Македонија
(Видео) Стоилковски: Вториот круг донесе нерегуларности и злоупотреби на какви што се работи 364 дена претходно

По изборите, во Македонија има нова реалност, која покажува дека во над 40 општини и покрај сите притисоци, граѓаните се за опцијата за право и правда и проекти за опција што нуди проекти и развој, порача портпаролот на ВМРО-ДПМНЕ, Наум Стоилковски.
Како што рече тој, владејачкиот СДСМ е во паника и притоа ги злоупотребил сите правни институционални, но и вонинституционални средства.
„СДСМ на овие избори ги повторува сите нерегуларности што се јавуваат кога СДСМ организира избори, недостигаат ливчиња, се јавуваат повеќе ливчиња, односно полнети кутии, случаи на гласања за повеќе лица, недозволено агитирање, дури и меѓународните набљудувачи регистрираа поткуп на изборниот ден“, рече партискиот портпарол.
За наодамнешните претседателските избори, Стоилковски рече дека не се демократски, туку пример за ефикасно спроведен изборен инженеринг.
„ВМРО-ДМНЕ поднесе 12 приговори до ДИК, во кои повторно се констатирани нерегуларности исто како во првиот круг“, нагласи тој.
Според ВМРО-ДПМНЕ, овие претседателски избори ја покажале целата злоупотреба на државните институции и неспособноста на СДСМ да одржи фер и демократски избори.
„Изборите, ќе се послужам со зборови на Стево Пендаровски, искусен во изборни нерегуларности, нерегуларностите и инженерингот не се прават само на изборниот ден, туку на тоа се работи претходно 364 дена, се работи за системски нарушувања на изборниот процес. Токму тоа го покажа и вториот круг на претседателските избори“, рече Стоилковски.
Тој порача дека неговата партија очекува приговорите да бидат констатирани, а Јавното обвинителство да се одважи и да постапи во согласност со надлежноста за настани од вонредно значење, како што се изборите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поддршка од министерот за правда за Пандов чијашто куќа беше запалена: „Случајот бара одлучна акција“

Министерот за правда Игор Филков најостро го осудува палењето на куќата на директорот на Управата за извршување на санкции, Александар Пандов и бара одлучна акција во која ќе се утврдат причините и најстрого казнат можните сторители.
„Најостро го осудувам палењето на куќата на директорот на Управата за извршување санкции, Александар Пандов. Му давам целосна поддршка во неговата истрајност и борба против криминалот и корупцијата. Овој случај како и неколкуте други случаи поврзани со лицата вработени во УИС и затворите, бараат одлучна акција во која ќе се утврдат причините и најстрого ќе се казнат можните сторители“, вели Филков.
Директорот на Управата за извршување на санкции, Александар Пандов, претходно, на социјалните мрежи објави дека му бил запален домот. Нема да не запрат и нема да не поколебаат, напиша тој.
Македонија
Кирков: Вработените во ЗОО последно земале февруарска плата

До Стефан Кирков, којшто е член на Советот на Град Скопје, пристигнала молба од вработените во скопската Зоолошка градина и барање за реакција и помош. Го известиле дека последна плата која ја земале е фебруарската плата и одтогаш немаат никакво примање.
„Веќе сме мај, а овие вработени се оставени без примања и навистина сум запрепастен до каде ќе се оди со непрофесионалноста во ова раководство на Градот и кадрите кој ги поставува?! Вработените од утре ќе бидат и без здравствено осигурување !!! Поминаа празници како 8ми Март, Рамазан Бајрам , Велигден на праг е и 1ви Мај а вработените се оставени и заборавени замислете да им се исплати плата !!! Цели фамилии страдаат од нечија непрофесионалност!“, напиша Кирков на социјалните мрежи.
Тој ги проѕва Град Скопје , Данела Арсовска и Зоран Попов сигнализирајќи и дека состојбата може да доведе до протести.
Македонија
Реконструкција на водоводна мрежа и проширување на мостот на Маркова Река, најави Општина Аеродром

Општина Аеродром најави дека во наредниот период започнува со целосна реконструкција на водоводната мрежа на улица 2 во Долно Лисиче, а исто така се започнува и реализација на проектот за проширување на мостот на Маркова Река што ги поврзува Долно и Горно Лисиче.
Тендерските постапки и за двата проекта се во финална фаза и се очекува наскоро, по нивното комплетирање да се почне со реализација на терен.
„Водоводната мрежа на улица 2 во Долно Лисиче за првпат од нејзината изградба добива целосна реконструкција при што старите и дотраени цевки ќе бидат заменети со нови и пошироки инсталации во должина од околу 1 300 метри. Со ова конечно се става крај на повеќедеценискиот проблем со водоснабдувањето што го имаат жителите во овој дел од Аеродром“, соопштија од Општината.
Наредниот период Општина Аеродром започнува и со реконструкција и проширување на мостот на Маркова Река, меѓу Горно и Долно Лисиче.
„Мостот се наоѓа на многу фреквентна сообраќајница и токму заради зајакнување на безбедноста во сообраќајот се врши реконструкција со проширување на овој мост, со што би се добило побрз проток возилата, но она што е уште позначајно е дека ќе се зголеми и самата носивост на објектот“, се наведува во соопштението.
Реконструкцијата на водоводната мрежа и на мостот,додаваат од таму, се два капитални инфраструктурни прокета од витално значење, особено за жителите на Долно и на Горно Лисиче, и се финансиски поддржани од Владата.
Вкупната вредност на реконструкцијата на водоводната мрежа изнесува 15.457.871 денар, додека вкупната вредност на проширувањето на мостот е во висина од 12.066.494 денари.