Македонија
(Видео) Спасовски: Мирна новогодишна ноќ во државата, без поголеми нарушувања на јавниот ред и мир

Денеска на првиот работен ден од Новата година министерот за внатрешни работи Оливер Спасовски со дел од раководството на МВР оствари работна средба со раководството на Секторот за сообраќајни работи и Мобилната единица за безбедност на сообраќајот на патиштата.
На средбата Спасовски беше информиран за низата активности кои се преземаат со цел подобрување на безбедносната состојба во сообраќајот како и намалување на бројот на случени сообраќајни незгоди со потешки последици, постигнување на повисок степен на поволна безбедносна состојба во сообраќајот на патиштата и воспоставување на поголема дисциплина кај учесниците во патниот сообраќај.
„Со задоволство можам да споделам со Вас медиумите дека во 2022 година Мобилната единица за безбедност на сообраќајот на патиштата во насока на подобрување на безбедносната состојба во сообраќајот како и намалување на бројот на случени сообраќајни незгоди со потешки последици, бележи зголемување на вкупниот број на издадени прекршочни платни налози за 4.7% во споредба со 2021 година. Во истиот период бележиме зголемување за 48,49% на одземени возачки дозволи за возење под дејство на алкохол. Зголемување за 600% на санкционирани возачи на мотоцикл кои не носат заштитна кацига. За 50,53% бележиме зголемување на санкционирани возачи кои возеле под дејство на алкохол“, потенцираше Спасовски. Министерот потсети дека во 2022 година македонската полиција заплени повеќе од 130.000 парчиња пиротехника.
„Што се однесува за изминатата вечер, на територија на целата држава Новогодишната ноќ помина мирно, без поголеми нарушувања на јавниот ред и мир“, рече Спасовски, притоа заблагодарувајќи им се на сите граѓани кои што празнуваа и прославуваа одговорно така како што и беше апелирано со што придонесоа Новогодишната ноќ да ни помине мирно и безбедно така како што сите посакувавме.
Воедно, министерот Спасовски информираше дека во споредба со минатата година, имаме намалување за 30% на пријавени настани.
Најголем број пријавени настани се на подрчајето на СВР Скопје, потоа СВР Охрид, останатите сектори имаат многу малку пријави, а СВР Велес нема ниту една пријава за нарушување на јавен ред и мир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јаневска: Со буџет од 34 милиони евра, Владата ќе ја поддржи инфраструктурната модернизација на Универзитетот „Мајка Тереза“

Универзитетот „Мајка Тереза“ е нашиот најмлад државен универзитет. Владата е посветена кон обезбедување на ресурси потребни тој и натаму да се развива. Со буџет од 34 милиони евра кои ќе се обезбедуваат етапно, почнувајќи од оваа и во текот на следните пет години, ќе го поддржи градењето на модерен кампус кој ќе биде центар за академска извонредност, за наука и технологија. Студентите и наставниот кадар ќе добијат современи услови за работа и напредување.
Ова го истакна министерката за образование и наука, Весна Јаневска, на денешната церемонија организирана по повод примопредавањето на должноста ректор на оваа високообразовна установа.
Посакувајќи му добредојде на новата функција на проф. д-р Беким Фетаји, министерката Јаневска изрази очекување дека тој ќе продолжи со визијата за уште поголем раст на квалитетот на студиските програми и со својата стручност ќе придонесе универзитетот да се развива како модерна образовна и научна институција, достојна за поддршката што ја добива.
„Очекувам да внесе нова енергија и да ги мотивира универзитетските професори и истражувачи професионално да напредуваат и да ги инспирираат студентите да тежнеат не само за добивање на диплома, туку да станат вистински академски образувани граѓани, подготвени за меѓународно одмерување на знаењата“, рече Јаневска.
Министерката се заблагодари на досегашниот ректор проф. д-р Изет Зеќири, посочувајќи дека како прв човек на универзитетот и како професор, тој дал важен придонес во градењето на академски генерации кои се веќе интегрирани во општествените процеси и функционирањето на државата.
Македонија
Првата детска амбасада во светот „Меѓаши“ одбележува 33 години постоење

Првата детска амбасада во светот – Меѓаши годинава ја одбележува 33-годишната посветеност на заштитата на детските права, постојаната и активната улога во градењето мир и меѓусебно разбирање.
По тој повод, Меѓаши најави промоција на повеќе значајни активности и материјали и тоа нова веб-страница (https://www.childrensembassy.org.mk/pocetna.nspx) и документарен филм: ,,30 години Меѓаши” – Документирано сведоштво за развојот, достигнувањата и влијанието на Меѓаши низ годините“.
Исто така, достапни се уште два кратки видео-прилози поврзани со историјата и работата на организацијата „Како започна приказната на Меѓаши“ и „Како Меѓаши влијаеше на општеството“.
Објавена е и монографија „30 години Меѓаши” – Публикација која ја отсликува историјата на организацијата, активностите и резултатите во изминатите три децении.
„Преку овие промотивни материјали, Детската амбасада Меѓаши не само што го документира своето повеќедецениско активно дејствување, туку и ја засилува својата мисија за поттикнување на одговорноста, едукација и активирање на пошироката јавност во поддршката на децата, воедно потсетувајќи на важноста од мировното образование и градење култура на мирот од најмала возраст“, соопштија од таму.
Македонија
Утре сончево време, следува период на потопло време

Времето утре ќе биде поведро и посвежо, преку денот сончево со мала до умерена локална облачност. Ќе дува слаб до умерен ветер од североисточен правец, информира УХРМ.
Минималната температура ќе биде во интервал од 0 до 8, а максималната ќе достигне од 18 до 25 степени.
Во Скопје, сончево со слаб до умерен ветер од североисточен правец. Минималната температура ќе се спушти до 6, а максималната ќе достигне до 25 степени.
Следува период на сончево и потопло време со мала до умерена облачност и со умерен северен ветер. Утре и во среда утринските температури ќе бидат пониски, а дневните ќе бидат во постепен пораст.