Македонија
(Видео) Спасовски: Обезбедивме квалитетна услуга во делот на исхраната за припадниците на специјалните полициски единици, задоволна полиција е гарант на безбедноста
Министерот Оливер Спасовски заедно со раководството на МВР денеска беше во посета на полицискиот центар „Ѓорче Петров“ и изврши увид во функционирањето на новиот концепт на исхрана на полициските службеници од повеќе специјални единици, што веќе една недела се применува и во мензата на ЕБР, а се покажа успешен во рамките на Специјалната антитерористичка единица – „Тигар“.
„Денеска, кујната и ресторанскиот дел се отстапени на економски оператор по претходно спроведена транспарентна јавна набавка, при што од операторите се бараше да исполнат високи стандарди, со воспоставен контролен механизам од страна на МВР. Со ова обезбедивме квалитетна услуга во делот на исхраната за припадниците на специјалните полициски единици, набавката на храна се одвива на поедноставен начин од страна на професионален оператор, чија примарна дејност е работа во областа на исхраната, кој е должен да ги следи и имплементира високите стандарди во овој процес“, изјави пред медиумите министерот Спасовски за новиот концепт на исхрана.
Министерот Спасовски информира дека со доаѓањето на ова раководство во Министерството како дел од стратешките приоритети беше и целосното опремување и унапредување на условите за работа на полициските службеници.
„Функционирањето на безбедносниот систем е основа за функционирање на правната држава, а со тоа и на економијата и прогресот на државата и во таа насока продолжуваме да ја реформираме и унапредуваме полицијата“, истакна министерот Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.