Македонија
(Видео) Стефоска: 10 милиони евра повеќе за културата во 2022 година

Предлог-буџетот за културата за 2022 година изнесува три милијарди 855 милиони 548 илјади денари, или 62 милиона 692 илјади евра. Тоа е речиси 10 милиони евра повеќе од буџетот со кој располагавме оваа година, информираше министерката за култура, Ирена Стефоска, на денешната прес-конференција, на која го презентираше предлог-буџетот на Министерството за култура за следната година.
„За поддршка на проектите од национален интерес во културата за 2022, пак, од буџетот се издвоени над 17 милиони евра, што е за над 1 и пол милион евра повеќе за оваа намена од оваа година“, рече министерката за култура.
Во тој контекст, Стефоска на прес-конференцијата изрази задоволство што на Годишниот конкурс, кој за првпат се реализираше преку електронска апликација, се пристигнати 3.800 пријави, кои автоматски добија и архивски број.
Таа потсети и дека за електронската апликација беа одржани обуки во повеќе градови, беше изработено видеоупатство, беа отворени телефони за консултација и за техничка поддршка, како и електронски адреси за прашања од корисниците во секоја дејност, а беше продолжен и рокот за аплицирање на 39 дена.
Сепак, по административната проверка на доставената документација, службите констатирале дека голем број од пријавите се пополнети со нецелосно исполнети барања од конкурсот. Од тие причини, а во интерес на корисниците, Министерството одлучи да даде дополнителен рок од уште 15 дена.
„Во интерес на корисниците, Министерството одлучи да даде дополнителен рок од уште 15 дена (во согласност со член 39 од Законот за општата управна постапка). Корисниците што ќе добијат е-пошта ќе можат да ги докомплетираат пријавите. Фактот што речиси 2/3 од стасаните пријави во старт се нецелосни, што веројатно се должи на небрежноста на апликантите, нè наведе на овој чекор. Не смееме да го осиромашиме квалитетот, а конкуренцијата да ја сведеме на минимум. Исто така, при административна проверка на пријавите е утврденo системско преклопување при прикачувањето на дел од пријавите во издавачката дејност. Се работи за мал број пријави, 93, и од тие причини секој апликант ќе биде контактиран и известен кој податок ќе треба да го достави во дополнителниот рок. Ова не подразбира нова пријава туку само дополнување на веќе доставените пријави што имаат архивски број. Од утре, 2 декември, до 16 декември е рокот за дополнување на пријавите“, рече министерката.
За таа цел, повторно ќе бидат отворени дежурни телефони преку кои вработените во Министерството за култура ќе бидат во контакт со корисниците.
Стефоска смета дека со електронската апликација е направен огромен исчекор во градење на системот, а фактот што се овозможува дополнителен рок за пријавување, значи дека резултатите од конкурсот ќе бидат објавени, наместо до 20 јануари, најдоцна до половината на февруари следната година.
На прес-конференцијата министерката информираше дека во фокусот на буџетот за следната година се и капиталните инвестиции и санации во културата во висина од близу 10 милиони евра, средства наменети за:
– втората фаза од изградбата на Турскиот театар во Скопје,
– реализација на следната фаза од изградбата на Театар и библиотека во Тетово,
– завршни работи на Театарот во Струмица,
– втората фаза од реконструкцијата на Театарот во Куманово,
– втората фаза од реконструкцијата на Центарот за култура во Кочани,
– втората фаза од реконструкцијата на Центарот за култура во Гостивар,
– реконструкција и санација на покривот на Националната и универзитетска библиотека „Св. Климент Охридски“ во Скопје, како и за други проекти што ќе бидат одобрени во Годишната програма од областа на инвестициите за 2022 година наменети за објектите во кои се сместени културните установи.
Исто така, министерката за култура на прес-конференцијата потврди дека заштитата на културното наследство и натаму останува врвен приоритет на Министерството за култура, а во фокусот за следната година остануваат и зајакнувањето на ЕУ-интеграциите во културата и грижата кон младите уметници.
„Буџетот на Министерството и на Управата за заштита на културното наследство е близу 194 милиони денари, или 3 милиони и 200 илјади евра. За програмата Културно наследство во опасност, што ја поставивме за првпат во буџетот за оваа година, останува истата висина на средствата – 12 милиони денари. Приоритет и натаму е како материјалното така и нематеријалното културно наследство, а за блок-дотациите кон општините се предвидени речиси 6 милиони евра“, истакна министерката.
Културата во вкупниот буџет на државата учествува со 1,49 %, што, според Стефоска, не е доволно, но е одговорно однесување кон народните пари во време на здравствена и на економска криза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Клиниката за детски болести доби нов дигитален мобилен рендген-апарат

