 52.038.593 денари, од кои: за настраданите лица кои се на лекување во странство- 44.163.258 денари; за оние кои се лекуваат во земјава: 11.247.250 денари.
Вкупно досега исплатени: 107.449.101 денари.
Преостанати средства: 46.593.866 денари – на сметката на Црвениот крст.
Притоа, во соопштението се укажува дека сега ќе се направат консултации со надлежното министерство за да се утврди, зависно од степенот на повредите, колку финансиски средства и на кои лица и семејства ќе им бидат исплатени“, нагласи пратеникот на СДСМ.
Упати прашање до министерката за финансии: „Дали досега е донесена одлука да се извршени исплати на средства од Буџетот на државата на семејствата на починатите или на повредените, и ако има таква одлука, колку средства се исплатени за оваа намена“, праша Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Ацо Велковски е човек со дела зад себе, победата во Лозово е на дофат
Претседателот на Социјалдемократскиот сојуз на Македонија, Венко Филипче, на денешните средби со граѓани од Лозово, порача дека кандидатот за градоначалник од СДСМ за Лозово, Ацо Велковски, е човек кој со своите дела покажа како треба да се развива оваа општина. Филипче потсети дека Велковски во претходниот мандат од 2017 до 2021 година, реализираше проекти кои беа во интерес на граѓаните и напредокот на општината.
“Се изгради нова општинска зграда, градинка, реновирано е училиштето, паркот. Во тој период во Лозово имаше визија, имаше напредок и тоа граѓаните го чувствуваат. И затоа е Ацо повторно кандидат за градоначалник”, рече Филипче.
Од друга страна како што кажа Филипче, актуелниот градоначалник буквално ништо не презема за општината и за граѓаните.
“Нема никаква капитална инвестиција, нема продолжување на близу 50-тина проекти коишто во тоа време остана незавршени. Така што сум прилично сигурен дека граѓаните ќе можат да ја почувствуваат разликата, знаат што значи да имаат градоначалник кој работи отворено, транспарентно, кој ја унапредува општината, кој го прави животот полесен, попријатен и поубав. Тука каде што свое место наоѓаат младите, пензионерите, земјоделците, сите категории на граѓани кои живеат во оваа општина”, рече Филипче.
Тој додаде дека во општина Лозово, СДСМ во вториот круг, има поддршка и од коалициските партнери и од еден од независните кандидати, од првиот круг на изборите.
„Им благодарам за поддршката и мислам дека победата тука во Лозово е на дофат“ , рече Филипче.
Македонија
Николоски: Со Лабудовиќ како иден градоначалник на Центар ќе најдеме решенија за сите проблеми во Маџир Маало
Кандидатот за градоначалник на општина Центар од Движењето ЗНАМ поддржан од ВМРО-ДПМНЕ Мирослав Лабудовиќ и вицепремиерот и министер за транспорт и врски Александар Николоски денеска остварија средба со жителите на Маџир Маало, на кој им ветија дека ќе направат се за набргу да им ги обезбедат сите неопходни услови за живот и развој во 21 век. Со вицепремиерот и министер имаме заедничка согласност дека оваа брутална бетонизација што му се случува на Центар треба да запре час поскоро. А, првиот чекор е носење и ревизија на сите урбанистички планови. Што ќе се прави со континуирана соработка на локалната со централната власт.
„Имаме заеднички став дека новиот детален урбанистички план за Маџир Маало, ќе биде квалитетен, за модерен развој на овој дел од Скопје и, се разбира, исклучиво во интерес на граѓаните. Со нив ќе се консултираме како сакаат, каква потреба имаат тие за овој дел од нашата општина. Дополнително планираме изградба на нова градинка на овој потег, како и модернизација на улиците кои долго време не се санирани“, рече Лабудовиќ, нагласувајќи дека соработката што ќе ја имаат и со Минстерството за транспорт и врски и со Град Скопје ќе биде исклучиво во штитење на јавниот интерес.
Вицепремиерот и министер за транспорт и врски Александар Николоски пак, посочи дека е жално во 21 век луѓето да живеат во субстандардни услови во срцето на Скопје.
