Македонија
(Видео) Спасовски: Преземаме мерки за подобар стандард и побрзо вработување на младите

Министерот за внатрешни работи Оливер Спасовски денеска учествуваше и се обрати на конференцијата „Да кажеме СТОП на исселувањето на младите“ во организација на Институтот за социјална демократија – Прогрес и тинк-тенк фонданцијата за социјална демократија Калеви Сорса.
Спасовски истакна дека повеќе од јасно е дека пред системот, пред институциите, пред носителите на одлуки се исправува нов и специфичен предизвик што наметнува неопходно барање на соодветен и ефикасен одговор на проблемското прашање: како да се задржат и мотивираат младите да го најдат своето место под сонцето. Односно, како тие да се етаблираат во реален, објективен фактор на општествениот опстој и напредок.
„ Од тие причини, од аспект на политиките на Владата, важен акцент е ставен токму врз мерки со кои ќе се подобрат студентскиот живот и стандард, а младите ќе дојдат полесно до прво вработување. Наша приоритетна цел е младите да ја проектираат и градат својата иднина во својата татковина. Во претходниот мандат започнавме со програмата ‘Младинска гаранција’, а при креирањето на Владините мерки за поддршка на стопанството и граѓаните во услови на вонредна состојба предизвикана од ширењето на коронавирусот воведовме три типа на парична поддршка за младите во Северна Македонија преку платежни картички и ваучери, вредна 12 милиони евра, со цел нивно полесно прилагодување на новата реалност, преку одржување на нивото на ученичкиот и студентскиот стандард, како и на куповната моќ“, ги акцентираше Спасовски досегашните политики кои Владата ги проектираше за задржување на младите дома.
Тој потенцираше дека во новата Програма на Владата 2022-2024, младите се опфатени преку таргетирани политики со кои се овозможува нивна извесна и сигурна иднина. Така, предвидена е поддршка за секое вработено лице до 29 години кое ќе се вработи за првпат, за сите кои сè уште не развиле вештини за вработување да го сторат тоа преку пракса, предвиден е поврат на персонален данок на доход за сите нововработени млади под 30 години, предвидена е поддршка во отворањето на младинските центри и локалните младински совети, со цел вклучување на младите во процесите на донесување одлуки и зголемување на капацитетите на младите луѓе, политики за младите лекари, поддршка за младите земјоделци и дигитализација на сите нивоа.
„Од аспект на Министерството за внатрешни работи, пак, би сакал да посочам дека во изминативе неколку години успеавме преку приемот на речиси 2.300 млади до 25-годишна возраст, драстично да ја поместиме старосната структура во корист на помладите генерации, поместувајќи ја границата во старосното структуирање до речиси 50 проценти на вработени до 40-годишна возраст“, ги потенцираше можностите и шансите кои ги дава МВР на младите и професионални кадри во периодот од 2017 до денеска министерот Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Продолжувањето на притворот за Бектеши додека вистинските одговорни сè уште се на слобода претставува чист израз на селективна правда и политичка одмазда“, велат од ДУИ

„Продолжувањето на притворот за поранешниот министер Крешник Бектеши, додека вистинските одговорни – оние што биле задолжени за безбедноста на децата– сè уште се на слобода, претставува чист израз на селективна правда и политичка одмазда“, реагира ДУИ.
„Ова не е само двоен правен стандард – туку отворена политичка и партиска дискриминација, која претставува флагрантно кршење на основните принципи на правната држава.
Уште повеќе, иако сведоците и родителите на жртвите јасно ги посочија виновниците и побараа одговорност од Министерството за внатрешни работи, единствено поранешниот министер Бектеши сè уште се држи во изолација – како параван за да останат вистинските виновници на слобода.
Трансакциското обвинителство и актуелната власт продолжуваат брутално да ги газат сите правни, морални и човечки принципи.
Премиерот, откако јавно го заплаши обвинителот дека ќе ги изведе луѓето на улица против него, сега целосно го има потчинето и настапува истовремено и како обвинител и како судија.
Ако улицата е решението – тогаш дојде време сите граѓани да им се придружат на семејствата на жртвите од Кочани и да побараат правда – мирно, но решително, на улица“, се додава во соопштението на ДУИ.
Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Улици во Чаир без вода, намален притисок во Топанско Поле

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради поврзување на нова со стара постоечка водоводна мрежа на улица Кемал Сејфула бб, прекинато водоснабдување ќе имаат корисниците од улицата Џон Кенеди и дел од улицата Кемал Сејфула, а со намален притисок ќе остане населбата Топанско Поле во општина Чаир.
Водоснабдувањето ќе биде прекинато од 09:30 часот до завршување на работните активности.