Македонија
(Видео) Стоилковски: Ковачевски незаконски именувал декан на факултет во партиските тела на СДСМ

Димитар Ковачевски незаконски именувал декан на факултет во партиските тела на СДСМ, со што директно го прекрши Законот за високото образование, изјави портпаролот на ВМРО-ДПМНЕ, Наум Стоилковски.
Според него, Ковачевски уште не дојден на позицијата премиер, во стилот на својот наредбодавец Заев, почнал со кршење на законите.
„Пионот на Заев, Димитар Ковачевски, во својот ИО го сместува Мишко Ралев, професор, декан на Факултетот за архитектура и дизајн. Со тоа прекршен е Законот за високото образование на Република Македонија, закон донесен во 2018 година во владеење на СДСМ. Ова зад мене е дел од законот, член 114, став 3 е дециден – вршењето на должноста декан и продекан е неспоиво со вршење друга јавна функција или функција во политичка партија. ИО на СДСМ е највисокото партиско тело во една политичка партија. И пионот на Заев, Ковачевски, но и деканот Ралев, одлучил да го прекрши Законот за високо образование“, рече тој.
Нагласи дека бараат пионот на Заев, Ковачевски, како што го нарече, да го исклучи Мишко Ралев од Извршниот одбор на СДСМ или, пак, Ралев да си поднесе оставка од позицијата декан.
„Истовремено, по ваквото именување, но и прифаќање на Ралев да биде дел од Извршниот одбор на СДСМ, со што го крши Законот за високото образование, очекувано е тој да се повлече од функцијата во високото образование. Сѐ поинаку е доказ за натамошна партизација, тонење во хибриден режим, тонење во заевизмот“, истакна Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Центар сигурно победуваме, вели Герасимовски

Актуелниот градоначалник на Општина Центар Горан Герасимовски, е убеден дека по втор пат ќе ја добие довербата на центарци, заради сработеното но и многуте планови од интерес на граѓаните.
На работната средба со новинарите, Герасимовски посочи дека во изминатиот период општината, раководена од него, работеше и работи транспарентно и отворено, и секогаш е достапна за граѓаните.
„Советот на општината и јас како градоначалник, сме пример за работење на локална самоуправа на територија на државата, ние сме меѓу малкуте општини каде што претседателот на советот доаѓа од друга политичка партија и одлично функционира изминатите три и пол години. Се прифаќаат предлози од сите советнички групи, без разлика на нивната политичка партија. Тоа што е издржано, тоа што е во интерес на граѓаните и за тоа што имаат финансиска поддршка, секогаш се прифаќа и од моја страна и од страна на советниците”, рече Герасимовски, нагласувајќи дека политиката е комплетно тргната настрана од работењето на општината.
И затоа според него, сработеното од него и од неговиот тим, дава право да се кандидира како градоначалник за втор мандат и секако да се добие локалната изборна трка.
Македонија
Сиљановска-Давкова го потпиша Договорот на ОН за заштита на водите и обезбедување нивен одржлив развој

Претседателката Гордана Сиљановска-Давкова, во рамки на третата конференција на Обединетите Нации за океанот којашто се одржува во Ница, го потпиша Договорот според Конвенцијата на ОН за правото на морето за зачувување и одржливо користење на морската биолошка разновидност на области надвор од националната јурисдикција (Договор BBNJ).
Целта на Договорот е преку зајакнување на меѓународната соработка и координација, да се сопре губењето на биолошката разновидност и деградацијата на екосистемите.
Истакнувајќи дека иако сме континентална држава направивме извонреден потег со тоа што пристапивме кон овој Договор, како и многу други држави, Сиљановска-Давкова рече – затоа што кога зборуваме за водите, мислиме на водите од потокот, од изворот, па до океанот и затоа е важно што повеќе држави да го потпишат Договорот.
Таа укажа дека Договорот ни наметнува и сериозни обврски кои треба сериозно да ги сфатиме затоа што сме должни како држава да сториме сè за заштита на водниот биодиверзитет и за одржлив развој на водите.
Оценувајќи дека состојбата со океаните и со водите воопшто не е сина, претседателката нагласи дека нештата мора да се менуваат во интерес на нивната заштита, затоа што добробит од тоа имаат сите држави на светот без оглед дали се на море или не – тоа значи дека и нашата држава ќе има само корист од заштитата на водите.
Во рамки на Конференцијата којашто се одржува во Ница, претседателката Гордана Сиљановска Давкова имаше и кратка средба со францускиот претседателот Емануел Макрон.
Македонија
Велковски за Денот на социјалните работници: Вие не само што ги менувате животите на луѓето, вие го менувате духот на нашето општество

Заменик министерот за социјална политика, демографија и млади, Ѓоко Велковски, присуствуваше на настан по повод двојно одбележување на социјалната работа, Денот на социјалните работници – 10 Јуни и Денот на социјалната работа кој беше неодамна.
Настанот насловен: „Ја славиме социјалната работа – за трајна благосостојба, заедничка иднина и силна солидарност!“ беше во организација на Здружението на социјални работници на Македонија – ЗСРМ, а на него покрај социјални работници присуствуваа и професори од Институтот за социјална работа и социјална политика при Филозофскиот факултет, Скопје.
Целта на одбележувањето на овој ден е да се афирмира значењето на социјалната работа и улогата која ја имаат социјалните работници во различни подрачја на делување во нашата држава.
Во оваа прилика Велковски изрази благодарност до социјалните работници за нивната пожртвуваност во работата за која што потенцираше дека „не постои подобар начин да се опише оваа професија освен со зборот хуманост“.
„На терен, ние знаеме дека предизвиците со кои се соочувате не се мали. Но вие не се откажувате, не се повлекувате. И секојдневната комуникација со вас ми покажува дека вие сте оние што ги имате решенијата, вие сте оние кои можат да најдат начин дури и кога изгледа дека нема начин. И во тоа, вашиот труд е непроценлив. Вие не само што ги менувате животите на оние кои ви се обратат, вие всушност го менувате духот на нашето општество, градите мостови меѓу луѓето, ја обезбедувате шансата за утре за оние кои сега се изгубени“, истакна Велковски.
Тој се осврна на заложбите на Министерство, за создавање на систем кој ги поддржува социјалните работници во вршењето на нивната мисија.
„Да обезбедиме подобри услови за работа, да обезбедиме ресурси и обуки кои ќе ви овозможат да се соочувате со сите предизвици кои се појавуваат. Вие сте вистинските херои на ова општество. Ви благодарам од срце и ви посакувам многу успех во вашата хумана работа,“ порача Велковски.