Македонија
(Видео) Стоилковски: Вчерашниот марш покажа силен пркос и заеднички отпор против неспособната власт
По синоќешниот протестен марш на ВМРО-ДПМНЕ, портпаролот на партијата, Наум Стоилковски, на денешната прес-конференција изјави дека вчеравечер пред Владата се покажал силниот пркос и заедничкиот отпор на Македонци, Албанци, Турци, Власи, Роми, Срби, Бошњаци, на сите оние, како што рече, кои се против неспособноста и криминогеноста на оваа власт предводена од аболицираниот политичар кој во овие година и пол ја втурна Република Македонија во најмрачното време.
„Почна падот на однародената влада за национално понижување, почна падот на власта за економски порази, почна падот на власта којашто ја завитка Македонија во црнила. Оваа власт креирана за една намена, за национално уништување, и покрај сите сили со секакви понижувања и омаловажувања, не успеа Македонецот да го направи рамнодушен на сè, на сите распродажби на националните интереси, на политичкиот прогон, економско осиромашување, на севкупниот хорор во општеството. Масовноста на протестот на ВМРО-ДПМНЕ на којшто од дното на душата граѓаните бараат оставка на власта, докажува дека рамнодушноста е невозможна, дека народот го препознава злото“, изјави Стоилковски.
Оваа однародена власт ја затвори демократијата, ги погази правото и правдата, Собранието, достоинството на граѓаните, на пратениците, го злоупотребува сиот безбедносен и правен систем за политички прогон на неистомисленици, на опозицијата, вели Стоилковски.
„Се злоупотребуваат безбедносните институции за фингирани белешки за политички прогон. Цела година луѓе уметници, граѓани, интелектуалци, пратеници од опозицијата се во притвори, брутално приведени кршејќи го сиот систем, заради што реагираше и народниот правобранител, но одговорност за тоа нема. Цела година и пол, убиства, насилства и сурови криминали се случуваат низ улиците, но одговорност за тоа нема. За криминалот и убиствата нема истраги, затоа што службите се присилени да вршат притисок, претреси врз опозицијата, врз ВМРО-ДПМНЕ и нејзините членови и поддржувачи“, додаде портпаролот на партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без вода денеска дел од Сарај и високата зона во населба Ѓорче Петров
Од ЈП Водовод и канализација – Скопје, известуваат дека денеска:
· поради дефект на затварач со пречник од Ф-350 мм на ул. 20 во нас. Сарај, од 07:30 часот до санирање на дефектот, прекинато водоснабдување ќе имаат корисниците од населените места: Лака, Крушопек, Грчец, Шишево, Глумово, Горна и Долна Матка, Арнакија, Љубин и село Сарај, (Општина Сарај) и високата зона, односно повисоките катови од зградите во населба Ѓорче Петров.
Македонија
Дел од Бутел денеска без струја
Од ЕВН Македонија АД известуваат дека денеска без електрична енергија ќе останат:
· во периодот од 08:30 до 09:30 часот, објектот на ДОГАН ИНВЕСТ ДООЕЛ-СКОПЈЕ, односно објектот на Форд на самата раскрсница булевар Македонско-Косовска Бригада со булевар Босна и Херцеговина. (Општина Бутел)
Македонија
Продолжува периодот на стабилно и релативно топло време за овој период од годината
Сончево и релативно топло со мала до умерена локална облачност. Во утринските часови наместа ќе има зголемена облачност која во текот на денот ќе се намали. Ќе дува слаб ветер од северозападен правец. Минималната температура ќе биде во интервал од -3 до 4, а максималната ќе достигне од 11 до 16 степени.
Во Скопје, сончево со мала до умерена облачност и претежно тивко. Претпладне во делови од котлината ќе има услови за појава на слаба магла. Минималната температура ќе се спушти до 1, а максималната ќе достигне до 13 степени.
Времето во наредните денови
Продолжува период на стабилно и релативно топло време за овој период од годината. Во утринските часови наместа ќе има зголемена облачност која во текот на денот ќе се намалува.