На Клиниката за детски болести денеска беше промовиран дигитален мобилен рендген-апарат, обезбеден со поддршка од Амбасадата на Јапонија.
„Станува збор за дигитален мобилен рендген-апарат, во вредност над 60 илјади евра. Оваа инвестиција претставува значаен чекор кон подобрување на здравствената грижа за најмладите пациенти. Изразувам длабока благодарност до Амбасадата на Јапонија, а особено до амбасадорката Сецуко Кавахара за нејзиниот личен ангажман и за долгогодишната, пријателска и плодна соработка. Оваа донација е уште еден доказ за силното партнерство меѓу нашите две земји и за вистинската грижа на Јапонија кон градење отпорен и хуман здравствен систем“, изјави државниот секретар во Министерството за здравство, Бесим Мемеди.
Амбасадорката на Јапонија во нашата држава, Сецуко Кавахара, потсети дека во рамките на заедничката соработка веќе се имплементирани над 70 проекти во здравствениот сектор и истакна дека поддршката за оваа клиника значи придобивка за пациентите од целата држава.
Воедно, директорот на Детската клиника, Реџеп Мемеди, се заблагодари за значајниот придонес за унапредување на здравствените услуги во оваа клиника како врвна терциерна установа, која годишно згрижува над пет илјади деца со најсложени здравствени состојби.
„Новата апаратура за нас претставува чекор напред во унапредување на здравствената грижа за најмладите пациенти“, рече Мемеди.
Македонија
Тошковски за дивеењето на скопските улици: Нема храброст во ризикување животи за неколку секунди внимание

Нема храброст во ризикување животи за неколку секунди внимание на социјалните мрежи. Овој случај нека биде потсетник дека секое непромислено однесување ќе биде санкционирано, објави министерот за внатрешни работи Панче Тошковски во врска со видеото што беше објавено на социјалните мрежи, а на кое едно лице качено на хауба се вози на улица.
Претходно, Министерството за внатрешни работи соопшти дека се поднесени пријави против двајца млади скопјани откога на социјалните мрежи се појави видео од опасна и непромислена „возачка забава“ на скопските булевари.
Во видеото се гледа како едно лице стои на хаубата од автомобил во движење, а возачот, покрај тоа што управува без дозвола, вози и без регистарски таблички.
Станува збор за 20-годишниот С. З. и за 19-годишниот Р. Ѓ., двајцата од Скопје. Против нив се поднесени пријави по неколку основи, вклучително и управување без возачка дозвола, загрозување на сопствената и на туѓата безбедност, како и дозволување управување на самото без дозвола.
Македонија
ВМРО-ДПМНЕ: Владата активно презема мерки за поддршка на стопанството и за отворање нови работни места

Владата активно презема мерки за поддршка на стопанството и за отворање на нови работни места, 40 милиони евра за самовработување и 250 милиони за компаниите, реагираат од ВМРО-ДПМНЕ, на обвинувањата од СДСМ дека бројот на вработени од лани паднал за 17.000.
„Очајниот и безидеен СДС бара сламка на која може да се фати само за медиумско внимание.
Неговата безидејност оди до таму што, дури и во пресрет на изборен циклус, нема ниту визија, ниту политики и проекти со кои би ја барал довербата на граѓаните.
Затоа сега, како сламка за медиумско појавување сака да им послужат податоците на Фондот за ПИОМ.
СДС добро знае дека работниот однос е оној врз чија основа се воспоставува приемот во пензиското и инвалидското осигурување и дека фондот не прави анализи за причините поради кои има движење на бројот на активни осигуреници кои се во работен однос или истиот го прекинале.
Исто така, бројот на активните осигуреници е категорија која секојдневно се менува, од проста причина што секојдневно има нови засновувања на работни односи, но и прекини.
Во однос на тоа што СДС вика дека нема стратегија за вработување и отворање нови работни места, ги потсетуваме дека е Владата донесе Оперативен план за вработување 2025 во вредност од 40 милиони евра, за отворање на 16.000 нови работни места.
До сега беа објавени два јавни повици од Оперативниот план кој вклучува низа мерки за поддршка на младинското вработување, самовработување, обуки и практиканство и на кои аплицирале над седум илјади лица.
Исто така, поддршка има и за приватниот сектор, така што на располагање на македонските компании беа ставени 250 милиони евра со ниска каматна стапка.
Ова е за делот со фактите кои СДС не може да ги побие и игнорира, додека пак во однос на периодот на кој се повикува, односно 2024 година, ги потсетуваме дека пола година СДС беше власт.
Така да ако не им се допаѓаат бројките од ПИОМ, тогаш нека си погледнат како работеле и што направиле за македонската економија и граѓани за таа пола година власт“, се наведува во реакцијата.