„И овде на дело може да видите како изгледа урбанистичкиот хаос и создавање на урбанизам во интерес само на поединци. Затоа што, поединци кои се блиски до актуелното раководство на општина Центар не може овде да си го најдат личниот финансиски интерес или да најдат бизнис и токму затоа луѓето живеат во сосотјба која не личи на 21 век – со уништени улици, без соодветен водовод и канализација и со нерешени имотни прашања. И, ова на најдобар начин покажува како се уништува општината и зошто се неопходни промени во Центар“, потенцираше Николоски.
Вицепремиерот Николоски верува дека заедно со Лабудовиќ, кого го нарече иден градоначалник на Центар, ќе работат на изнаоѓање решенија за сите проблеми и предизвици со кои се соочуваат маџлирмаалци. За, конечно тие да дојдат до пристојни услови за живот.
Македонија
Минчев: Со новиот закон и Академијата поставуваме темели за модерна, стручна и европска јавна администрација
Министерот за јавна администрација, Горан Минчев, се обрати на јавната дискусија на тема „Имплементација на Законот за стручно усовршување и обука на административните службеници“, организирана од страна на Министерството за јавна администрација во рамки на проектот „Поддршка за воспоставување на Академија за стручно усовршување и обука на административните службеници“, кој се реализира во партнерство со Центарот за управување со промени (ЦУП) и со поддршка на Амбасадата на Република Франција во Скопје.
На настанот свое обраќање имаа и амбасадорот на Република Франција, Н.Е. г. Кристоф Ле Риголер, д-р Неда Малеска Сачмароска, извршна директорка на ЦУП, францускиот експерт проф. д-р Jean-Michel Eymeri-Douzans од Институтот за политички студии во Тулуз, како и претставници од Генералната дирекција за администрација и јавна служба на Франција (DGAFP). Меѓу присутните беа и гости од дипломатскиот кор, владини функционери, претставници на државни институции, граѓанскиот сектор и академската заедница.
Во своето обраќање, министерот за јавна администрација Горан Минчев истакна дека со донесувањето на новите закони за јавната администрација, а особено со Законот за стручно усовршување и обука, се поставуваат нови стандарди во јавната служба.
„Законот за стручно усовршување и обука на јавните службеници е суштинска промена. Промена што ја премостува децениската разлика меѓу желбата за европска администрација и реалноста што ја градиме денес – модерна, стручна и одговорна администрација,“ нагласи министерот Минчев.
Тој потенцираше дека партнерството со Француската амбасада и со француските институции претставува доказ за довербата на европските партнери во реформите што се темелат на знаење, транспарентност и резултати.
„Проектот ‘Јакнење на капацитетите и професионализација на администрацијата’, кој го реализираме со поддршка од Француската амбасада, во партнерство со Националниот институт за јавна администрација (INSP), Генералната дирекција за администрација и јавна служба и Центарот за управување со промени, претставува вистински темел за создавање нов систем – систем во кој институциите не се формалност, туку алатка за развој,“ изјави министерот.
Министерот Минчев најави дека во рамките на оваа соработка ќе биде воспоставена Академија за стручно усовршување и обука на административните службеници, како институција што ќе стане „срцето на професионализацијата на јавната служба“.
„Со формирањето на Академијата, која ќе се структуира во рамките на овој француско-македонски проект, создаваме институција која ќе биде срцето на професионализацијата на јавната служба. За прв пат во историјата на нашата држава, системски и институционално ги регулираме стручните обуки на јавните службеници,“ изјави Минчев, додавајќи дека „секој административен службеник – од најмладиот до најискусниот – ќе има можност да се надградува, да стекнува нови знаења и да го покаже својот професионален капацитет.“
Во своето обраќање, министерот се заблагодари на амбасадорот на Франција, на ЦУП и на сите партнери кои придонесуваат за реализација на реформите во јавната администрација.
„Ова е партнерство меѓу државата и нејзините луѓе, меѓу институцијата и службеникот, меѓу знаењето и јавниот интерес,“ нагласи тој.
Настанот вклучи две панел-дискусии со учество на домашни и меѓународни експерти, кои ги презентираа моделите и искуствата во организацијата на академии за обука, како и најдобрите практики во континуираната едукација на јавните службеници.
Министерството за јавна администрација останува посветено на реформите што водат кон создавање професионална, транспарентна и европска јавна администрација, која ќе биде темел на модерна и одговорна држава.

