Македонија
(Видео) Спасовски од Старо Нагоричане: Постигнувањата во овој регион се доказ за вложувањата во рамномерен регионален развој

Техничкиот премиер Оливер Спасовски оствари работна посета на општина Старо Нагоричане. Во изјавата за медиумите, премиерот Спасовски истакна дека со градоначалничката на општина Старо Нагоричане, Жаклина Јовановска, разговарале за тековните проекти на општината коишто се реализираат со поддршка на разните програми на Владата насочени кон развојот на локалните самоуправи.
„Како што знаете, општината Старо Нагоричане е со доминантно рурални карактеристики од кои произлегуваат и нејзините предности, кои заслужуваат целосна поддршка. Како прво, тоа значи креирање програми за поддршка на граѓаните од општината кои доаѓаат од програмите за рурален развој и за поддршка на земјоделството. Во таа насока се договоривме со градоначалничката Јовановска да ги зајакнеме започнатите заеднички активности кои се однесуваат на приближување на можностите до граѓаните земјоделци во општината за да ги влечат придобивките од владините програми за развој на земјоделството и руралниот развој. Тука е бесплатната зелена нафта и повратот на персоналниот данок за земјоделците, средства кои тие можат да ги реинвестираат во модернизација на нивните земјоделски дејности“, истакна премиерот Спасовски.
Тој потенцираше дека посебно сака да ја афирмира програмата за поддршката млади и на жени земјоделки за кои се определени средства и до 10.000 евра и истакна дека силен потенцијал има и ИПАРД-програмите за финансирање во земјоделството и сточарството за што има бесплатна обука на фармери за поефикасно искористување на ИПАРД-средствата.
„Се разбира, поради карактеристиките на територијата на општината, поради претежно планинските предели и оддалеченоста меѓу селата, посебна грижа во изминатиот период беше посветена на патната инфраструктурна мрежа. Во изминатите три години како централна власт инвестиравме 1 милион 430 илјади евра за патната инфраструктура во општината: за рехабилитација на регионалниот пат Младо Нагоричане – Пелинце, и за регионалниот водовод за Младо Нагоричане, за којшто се почнати подготвителните активности и за кој се наменети 820 илјади евра. Во рамки на рамномерниот регионален развој, 10 проекти со вкупна вредност од 82 милиона 61 илјада 357 денари се завршени или се во фаза на реализација: за подобри услови за рурален развој, за развој на туризмот и мобилноста во Североисточниот Плански Регион, за заштита на животната средина, за подготвителни активности за повеќе локални патни правци. Никогаш како овие три години не се вложувало во нашата држава за рамномерен регионален развој. Постигнувањата во овој североисточен регион и во реонот на Старо Нагоричане го покажува тоа“, објасни Спасовски.
Тој изрази уверување дека Старо Нагоричане има особени предности во поглед на планинскиот, селскиот и културно-историскиот туризам.
„И самите го знаете значењето на Меморијалниот центар АСНОМ, потоа тука е манастирот ‘Св. Ѓорѓи’ од 11 век, која има огромно значење и претставува прекрасен примерок од средновековната византиска архитектура. Тука е и мегалитската опсерваторија Кокино и сите овие културно-историски споменици, заедно со питомите природни убавини на околните планини, ја прават општината атрактивна туристичка дестинација. Затоа е многу важна поддршката на Владата што досега ја дававме за заштита на животната средина и подобрување на условите за живот во Североисточниот Плански Регион, за рурален развој, и развој на туризмот и мобилноста во општината и во регионот“, истакна Спасовски.
Тој акцентираше дека станува збор за сериозни проекти кои претставуваат силен аргумент и за прекуграничните проекти со соседните држави Србија и Бугарија, и за пристап до високи финансиски средства од фондовите на ЕУ, за кои гарантира државата, и кои им стојат на располагање на општината за реализација на заеднички проекти во интерес на граѓаните од општината и регионот.
Градоначалничката Жаклина Јовановска во својата изјава изрази голема благодарност за посветеност на Владата за реализација на проекти со општините и подобрување на животот во руралните региони.
„Владата несебично се залагаше нашата општина, која спаѓа во Североисточниот Регион, како еден од најнеразвиените региони, да помогне граѓаните да имаат еден достоинствен живот каков што заслужуваат бидејќи претходната власт воопшто не обрнуваше внимание на овој регион како да не постои. Старо Нагоричане е општина од рурален тип којашто опфаќа голем број села коишто се од разбиен тип и ние реално без многу силна поддршка од Владата каква што добивавме и се надевам ќе добиваме не можевме да успееме да ги оствариме сите проекти кои ги наброи самиот премиер и верувам дека заедно со голема поддршка на граѓаните ќе го задржиме и во иднина темпото на инвестирање во сите аспекти на инфраструктурата и севкупниот развој на нашата општина и регион“, истакна Јовановска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) СДСМ Прилеп: Заради протест на вработените, прилепчани останаа без градски превоз

