„Еленица“ и „Дравас инженеринг“ се двете најголеми компании на Заеви, а ѝ должат на државата над 400.000 евра данок, додека компаниите на Заеви им вртат 56 милиони евра годишно, обвини портпаролот на ВМРО-ДПМНЕ, Наум Стоилковски.

„Замислете, компанија што не би била блиска до власта и зад себе нема политички функционер, како што е Зоран Заев, колку даночни инспектори досега, колку инспекции и колку блокирања сметки и други зафати ќе доживееше, зафати кон ништење на бизнисот.

Во време додека Зоран Заев е премиер фирмите на семејството Заеви енормно се шират. Фирмите на Заев добија дозвола за одгледување медицинска марихуана во Свети Николе, го купија струмичкиот гигант „Герас Цунев“ за цена на една гарсониера, за 40.000 евра добиваат проекти за градба на станбени комплекси вредни десетици пати повеќе. И тоа не е сè. Вакви примери има многу. Бизнис во Струмица не е можен ако во тоа немаат интерес компаниите на Заеви.

Зоран Заев со триесетина семејни компании е пример за можна корупција, пример за политичко влијание, за моќ во бизнис-релациите. Тоа се најмалку неколку десетици причини за корупција и за насочување на државните економски текови. Сè додека на јавна функција се политичари што се сопственици, акционери на компании, има можност за корупција.

Македонија ја тресат скандали и афери поврзани со корупција и злоупотреба на моќта, поврзани и со политичкото дејствување на Зоран Заев, почнувајќи од струмички „Глобал“, до транспорт, градби, ископи, заеми, до полињата со марихуана, сите поврзани со фирмите на Заеви.

Бараме сите политичари што вршат јавни функции, доколку се сопственици, косопственици или акционери во одредени компании, бараме суштински да ги отуѓат бидејќи отвораат можност за корупција и насочување на економските текови во државата кон лични цели.

Формалното бришење од сопственост или формалното замрзнување на своето дејствување на политичари во компанија, кои истовремено се и јавни функционери, како Заев, отвора реална можност за злоупотреба на позицијата на моќ.