„Систематски, како по книга, ВМРО-ДПМНЕ го уништува Прилеп! Неисплатената плата на вработените во Јавното претпријатие за просторни и урбанистички планови, е причина за тридневниот прекин на градскиот превоз во Прилеп. Како главни виновници за настанатата ситуација, вработените и директорот на јавното претпријатие ги посочија Општината, односно училиштата, кои на претпријатието му должат фантастични 7 милиони денари“, вели Саша Лепиткова, претседателка на Форум на жени на ОО СДСМ-Прилеп.
„Така, неспособноста на градоначалникот Борче Јовчески и аматерското водење на институциите од страна на директорите на ДПМНЕ, ги принуди прилепчани сами да се снаоѓаат и да го решаваат проблемот кој им го сервираше локалната власт.
Со тоа, после само два дена на виделина излегоа лагите за „успешното“ функционирање на локалните институции, кои преку таканаречениот „Отчет“ Јовчески и ДПМНЕ ги презентираа на партискиот „Саем на срамот“ во Скопје.
Лага е дека Општината набавила 5 нови минибуси за градскиот превоз, а уште поголема лага тезата за „огромните“ инвестиции во основните и средните општински училишта.
Да биде трагикомедијата поголема, токму лошото менаџирање на овие институции и нивната меѓусебна спрега, ги доведе во ќорсокак вработените во јавното претпријатие за просторни и урбанистички планови.
Граѓаните на Прилеп немаат никаква дилема дека актуелната владејачка гарнитура на ДПМНЕ, е најлошата од постоењето на градот.
После обврските од 6 милиони евра кои Јовчески и ДПМНЕ му ги оставаат на новиот градоначалник, после испустените јавни претпријатија, прашањето кое се наметнува е – ќе имаат ли време до крајот на мандатот да уништат уште нешто?“, изјави Саша Лепиткова, претседателка на Форум на жени на ОО СДСМ-Прилеп.
Македонија
Влада: Се конкретизираат работите за изградба на третата фаза од пругата од Крива Паланка до границата со Бугарија како и изградба на тунелот како гранична точка

„По средбата на високо ниво меѓу вицепремиерот и министер за транспорт Александар Николоски и вицепремиерот и министер за транспорт на Бугарија, Гроздан Караџов, а понатаму и работните групи од двете земји, се конкретизираат работите за изградба на третата фаза од пругата од Крива Паланка до границата со Бугарија како и изградба на тунелот како гранична точка“, велат од Владата.
„Во рамки на тие активности, денеска Владата на седница донесе одлука да се ефектуира Договорот за грант за техничка поддршка во висина од 3,7 милиони евра добиен од Европската Инвестициска Банка.
Со ова, избраниот Консултант во следниот период ќе изработи нова проектна документација, како и подготовка на тендерската постапка за избор на изведувач.
Дополнително да се забрзаат активностите, ЈП за Железничка Инфраструктура ќе започне постапка за избор на Надзор на изградбата.
Преку овие активности, Владата во континуитет покажува цврста заложба во реализација на стратешко-инфраструктурните проекти за државата.
Изградбата и модернизацијата на железничката мрежа е приоритет на Владата и во рамките на тие приоритети се преземаат засилени активности за доизградба на железницата на Коридор 8, како и изградба на брза пруга на Коридор 10.
Овие проекти кои имаат и регионално значење ќе ја позиционираат државата како транзит земја на Балканот- дел од европските транспортни рути со што бенефитот е повеќекратен.
Проектите за развој и модернизација на целокупниот железнички систем претставуваат стратешки проекти на државата за регионално поврзување, забрзан економски развој и отворање на нови пазари за домашните компании“, соопштува Владата.
Македонија
„Не било доволно папаја, манго, аспарагус и други егзотични овошја, Министерството за одбрана набавува кафе и алкохол за 31.000 евра“, велат од СДСМ

„Додека стандардот на граѓаните постојано опаѓа и семејствата едвај врзуваат крај со крај, владата на Христијан Мицкоски и ВМРО-ДПМНЕ продолжува да се луксузира со народните пари. Не било доволно папаја, манго, аспарагус и други егзотични и прескапи овошја, Министерството за одбрана на Мисајловски склучило договори со пет компании за набавка на кафе, вино, ракија, мастика и други алкохолни пијалоци во вредност од 31.000 евра“, соопшти СДСМ.
„Во реалноста, народот не може да си дозволи ниту основни работи. Последните податоци покажуваат дека синдикалната потрошувачка кошничка достигна 65.507 денари, на граѓаните им се потребни речиси 3 минималнни плати за да ги покријат само основните трошоци. Многу производи се недостижни за голем број семејства во државата.
ВМРО-ДПМНЕ ја држи Македонија со најниската минимална плата во целиот регионот и упорно одбива да ги покачи платите и да ги намали цените кои се превисоки. Просечната плата е само една третина од европскиот просек, додека цените на основните производи достигнуваат до 60% од просекот во Европа.
Ваквата расипничка политика на власта е доказ дека Мицкоски и неговите министри се грижат единствено за сопствената удобност, а не за народот кој секој ден тоне во сиромаштија и едвај врзува крај со крај“, се наведува во соопштението на СДСМ.